Македонија
Стефанова: Јанева се однесуваше како да е адвокат на Панделески

Обвинителката Лиле Стефанова на денешното сведочење за случајот „Рекет” рече дека ексшефицата на СЈО Катица Јанева телефонски и се заканувала дека ќе ѝ прати дома новинари и ѝ забранувала да ги коментира снимките објавени во италијанскиот весник „Ла верита”.
„Последно нешто што направи е ургенцијата да му се одмрзне имотот на Панделески. Се однесуваше како да е негов адвокат!”, рече таа, додавајќи дека по тоа Јанева дала оставка и оттогаш се немаат сретнато.
„Еднаш ми се јави и рече дека треба да ги закопаме секирите, да ја смириме топката, но тогаш веќе сè беше завршено”, рече Стефанова.
Таа вели дека Јанева секогаш повеќе ургирала за Панделески отколку за Камчев.
„Бојан Јовановски не го познавам лично. Ми кажуваа само дека си доаѓа во СЈО, дека автомобилот си го паркира на нашиот паркинг, дека не му се врши претрес на влезот, но тоа само го слушав од други”, рече таа.
Во моментов почнува вкрстеното испитување на обвинителката Лиле Стефанова како сведок за случајот „Рекет”.
Најголемо изненадување во судницата настана кога адвокатот на Бојан Јовановски, Сашо Дуковски, ја праша Стефанова кои биле емисарите преку кои ургирал Камчев и која судијка била меѓу нив.
На ова, Стефанова одговори дека судијката Добрила Кацарска била присутна од рано утрото до доцна вечерта кога се одлучувало за притворот на бизнисменот Камчев, иако не била судија на претходна постапка во предметот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ oбвинува за дискриминација на Албанците во Царинската управа

Демократската унија за интеграција вели дека 26 службеници во Царинската управа од македонска етничка припадност биле унапрдени, без ниту еден Албанец.
Од ДУИ обвинуваат дека се води систематската политика на етничко исклучување, која директно го поткопува соживотот и меѓуетничката рамнотежа во државата.
Повикаа на итна реакција од Владата и одговорност од оние кои, како што велат, со своето молчење или учество овозможуваат враќање кон дискриминаторски практики.
Македонија
Таравари го разреши Арбен Фетаи и уште неколку членови на претседателството на Алијансата за Албанците

Крилото на Арбен Таравари во Алијансата за Албанците, го разреши Арбен Фетаи од функцијата претседател на партиското собрание.
Таравари изјави дека се исклучени и некои членови на Претседателството кои јавно се изјаснуваат против Алијансата за Албанците. Се работи за 8 од 46 членови. За Мимоза Муса, Таравари рече дека не е донесена одлука оти не е јасно дефинирано дали останува со Алијансата за Албанците, или со Влен.
Тој рече дека ќе соработуват и со ДУИ, и со ВЛЕН на локалните избори за да им помогнат на Албанците, говорејќи дека нема функција, нема име или позиција што има вредност како една чесна структура која излегува пред граѓаните со чисто лице.
Состанокот и разрешувањето се случуваат во период кога повеќе високи партиски функционери се спротивставија на одлуката на Таравари да ги напушти Владата и коалицијата. За нов претседател на собранието на Алијансата е избран Назим Таипи.
Фетаи за денес во 14 часот најави прес-конференција.
Македонија
Дожд викендов во целата држава, најмногу во Крива Паланка, Виница и Струмица

Низ цела Македонија, викендов има врнежи од дожд, а во изминатите 24 часа, најмногу дожд 20 литри на метар квадратен се забележани во Крива Паланка, Виница и Струмица.
Според информацијата на УХМР, 16 литри на метар квадратен дожд паднале во Штип и Кавадарци, 14 во Битола и Берово, 13 во Тетово, Прилеп, Крушево, Попова Шапка, 11 Тополчани, 10 Скопје-Петровец, Куманово, 9 во Претор, 8 – Демир Капија, 7 во Скопје-Зајчев Рид, 6 Велес, 5 Охрид, Гевгелија, Лазарополе, 4 Маврови Анови.
Времето во текот на денот ќе биде променливо облачно и свежо со повремени врнежи од дожд, пообилни во југоисточните делови (над 25 литри на метар квадратен). До крајот на денот врнежите ќе престанат. Ќе дува умерен до засилен северен ветер (наместа над 70 километри на лас), особено долж Повардарието.
Дневната температура ќе биде во интервал од 11 до 17 степени.
Во Скопје, променливо облачно и свежо, претпладне со повремен дожд. Ќе дува умерен, во делови од котлината повремено засилен северен ветер. Дневната температура ќе достигне до 16 степени.