Македонија
Гаши се сретна со новоименуваната амбасадорка на Јапонија, разговараа за можноста за размена на искуства меѓу двете земји

Претседателот на Собранието, Африм Гаши, денеска имаше средба со новименуваната амбасадорка на Јапонија во земјава, Сецуко Кавахара. Претседателот Гаши на амбасадорката Кавахара ѝ посака срдечно добредојде и ѝ посака успешно извршување на функцијата.
Тој изрази надеж дека Северна Македонија и Јапонија ќе ги продолжат и ќе ги продлабочат добрите и пријателски односи, коишто ги негуваме со децении наназад. Претседателот додаде дека Јапонија е еден од нашите најголеми билатерални донатори, во повеќе области, особено во образованието и здравството, преку проектите за техничка соработка, грантови и донации.
Амбасадорката Кавахара нагласи дека во рамките на нејзиниот мандат ќе стори сѐ добрите и пријателски односи меѓу двете држави да се продлабочат и тоа во сите области, економијата, здравството, образованието, како и во зголемувањето на трговската размена.
Претседателот на Собранието информираше дека во нашето Собрание е формирана Пратеничка група за соработка со Јапонија и има интерес за унапредување на соработката на највисоко парламентарно ниво и на ниво на Пратенички групи за соработка меѓу двете држави. Тој додаде дека како претседател на Собранието силно се залага за унапредување на парламентарната дипломатија, за јакнење на меѓусебниот дијалог, што е многу важно, особено денеска, кога светот се соочува со големи предизвици.
Двајцата соговорници разговараа за можноста за размена на искуства меѓу двете земји во повеќе области, особено во образованието, каде Јапонија како држава има одлични резултати.
Претседателот на Собранието го поздрави зголемениот интерес на Јапонија за земјава, како дел од регионот на Западен Балкан, кој се демонстрира преку јапонската Иницијатива за соработка со Западен Балкан од 2017 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Бутел денеска без струја

Од ЕВН Македонија АД извесуваат дека денеска без електрична енергија ќе останат:
– во периодот од 08.30 до 11.00 часот, корисниците од улицата Хо Ши Мин лоцирани на потегот од напојната трафостаница Бутел 2 до објектот бр. 287 Б. (општина Бутел)
Македонија
Променливо облачно со повремен локален дожд

Времето денеска ќе биде променливо облачно со повремен локален дожд. Ќе дува слаб до умерен ветер од северен правец. Минималната температура ќе биде во интервал од 8 до 13, а максималната ќе достигне од 16 до 22 степена.
Во Скопје, променливо облачно со сончеви периоди. Ќе дува слаб ветер од северен правец. Минималната температура ќе се спушти до 13, а максималната ќе достигне до 22 степена.
Времето во наредните денови
Во вторник ќе има преодно стабилизирање на времето. Од среда кон крајот на денот се очекува нов влажен и постуден бран со пообилни врнежи од дожд. Температурата ќе биде во значително опаѓање.
Македонија
Засадиле 100 семки канабис на нива во Пчиња, ОЈО отвори истрага

Започнати се постапки против дилери на марихуана во Велес и во Скопје, информираат вечерва од Јавното обвинителство. Јавните обвинители до надлежните судови доставиле предлози за определување мерка – притвор за сите тројца осомничени.
– Основното јавно обвинителство – Велес донесе наредба за спроведување истражна постапка против две лица за кривично дело – неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик. Двајцата осомничени – соизвршители, во периодот од март до септември годинава, во атарот на велешкото село Карабуниште, неовластено произведувале марихуана. Засадиле 100 семки канабис на нива во месноста викана Пчиња, од кои изникнале 80 растенија што ги одгледувале и ги наводнувале, појаснуваат од Обвинителството.
На 27 септември, осомничените биле затекнати од полициски службеници додека собирале цвет од канабис.
– На лице место биле пронајдени машини за одвојување на цветот од стеблото, три пластични кофи со вкупно над четири килограми марихуана и повеќе вреќи со стебла од канабис, додаваат од Обвинителството.
За истото кривично дело и Основното јавно обвинителство – Скопје отворило истрага против едно лице, за кое во соопштението се наведува дека неовластено произведувало и држело за продажба наркотична дрога – марихуана.
– Во дворот на осомничениот на улицата „Кадињача“ во Скопје, полицијата пронашла две растенија канабис што ги одгледувал, а од домот биле одземени и 38 паковки со вкупно околу 30 грама марихуана и една дигитална вага со траги од канабис и кокаин, истакнуваат од Обвинителството.