Македонија
Со сезонски ски-билет од Маврово може да се скија во зимските центри во поранешна Југославија
Со купен ски-билет во „Ресорт Маврово“ може да се ужива и во убавините и услугите на „Олимпискиот центар Јахорина“, Босна и Херцеговина, откога претставниците на двата скијачки центра потпишаа договор за меѓусебна соработка.
Ова значи дека секој што ќе купи ски-билет од „Ресорт Маврово“, бесплатно може да скија два дена во „Олимпискиот центар Јахорина“. Покрај договорот со овој центар, „Ресорт Маврово“ вакви договори склучи и со други ски-центри во регионот за зимската сезона 2023/2024. Скијачите што купиле сезонски билет за „Ресорт Маврово“ може да скијаат три последователни дена во скијачките центри на „Скијалишта Србије“ – Копаоник, Златибор и Стара Планина, „Олимпискиот центар Бјелашница и Игман“ и центарoт „Колашин 1600“ на „Скијалишта Црнa Горе“. Од друга страна, „Олимпискиот центар Јахорина“ ги обнови договорите за соработка со скијалиштата на Црна Гора, на Словенија и на Романија. „Ресорт Маврово“ жали дека со Попова Шапка не потпиша ваков договор.
„Нашиот сезонски ски-пас од Јахорина ќе важи од Словенија до Македонија. Тоа значи дека секој што ќе купи сезонски ски-билет ќе може бесплатно – гратис да скија 3 дена во ски-центрите со кои имаме договор, што е голема придобивка за скијачите. Во глобален контекст во однос на предизвиците, ја истакнуваме важноста од заедничката соработка, делење на ресурсите и искуствата. Регионалната соработка игра клучна улога во зачувување и унапредување на културата на скијање. Со овој чекор ја отвораме вратата за реализација на нови амбициозни цели вклучувајќи ја и можноста за организација на нови олимписки игри во нашиот регион“, рече Дејан Љевнаич, директор на „Олимпискиот центар Јахорина“.
Според него, Македонија има најдобар потенцијал од сите земји од поранешна Југославија. „Имате високи планини, тука во Маврово имате езеро за заснежување. Ние немаме море и останува да вложуваме во планини, но важно е да има добри експерти оти грешките скапо ќе чинат. Мора да се здружат сите, и централни и локални власти, за да се развие туризмот. Сега е полесно да се најдат пари за инвестирање, но малку потешко е да се најде човечкиот капитал“, изјави Љевнаич.
Во изминатите пет години во „Олимпискиот центар Јахорина“ се вложени 76 милиони евра, кои резултирале со зголемување на посетите од 30.000 на 412.000 посети годишно.
„Од размената на искуства во регионот дознаваме дека не постои успешен центар, без разлика дали е управуван од државата или од приватен концесионер, каде што во инвестицискиот план не учествува државата. Инвестициите во туризмот резултираат со десеткратно враќање на инвестицијата не само во туризмот туку и во другите економски сектори на државата“, објасни Огњан Циговски од „Ресорт Маврово“.
На средбата присуствува претставници на ски-центрите Попова Шапка и Крушево, со кои констатиравме дека климата за соработка меѓу домашните ски-центри е одлична и дека сме спремни за дијалог со државата.
„Планот за соработка меѓу сите ски-центри, локално и регионално, не е ништо ново. Ова постои со години во Европа. Видовме дека е возможно на Балканот, имаме ентузијазам да го реализираме и кај нас. Годинава, на голема радост на сите, снегот пристигна во ноември и ги вложивме сите напори да отвориме скијање во Маврово на 30 ноември, со промотивен еднодневен билет од 750 денари. Понудата ќе трае до крајот на неделата од кога почнува и регуларната скијачка сезона 2023/2024“, рече Циговски.
За разлика од регионот, според него, нашите власти и не толку вложуваат за развој на зимските туристички центри, иако се работи за планинска земја со голем потенцијал. Македонија е земја со 80 проценти планински масиви на својата територија. Имаме 52 врва над 2.000 метри надморска височина, но немаме ниеден конкурентен планински центар во регионот, објасни Циговски.
На потпишувањето на договорот за соработка присуствуваа и претставници на скијалиштата од Крушево и Попова Шапка, како и босанскиот амбасадор Драган Јаќимовиќ, кој го поздрави договорот и истакна дека само ваквите чекори ќе придонесат за зголемување на странските туристи во двете земји.
„Од минатиот месец имаме директна линија Скопје – Сараево, што ќе придонесе за зголемување на бројот на туристи и особено ми е драго што повеќе од 22 процента е зголемен бројот на туристи од Босна во Македонија и обратно. Ние ќе воведеме и авионска линија Бања Лука – Охрид“, изјави амбасадорот Јаќимовиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Директорот на „Идризово“ по пожарот со четворица задушени чувари: Се запали душек од сунѓер, кој може да пламне и од догорче од цигара
Четворицата задушени чувари од затворот „Идризово“ се во добра состојба и се очекува утре да бидат пуштени дома, вели директорот на затворот, Зоран Јовановски. Ги посетил синоќа, неколку часа откога завршија во болница оти вдишале чад гаснејќи го пожарот во затвореното женско одделение.
„Тие и вчера се чувствуваа подобро, но лекарите рекоа дека вдишаниот чад може да има одложено разложување, па затоа беа задржани за да бидат под надзор. Веќе утре, како што ни е кажано, ќе бидат пуштени дома. Четворицата чувари, заедно со полицајците и војниците, кои се во затворот, го гаснеа пожарот. Огнот не беше толку голем колку што беше чадот. Се запали душек направен од сунѓер, кој воопшто не е по стандардите за опрема во затвори оти може да вивне во пламен и од обичен отпушок. Не требало воопшто да бидат набавени такви душеци, но тука се. Изгорен е само еден душек, другите се само оштетени оти интервенира и пожарната за да не се прошири огнот и во другите простории“, вели директорот Јовановски за „Макфакс“.
Во собата во која избувнал пожарот, како и во другите соби во затвореното женско одделение во „Идризово“, сместени се пет затворенички. Директорот Јовановски не ја исклучува можноста пожарот да бил подметнат, но очекува МВР тоа да го утврди.
„Сунѓерот од кој е направен душекот е високозапалив, можно е да се работи за невнимателност, но можно е и да е намерно запален. Тоа ќе го утврди МВР. Дојде увидна екипа, направи разговори. Очекуваме истрагата да покаже што се случило“, рече директорот Јовановски.
Собата во која избувнал пожарот е испразнета и најбргу што може ќе биде реновирана.
За една година и два месеца, колку што тој е директор на затворот „Идризово“, Јовановски вели дека ова е прв пожар во затворските соби. Пред една недела во пожар изгоре неговиот службен автомобил, а изминатива една и пол година изгореа седум возила на вработени во затворот „Идризово“.
Македонија
ДИК: Излезноста до 15 часот е 34.87 отсто
До 15 чaсот, од вкупно запишани 4.514 гласачи на седумте избирачките места, гласале 1574 односно 34.87 отсто, објави Државната изборна комисија.
Во ИМ 2101 во Желино гласале 428 гласачи односно 43.10%.
Во ИМ 1194 во Крушево, гласале 197 гласачи односно 42 %.
Во ИМ 1202 во Крушево, гласале 67 гласачи односно 22.48 %.
Во ИМ 1272 во Охрид, гласале 226 гласачи односно 31.79 %.
Во ИМ 1470 во Долнени, гласале 173 гласачи односно 26.29 %.
Во ИМ 1470/1 во Долнени, гласале 184 гласачи односно 29.11%.
Во ИМ 1844 во Струга, гласале 299 гласачи односно 39.71 %.
Во споредба со гласањето на 8 мај 2024, до 15 часот, на ова прегласување се забележува зголемена излезеност за 1.21% на овие избирачки места.
Македонија
(Видео) Трипуновски: Со земјоделците и откупувачите договориме откупната цена на младиот компир да не биде под 20 денари за килограм
Дополнителниот заменик министер за земјоделство, шумарство и водостопанство Цветан Трипуновски денеска е во општина Босилово каде што земјоделците од овој регион веќе неколку дена протестираат заради падот на откупната цена на младиот компир.
– Заедно со мене на протестот присуствуваа и неколку откупувачи и заедно со земјоделците разговаравме за можно решение и се договоривме во наредните 10 дена откупната цена на младиот компир да не биде под 20 денари за килограм, а потоа се договоривме да оствариме уште една средба се со цел да го средиме и останатиот дел од пазарот. – изјави Трипуновски.
Трипуновски рече дека успеале заеднички да се договорат за условите и можностите за понатамошниот тек на откупот на млад компир.
– Денес постигнавме договор кој не е идеален, но е преодно решение во овие тешки моменти кои ги наследивме од Владата на СДС. Во иднина ние како Влада предвреме заедно со земјоделците и откупувачите ќе креираме мерки и стратегии за да немаме повеќе вакви несакани ситуации. – заврши Трипуновски.