Македонија
Спасовски го претстави предлог-граѓанскиот буџет на МВР за 2022

Министерот за внатрешни работи, Оливер Спасовски, денеска на прес-конференција го претстави предлог-граѓанскиот буџет на Министерството за внатрешни работи за 2022, кој целосно ги одразува заложбите и приоритетите на Министерството за внатрешни работи – континуирано системско реформирање на полицијата преку етаблирање на принципите на владеење на правото во сферата на безбедноста како еден од круцијалните фактори за просперитет на државата.
„Предлог-буџетот на МВР за 2022 е со вкупна вредност од 10 милијарди и 410 милиони денари и е испланиран во согласност со развојната компонента за подобрување на работењето и реализирање на сите активности што се во надлежност на Министерството, како и негово непречено функционирање и работење за остварување на основните стратешки приоритети и цели. Притоа зголемувањето е обезбедено во ставките што овозможуваат континуитет во градењето современа и стручна институција и понатамошен развој на демократските принципи во полициското работење во согласност со европските препораки и стандарди“, истакна министерот Спасовски.
Според него, преку реализација на вака проектираниот буџет ќе се остварат две основни цели, од кои првата е продолжување на воспоставениот концепт: полиција – сервис на граѓаните. Како дел од проектите од кои директен бенефит ќе има заедницата е продолжување на проектот за реконструкција и изградба на полициските станици.
„За овие неколку години инвестираме многу во капацитетите на МВР, што резултира со 63 целосно завршени реконструирани објекти на територијата на целата држава, што со децении не беа допрени. Притоа сега веќе зборуваме и за имплементирани мерки за енергетска ефикасност, со што се создадоа не само квалитетни услови за работа на полициските службеници туку и трансформација на објектите на енергетски план, поголеми заштеди и намалени емисии на штетни гасови. Еве, за илустрација, прегледот на трошоците за испорачана електрична енергија споредбено во 2017 и во 2021 во одредени сегменти зборува за 100 % заштеда, односно вкупно на ниво на МВР станува збор за 5 милијарди и 376 милиони денари заштеда на финансиски средства, народни пари, што говори за домаќинскиот однос што го остваривме со овие реконструкциски зафати. Значи, добивме вин-вин ситуација“, посочи министерот Спасовски.
Министерот за внатрешни работи објасни дека со зголемен буџет за оваа ставка во 2022 за 100 милиони денари во споредба со минатата година, ќе се продолжи со градежните активности, и тоа најнапред во Центарот за обука во Идризово, па Одделот за граѓански работи во МРТ, кој практично го претставува лицето на полицијата пред граѓаните, како и изградба на полициската станица во Аеродром. Во предлог-буџетот на МВР за 2022 испланирани се и средства за проектот „Автоматизирана идентификација на отпечатоци од прсти и дланка“, што влегува во групата лабораториска опрема за новиот објект на Одделот за криминалистичко-технички испитувања и вештачења, кој ќе биде опремен во согласност со сите најнови европски полициски стандарди во доменот на крим-техниката, како и модернизација на летало на Одделот за воздухопловни единици на МВР, со најмодерна опрема за комуникација и опрема за гаснење пожари.
„Втората основна цел, која преку овој развоен буџет сакаме да ја оствариме, а е суштински испреплетена со првата што веќе ја образложив, е создавање модерна, опремена, стручна, ефикасна, но и задоволна полиција“, рече Спасовски додавајќи: „Оваа тековна година продолживме со набавка на униформи, па специјалните единици добија повеќе комплети нова униформа, униформи и чевли се набавени и за униформираната полиција, за Одделот за заштита на определени личности и објекти во рамките на БЈБ, за хеликоптерската единица, а целосно нова униформа е обезбедена и за младите полицајци и приправници. Покрај ова, ги исплативме трите заостанати бонус плати за прекувремено изработени часови, а тековните бонус плати се исплаќаат навремено. На секој полициски службеник треба и мора да му се обезбедат елементарни предуслови за нормално работење“, подвлече Спасовски.
Така, во предлог-буџетот на МВР за 2022 обезбедени се средства за зголемување на платите за вработените во Министерството за внатрешни работи за 5 %, со цел продолжување на процесот на усогласување на платата за припадници на МВР во согласност со постојни договори за зголемување на платите, како и средства за бонус плата за оствaрени над 150 часа прекувремена работа на годишно ниво во текот на 2021 година.
„Мотивираноста на полициските службеници се рефлектира во добри резултати во генералната безбедносна состојба на подрачјето на државата во текот на 2021 година, која е стабилна, без сериозни безбедносни настани, а стапката на вкупниот криминалитет е намалена во однос на истиот период од минатата година. Притоа сузбиени се седум организирани криминални групи, во кои членувале 42 члена што дејствувале во областа на недозволената трговија со дрога, мигранти и бесправна сеча на шуми. Во рамките на спречување на недозволената трговија со дрога, беа пресечени 12 меѓународни транспорти на марихуана и хашиш, а во областа на недозволената трговија со оружје откриените кривични дела бележат зголемување од 23,4 %, додека заплените со оружје, муниција и пиротехнички средства се повеќекратно зголемени. Бележиме зголемување на откривачката дејност и на случаи на корупција и коруптивни злоупотреби за 58,3 % во споредба со истиот период лани, а зголемено е и откривањето на злоупотреба на службената положба со коруптивни елементи за 54 %. Во однос на сообраќајот, тенденција на намалување има и бројот на жртвите во сообраќајните несреќи. И, конечно, сето ова резултира со рангирање на нашата држава како најбезбедна држава на Западен Балкан, која за неколку години од 71. место се искачи на 40. место“, потенцира министерот.
Според Спасовски, предлог-буџетот на МВР за 2022 ќе овозможи преку планираните проекти и активности да се финишираат реформските процеси во Министерството со цел негово целосно сообразување со стандардите и нормите на современите и квалитетни европски и светски полициски практики, што е основа за уште подобри резултати во работењето на сите организациони единици на Министерството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Министерството за одбрана реагира на соопштението на СДСМ: Лицемерно, со манипулација на факти и со целосно извртување на вистината

„Лицемерно, со манипулација на факти и со целосно извртување на вистината – така се карактеризира соопштението од политичката партија СДСМ која се обидува редовна и навремена набавка која се спроведува години наназад и се однесува на потребите на Армијата и СИТЕ угостителски објекти на Министерството и Армијата, вклучувајќи го и Домот на Армијата, авто камповите во Дојран и Охрид, како и Хотелот „Шар“ на Попова Шапка, да ја претстави во сосема поинакво светло. Првенствено, треба да се има предвид дека набавеното кафе и пијалоци во угостителските објекти кои се од отворен карактер за граѓаните, се во слободна продажба, а приходот од продажбата повторно влегува во македонскиот буџет“, реагира Министерството за одбрана на соопштението од политичката партија СДСМ.
„Впрочем, имајќи предвид дека последните седум години со Министерството раководеа кадри на оваа политичка партија, кои ги правеле ИСТИТЕ набавки, се поставува прашањето – дали тие не знаеле што прават, дали се „луксузирале“ со народните пари или сега се обидуваат да стават сомнеж на функционирањето и побарувањата од не било која, туку најценетата и најпочитуваната институција во државата – македонската Армија?
Фактите се следни:
Набавката на кафе и алкохолни пијалоци е спроведена во јавна и транспарентна постапка. Целата документација, вклучително и тендерската документација, договорите и одлуките се јавно достапни на Порталот за јавни набавки и секој граѓанин, новинар или институција може слободно да направи увид, анализа и споредба со набавките од претходните години.
Набавката се однесува на угостителски објекти од отворен тип, кои се користат во рамките на протоколарни, воени и меѓународни активности, а не за „удобност“ на министри, како што лажно се тврди.
Години наназад е спроведена ИСТА ТАКВА НАБАВКА, која оваа година (во споредба со 2023 година) е со многу помали количини, на пример: ставката за алкохолни пијалоци е намалена од 50 до 88 проценти, а жестоките алкохолни пијалоци кои претходно биле набавувани се целосно отстранети.
Сумата на договорот во 2025 година е намалена за 15 проценти во споредба со 2024 година и за речиси 40 проценти во споредба со 2023 година.
Прашањата кои се поставуваат се логични: Или раководството од СДСМ кое го предводело Министерството не знаело што работи и што набавува или политичката партија влегува во едно црно сценарио во кое се обидува да ја вметне и македонската Армија.
Ги повикуваме сите медиуми да не ги земаат предвид ваквите дезинформации кои се пласираат во јавноста особено од страна на политички партии. Борбата со дезинформациите и манипулацијата со фактите е нешто против кое треба сите заедно да се бориме вклучувајќи ги и политичките партии, а не тие да потекнуваат токму од овие кујни.
Се работи за македонските граѓани и за Македонија и токму затоа не смееме да дозволиме граѓаните да бидат излажани“, се наведува во реакцијата од Министерството за одбрана на соопштението од политичката партија СДСМ.
Македонија
Од утре се нормализира сообраќајот на регионалниот пат Нова Брезница – Македонски Брод преку националниот парк Јасен

Утре од 05.00 часот регионалниот пат Р 1106 Нова Брезница – Македонски Брод преку националниот парк Јасен ќе биде пуштен за сообраќај во термините од Министерство за внатрешни работи, извести АМСМ.
Македонија
(Видео) СДСМ Прилеп: Заради протест на вработените, прилепчани останаа без градски превоз

„Систематски, како по книга, ВМРО-ДПМНЕ го уништува Прилеп! Неисплатената плата на вработените во Јавното претпријатие за просторни и урбанистички планови, е причина за тридневниот прекин на градскиот превоз во Прилеп. Како главни виновници за настанатата ситуација, вработените и директорот на јавното претпријатие ги посочија Општината, односно училиштата, кои на претпријатието му должат фантастични 7 милиони денари“, вели Саша Лепиткова, претседателка на Форум на жени на ОО СДСМ-Прилеп.
„Така, неспособноста на градоначалникот Борче Јовчески и аматерското водење на институциите од страна на директорите на ДПМНЕ, ги принуди прилепчани сами да се снаоѓаат и да го решаваат проблемот кој им го сервираше локалната власт.
Со тоа, после само два дена на виделина излегоа лагите за „успешното“ функционирање на локалните институции, кои преку таканаречениот „Отчет“ Јовчески и ДПМНЕ ги презентираа на партискиот „Саем на срамот“ во Скопје.
Лага е дека Општината набавила 5 нови минибуси за градскиот превоз, а уште поголема лага тезата за „огромните“ инвестиции во основните и средните општински училишта.
Да биде трагикомедијата поголема, токму лошото менаџирање на овие институции и нивната меѓусебна спрега, ги доведе во ќорсокак вработените во јавното претпријатие за просторни и урбанистички планови.
Граѓаните на Прилеп немаат никаква дилема дека актуелната владејачка гарнитура на ДПМНЕ, е најлошата од постоењето на градот.
После обврските од 6 милиони евра кои Јовчески и ДПМНЕ му ги оставаат на новиот градоначалник, после испустените јавни претпријатија, прашањето кое се наметнува е – ќе имаат ли време до крајот на мандатот да уништат уште нешто?“, изјави Саша Лепиткова, претседателка на Форум на жени на ОО СДСМ-Прилеп.