На Конференцијата на спикери на парламенти на земјите членки на ЕУ, која се одржува денес и утре на Брдо при Крањ, Република Словенија, претседателот на Собранието на Република Северна Македонија, Талат Џафери, оствари билатерална средба со претседателот на Националното собрание на Република Словенија, Игор Зорчич.

На средбата беа топло поздравени пријателските и континуирано одлични односи со Република Словенија и беше искажана особена благодарност од страна на претседателот Џафери до неговиот колега за поканата да биде воведен говорник на вториот панел и за учеството на оваа конференција. Тој го информира претседателот Зорчич за актуелните случувања во Република Северна Македонија, со посебен акцент на односите со Република Бугарија и чекорите преземени од државните институции, вклучително и од страна на Собранието во однос на Украина. Во тој контекст претседателот Џафери апелира за што побрзо почнување на преговорите за членство на Република Северна Македонија и Република Албанија, кои ги исполнија условите за почеток на преговорите со Европската Унија, а отворените прашања да се решаваат етапно во текот на преговорите. Овој апел беше во насока на спречување на понатамошниот пад на довербата кај граѓаните во Република Северна Македонија за членство во Европската Унија и пробив на трети страни во општествено-политичкиот живот на земјата. Претседателот Џафери исто така го информира и за усвоената декларација за поддршка на територијалниот интегритет и суверенитет на Украина, со огромна поддршка од речиси сите пратеници во Собранието на Република Северна Македонија, информираат од кабинетот на Џафери.

Претседателот Зорчич ги поздрави единството на Европската Унија и брзата реакција на земјите од Западен Балкан во однос на случувањата во Украина, особено целосната усогласеност на Република Северна Македонија со позициите на надворешната и безбедносна политика на Унијата. Како претседател на до неодамна земја што претседаваше со Советот на Европската Унија, тој нагласи дека и покрај разликите што постојат меѓу земјите во Унијата и нивните видувања за одредени теми, општа е согласноста дека процесот на проширување мора да се придвижи напред со забрзано темпо и да им се овозможи на земјите од Балканот да напредуваат на тој пат.

На крајот, изрази надеж дека конференцијата на спикерите на парламентите на ЕУ ќе има успешен завршок и дека пораките што ќе бидат упатени од тука ќе придонесат за пообединета, позајакната и посилна Европска Унија.