Македонија
Спасовски: За 50 проценти намалени обидите за илегален премин на јужната граница
Денеска, во Кавадарци, во седиштето на Регионалниот центар за гранични работи „Југ“, министерот за внатрешни работи заедно со дел од раководстово на МВР оствари средба со раководството на оваа организациска единица, а во рамките на традиционалните средби кон крајот на секоја тековна година, за да се сумираат резултатите од сработеното, но и да се изврши преглед со цел утврдување на приоритетите за идната година. Регионалниот центар за гранични работи „Југ“, кој е домаќин на денешната средба, активно работи во делот на справување со илегалната миграција и шверцувањето мигранти, на спречување и санкционирање на прекуграничен криминал, вклучувајќи го криминалот со моторни возила и фалсификување документи, но и по неколку актуелни и активни оперативни акции.
„Генерално, овој Регионален центар годинава бележи зголемување од 43 % на откриените кривични дела постапувајќи по 25 разни основи од Кривичниот законик. Најзначајното зголемување е кај кривичните дела фалсификување исправи, и тоа за 114 %, давање поткуп за 300 %‚ потоа кражба, давање лажни докази и сл. Што се однесува до прекуграничниот криминал, кој во најголем дел е откриен на ГП Дојран, ГП Богордица и ПС Михајлово, откриените фалсификувани документи бележат зголемување од 39 %, за 20 пати е евидентирано зголемување на откриениот криминал со моторни возила, а за 8 пати на откриениот криминал со цигари“, истакна Спасовски во изјава за медиумите по реализираната средба. Притоа тој ги сподели податоците за кои беше брифиран од раковдството на оваа организациска единица, а кои се однесуваат на протокот на патници на јужната граница и обидите за илегален премин на истата.
„Во однос на обидите за илегални преминувања, иако најголемиот притисок со години е токму на границата на Република Северна Македонија со Република Грција, годинава имаме за 50 % намалување на бројот на обидите за илегално преминување на границата, односно отворање нови рути во соседните држави. Тоа се должи на зајакнатите мерки и поефикасната контрола како на самата гранична линија така и преку работењето на пунктовите во внатрешноста и, секако, вклученоста на припадниците на Фронтекс. Бројот на откриени случаи на шверцување мигранти е сличен со минатата година, но ако го земеме предвид фактот дека бројот на мигранти во 2023 е намален за половина од лани, тоа говори за поголема ефикасност при откривањето на овие кривични дела во 2023 година. Во оваа пригода не можам, а да не го споменам зголемувањето на протокот на патници во однос на минатата година, и тоа за 25 %, односно јужната граница во овие 11 месеци ја поминале речиси 5,8 милиони патници, а најфреквентен е ГП Богородица, каде што зголемувањето изнесува цели 30 %. Во однос на другите активности по споменатите оперативни акции, РЦ „Југ“ бележи зголемување за 110 % на откриениот криминал со огревни дрва, а за 6 пати се зголемени откриените случаи на шверц со наркотици“, рече Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нема подолги задржувања за влез и излез од државата
Сообраќајот на државните патишта се одвива непречено, по наместа влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Скопје
Без струја делови од општините Илинден и Кисела Вода
Регионалниот центар за управување со кризи на Град Скопје, по добиеното известување од ЕВН, информира дека поради технички зафати во електро дистрибутивната мрежа, денеска, без електрична енергија ќе останат делови од општините Илинден и Кисела Вода.
Од 08:30 – 09:30 часот, корисниците од улицата бр. 34 во населба Илинден, општина Илинден ќе немаат струја.
Без електрична енергија од 09:00 – 13:00 часот, ќе бидат корисниците од дел од улицата Востаничка во општина Кисела Вода.
Македонија
Управен оформи предмети за седумте тужби на „Европскиот фронт“ против решенијата на ДИК
Управниот суд оформи седум предмети за поднесените тужби од „Европскиот фронт“, кои се против одлуката на Државната изборна комисија (ДИК) за одбивање на приговорите за парламентарните избори.
„Со оглед на роковите за постапување и одлучување, Управниот суд итно ги презема сите процесни дејствија согласно Изборниот законик“, се вели во соопштението.
- Решение бр.УП1 бр.10-21/2 од 14.05.2024 година на Државната изборна комисија на РСМ, оформен е предмет УРП.бр.87/24;
- Решение бр.УП1 бр.10-21/1 од 14.05.2024 година на Државната изборна комисија на РСМ, оформен е предмет УРП.бр.88/24;
- Решение бр.УП1 бр.10-15/1 од 14.05.2024 година на Државната изборна комисија на РСМ, оформен е предмет УРП.бр.89/24;
- Решение бр.УП1 бр.10-17/2 од 14.05.2024 година на Државната изборна комисија на РСМ, оформен е предмет УРП.бр.90/24;
- Решение бр.УП1 бр.10-17/1 од 14.05.2024 година на Државната изборна комисија на РСМ, оформен е предмет УРП.бр.91/24;
- Решение бр.УП1 бр.10-6 од 14.05.2024 година на Државната изборна комисија на РСМ, оформен е предмет УРП.бр.92/24;
- Решение бр.УП1 бр.10-19/1 од 14.05.2024 година на Државната изборна комисија на РСМ, оформен е предмет УРП.бр.93/2
Попладнево Управниот суд одржа јавна седница по тужбата на „Вреди“. Судот одлучи дека постапката се прекинува откако претставникот на коалицијата изјави дека тужбата ја повлекува во целост.