Македонија
Спасовски: Безбедносната состојба во 2023 година е поволна, без индиции да биде нарушена

Министерот за внатрешни работи Оливер Спасовски заедно со дел од раководството на МВР и БЈБ беше во посета на Регионалниот центар за гранични работи Запад во Охрид, каде што оствари работна средба со раководствата на СВР Охрид, СВР Битола и РЦГР Запад, а со цел да се слушнат резултатите од постапувањето на полициските службеници по поставените стратешки приоритети и цели, и да се направи своевидна рекапитулација на остварувањата во зголемување на безбедноста, имајќи предвид дека годината наближува кон крајот.
По брифингот со раководствата на овие организациони единици на БЈБ при МВР, министерот Спасовски даде изјава за медиумите во која информираше за безбедносната состојба и за постигнатите резултати и идни планови.
„Безбедносната состојба на подрачјето во 2023 година е поволна, без индиции да биде нарушена, а благодарение на раното детектирање на новите трендови и закани се олеснува превенцијата и борбата против криминалните појави”, рече министерот Спасовски. Притоа тој се осврна на постигнувањата на РЦ Запад за 2023 година.
„РЦ Запад бележи зголемен проток на патници на граничните премини за 11% споредбено со 2022 година, при што на овие гранични премини влез и излез оствариле 3,4 милиони патници, a на Граничниот премин Ќафасан функционира режимот One Stop Control на проток на патници. Зголемување за 47 % е евидентирано и на бројот на странци со краткотраен престој, а што се однесува до илегалната миграција тенденцијата е иста како во генерални рамки, при што се бележи намалување на обиди за илегални преминување на нашата граница, како резултат на мерките и активностите кои се преземаат на терен и добрата поставеност на нашите служби. За одбележување се и контролните активности на Полициската станица за граничен надзор Охридско Езеро, каде периодов беа пронајдени 620 мрежи со 337 кг уловена риба”, истакна министерот Спасовски.
Што се однесува до резултатите на СВР Охрид за 2023 година споредбено со 2022 година, Спасовски истакна:
„Во истиот овој период, СВР Охрид бележи намалување на криминалитетот за 18.8%, додека ефикасноста во расчистување на кривичните дела со непознат сторител изнесува 44%. Економскиот криминал бележи намалување од над 11 % на ниво на овој сектор, додека во делот на недозволена трговија со дрога во текот на оваа година поднесени се 133 кривични пријави, а динамиката на откривање и спречување е посебно нагласена во последната половина година, кога е реализирана заплена на наркотична дрога во 78 наврати”, рече Спасовски, со уверување дека вработените во овие две организациони единици ќе продолжат со несмален интензитет да бележат позитивни резултати во гарантирањето на безбедноста.
Воедно, во пресрет на претстојните празници и очекуваното зголемено присуство на граѓани во туристичките подрачја, министерот Спасовски посочи на уште позајакнати мерки и активности со цел одржување на поволен јавен ред и мир и високо ниво на безбедност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) ВМРО-ДПМНЕ ги објави имињата на уште осум кандидати за градоначалници

Извршниот комитет на ВМРО-ДПМНЕ, вечерва во Штип определи уште осум кандидати за градоначалници за претстојните локални избори.
ВМРО-ДПМНЕ донесе одлука да му предложи на Централниот комитет.
1. Македонски Брод – Жарко Ристески.
2. Могила – Драганчо Саботковски
3. Пробиштип – Тони Тоневски
4.Богданци – Марјан Пеев
5. Демир Капија – Наталија Димитриева
6. Росоман – Ѓорги Крстевски
7. Новаци – Стевче Стевановски
8. Дебарца – Златко Силјановски
Пратеникот Антонијо Милошоски по состанокот изјави дека овие 8 кандидати за градоначалници се одговорни, исполнителни личности кои што својата активност ја докажале не само во рамките на коалицијата на ВМРО-ДПМНЕ туку имаат углед и во самите општини. Ним ќе им биде препорачано во следниот период, да си отворат што поголема комуникација со локалните граѓани во општините за да може да поработат директно на терен за составување на програмата која што е потребна за локални избори.
Централниот штаб ќе биде на располагање заедно со еден тим кој што ќе биде формиран за локалните избори, да им помогне за одредени проекти, кој што се од поголемо капитално значење за Македонски брод, Могила, Новаци, Пробиштип, Богданци, Демир Капија, Росоман и Дебарца.
„Цениме дека со овие 8 вечерва објавени кандидати за градоначалници и претходните 25, ВМРО-ДПМНЕ со самодоверба чекори кон локалните избори бидејќи сме единствената партија која што во моментов има обзнането имиња на 33 кандидати за градоначалници за кои што сметаме дека се на добар пат и да ја добијат довербата на граѓаните“, рече Милошоски.
За оние кои што се актуелни градоначалници, партијата смета дека дека со досегашната работа, ќе имаат добар кредит да ја добијат и понатамошната доверба.
Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.