Македонија
Стариот Закон за СЈО не може да ги спаси осомничените од истрагите

Aко Собранието до крајот на месецот го донесе новиот Закон за Јавното обвинителство, со кој се регулира и статусот на СЈО, осомничените во истрагите на ова обвинителство планираат пред судовите да се повикаат на начелото за задолжителна примена на поблагиот закон, т.е. на стариот Закон за СЈО, потврдуваат за „Макфакс“ некои од бранителите. Ако судовите тоа го прифатат, тоа би значело дека осомничените би биле ослободени од кривично гонење.
Образложението е дека членот 22 од постојниот Закон за СЈО им оди во прилог на осомничените бидејќи има предвидено рокови за обвиненија и истраги кои се истечени.
Врховниот суд во решенијата за ослободување од куќен притвор на тројцата осомничени во случајот „Империја“, членот 22 од Законот за СЈО го толкува како процесна одредба, а не како материјална. Експертите по кривично право велат дека членот 22 од постојниот Закон за СЈО нема само процесна природа.
Академик Владо Камбовски за „Макфакс“ вели дека со процесна одредба не може да се ослободат осомничените од кривичен прогон и истрагите на СЈО може да продолжат.
„Спорно е дали членот 22 има материјален карактер. Излегува дека со тој член законодавецот како да дал амнестија. Има само неколку случаи кога може со материјален закон да се прости кривичното гонење. Тоа се: амнестија, застареност на делото и помилување. Не може со процесен закон да се даде амнестија“, вели академик Камбовски.
Тој додава дека Уставниот суд или Собранието преку автентично толкување на Законот може да пресече дали осомничените може да се повикаат на овој член како поблага законска одредба.
„Тоа би можело да го просече парламентот со автентично толкување на членот од Законот за СЈО или Уставниот суд. Ако се рече дека одредбата е процесна, тогаш вистинската волја на Собранието била амнестија. Значи, кој дотогаш е обвинет е обвинет, а кој не е, се амнестира“, додава Камбовски.
Министерката за правда, Рената Дескоска, е со истиот став дека поблагиот закон не може да важи за процесни права и дека треба да се земе предвид праксата на Европскиот суд за човекови права. „Има одлуки на Европскиот суд за човекови права. Забраната за ретроактивно важење на Законот освен ако е поповолен се однесува на висина и вид на казна, но не и на процесни права. Делата кои ги гони СЈО ниту се декриминализирани, ниту е дадена амнестија, така што новиот закон во склад со сите правни стандарди го регулира продолжувањето на постапките во која било фаза пред СЈО. Илузорно е дека некој може да се спаси од кривично гонење со Закон за обвинителство“, вели Дескоска.
Камбовски тврди дека за случаите кои се отворени по рокот определен со постојниот Закон за СЈО, нема пречка за водење постапка за конфискација на имот, ако има некаква имотна корист прибавена со кривично дело за кое повеќе не може да се води кривична постапка. „Тој член 22 не влијае на конфискацијата на имот. СЈО во оние случаи каде што не може да покрене обвинение може да поведе постапки за конфискација на имот“, вели Камбовски.
Барањето за автентичното толкување на членот 22 од Законот за СЈО кое го поднесе Јавното обвинителство на Република Северна Македонија најверојатно нема да добие мислење од Владата и да се најде како точка на дневен ред на собраниската законодавно-правна комисија, поради новиот предлог-закон за Јавното обвинителство. Власта очекува до 21 март овој закон да биде донесен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Денес се евидентирани вкупно 22 пожари на отворен простор

На територијата на државава денеска до 18 часот се евидентирани вкупно 22 пожари на отворен простор, од кои 14 се активни, а по четири се под контлола и изгаснати.
Како што информираат од Центарот за управување со кризи (ЦУК), активни пожари има: во Општина Василево, Радовиш и Берово – с. Нивичино, планината Голем Готен и Малешевските планини (нискостеблеста шума, смрека, грмушки, ниска вегетација); Општина Прилеп 1 – с. Бешиште, Бешишки Рид, крак према с. Градешница и границата со Р. Грција (мешана шума); Општина Прилеп 2 – активен кракот кон с. Дрен, проширен кон с. Галиште (Кавадарци), додека делот помеѓу Царевиќ и Смолани е под контрола (мешана шума и ниска вегетација); Општина Македонски Брод – помеѓу с. Црешево, Локвица и Крапа (деградирана дабова шума, грмушки, ниска вегетација); Општина Желино – меѓу с. Церово и Групчин (нискостеблеста и деградирана шума); Општина Струмица – с. Баница и нас. Софилар (висока трева); Општина Петровец – с. Средно Коњаре, кај реката Пчиња (ниска вегетација и ниска шума); Општина Крива Паланка – с. Нерав (висока борова шума); Општина Старо Нагоричане и Куманово – с. Облавце кон с. Бењаковце (ниска вегетација); Општина Старо Нагоричане 2 – с. Руѓинце (ниска вегетација); Општина Куманово – нас. Бедиње (ниска вегетација); Општина Гази Баба – с. Трубарево (ниска вегетација); Општина Зелениково – с. Гумалево (ниска и мешана вегетација); и Општина Василево 2 – с. Сушево (ниска вегетација).
Под контрола се ставени пожарите во Македонски Брод 1 – с. Грешница (мешана шума и сува трева); Македонски Брод 2 – с. Латово (ниска вегетација и деградирана шума); Карбинци – с. Јунузлија (шума); и Штип – помеѓу с. Драгоево и Селце (нискостеблеста шума, прнар и сува трева);.
Изгаснати се пожарите во Струмица – м.в. Три Води (ниска вегетација и мешана шума); Василево – с. Василево (ниска вегетација); Струга – с. Калишта (ниска вегетација и ѓубриште); и Шуто Оризари – ул. Брсјачка Буна (дива депонија).
Македонија
Родителите на загинатите деца во „Пулс“ прашуваат до каде е постапката за полициските службеници за пожарот

Родителите на загинатите деца во пожарот во кочанската дискотека „Пулс“ на денешниот 16. Марш на ангелите пред зградата на Полициската станица во Кочани побараа одговор од ОЈО ГОК, кое ја води постапка за над 20 те полициски службеници од ОВР Кочани и СВР-Штип, до каде е истрагата за нив и формирање на обвинителен предлог.
-Сакаме да ги прашаме до каде е постапката на ОЈО ГОК или чекат одмори, да си одведат нивните деца на одмор, на вода, а ние на нашите деца врз гробовите да им фрламе вода за да ги освежеме. Блазе си им, нека им служи на чест, оти развлекуваат само, вели мајка на загинато момче.
На денешниот Марш на ангелите главната порака им беше „Слушнето го гласот на оние што повеќе не можат да зборуваат“. Родителите и семејствата на загинатите деца што учествуваа на протестниот марш се револтирани што нивниот настан денеска имаше убедливо најслаб одѕив. Револтирано им се „заблагодарија“ на поддршката на граѓаните и семејствата кои имаат настрадано деца, а денеска не учествуваа на маршот кој почна во 18.05 часот од Паркот на револуцијата, а заврши пред зградата на Судот и Обвинителството во Кочани.
Една од мајките пред зградата на Општина Кочани истакна дека на денешен ден се случи катастрофалниот земјотрес во Скопје, кој однесе голем број на човечки животи и направи материјални штета. Посочи дека на денешниот Марш на ангелите им одаваат почит на загинатите во земјотресот во Скопје во 1963 година, но истовреме се сеќаваат и на оние кои помогнале да се обнови градот Скопје.
Македонија
МВР во Охрид покажа вежба на спасување на вода и евакуација на патници од опожарен пловен објект

Со показна вежба на спасување на вода и евакуација на патници од опожарен пловен објект, како и со презентација на дел од опремата, возилата и другите материјално технички средства што ги користат полициските службеници при извршувањето на секојдневните задачи, попладнево во Охрид беше реализирана активноста на МВР насловена „До Вас, за Вас“.
Активноста е осмислена со цел приближување на полицијата до граѓаните, во рамки на концептот „Комјунити полисинг- Работа во заедницата“, подигнување на јавната свест за зголемена јавната безбедност во заедницата, спроведување едукативни и интерактивни активности со граѓаните поврзани со превенција и сузбивање на разните форми на криминал…
Министерот за внатрешни работи, Панче Тошковски, кој ги следеше активностите истакна дека со полициските службеници од повеќе оддели во рамки на МВР се презентираат активностите што ги преземаат, средствата што ги користи службата, начинот на спроведување на полициските активности и сите дејствија што се преземаат во рамки на редовното полициско работење.
– Еден од поводите за посетата на Охрид денеска е и заедничката соработка што ја имаме со српските полициски службеници во Охрид. Имаме четворица колеги од Србија кои во летниот период се заедно со нашите полицајци патролираат, си помагаат во рамки на сите дејствија што треба да бидат преземени, а се во делот на српските туристи. Ова е една убава прилика да поразговараме со нив за тоа како ги обавуваат нивните службени задачи тука, рече Тошковски.
Тој уште додаде дека македонската полиција е тука за граѓаните, да им обезбеди мирен престој во туристичките центри.
– Безбедносната сеостојба во Охрид е стабилна, а туристите можат да уживаат во преубавите туристички центри…Во рамки на летната сезона СВР – Охрид е потпомогната со полициски службеници од други центри. Така што и оваа година ќе бидеме подготвени да ги преземени сите дејствија и да одговориме на сите предизвици, рече тој.