Македонија
Стефковски промовира итно копче за бесплатна помош на болни лица во Гази Баба
Градоначалникот на општина Гази Баба Бобан Стефковски заедно со тим од Црвениот крст на Град Скопје беше во посета на Ленче Џингова од Ченто која е корисник на услугата Итно копче која ја спроведува Црвениот крст на Град Скопје со цел помош на болни и изнемоштени лица над 65 години кои живеат сами.
Денес општина Гази Баба во соработка со Црвениот крст на Градот Скопје отпочнува со реализација на заедничкиот проект Итно копче.
„Со овој проект овозможуваме 24 часовна помош за лица над 65 годишна возраст кои живеат сами и се болни и изнемоштени. Заедно со тим од Црвениот крст ја посетивме тетка Ленче од Ченто која ја користи услугата Итно копче. – изјави Стефковски при посетата.
Црвениот крст на Град Скопје оваа услуга ја реализира со поддршка на општина Гази Баба која ги обезбедува финансиските средства за граѓаните да можат услугата да ја користат бесплатно.
Корисникот на оваа услуга ќе го поседува уредот Итно копче и со неговото притискање веднаш ќе биде контактиран од контакт центарот на Црвениот крст и по утврдена потреба се испраќа тим за прва помош во домот на корисникот.
Оваа услуга од Црвениот крст за корисниците од општина Гази Баба ќе биде бесплатна. Финансиските средства за нејзината реализација целосно ги обезбедува општината.
„Договорот за реализација на овој проект со Црвениот крст го склучивме во јули и веќе 8 граѓани ја користат оваа услуга. Со реализација на овој проект, како одговорна локална самоуправа уште еднаш на дело ја покажуваме својата грижа кон ранливите категории на граѓани. – заклучи градоначалникот Стефковски.
Ленче Џингова која е корисник на услугата ја искажа својата благодарност за професионалниот пристап на тимовите на Црвениот крст на Град Скопје кон неа како корисник на услугата.
Најголема благодарност до градоначалникот Бобан Стефковски кој како млад човек има високо развиена свест за помош и поддршка кон сите категории на граѓани во општината без разлика на нивната возраст. Ова е услуга која е од големо значење за нас кои живееме сами и сме соочени со повеќе болести, но истата без финансиската поддршка од општината ние сами како граѓани неможеме никогаш да ја имаме – истакна Ленче Џингова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВЛЕН: Изборите беа локални, но поразите на НАИ се национални
Очајните обиди на поразената НАИ да ги преведе изборите од 19 октомври во „мандати за пратеници“ се доказ дека оваа коалиција не само што изгубила гласови, туку и контакт со реалноста, велат од „Влен“.
„Ова беа локални избори. И токму тука Албанците проговорија појасно од кога било, тие избраа промени, тие избраа ВЛЕН. Во повеќе од десет општини, Албанците ја дадоа својата доверба во нова енергија, во лица кои работат, а не во оние кои се кријат зад лажен патриотизам кога немаат што да му понудат на народот. Тие избраа политика на резултати, а не политика на страв.
Дури ни телевизиските толкувања на превртените бројки не можат да го променат фактот дека сега е неоспорно дека ВЛЕН ја покрива целата политичка карта на Албанците. И ова е единствената карта што се брои, онаа на слободната волја на граѓаните.
Изјавите на Арбер Адеми, Блерант Рамадани, Кренар Љога и некои други, кои смислуваат имагинарни графикони за „идни пратеници“ што никогаш нема да ги видиме, се доказ за паниката што ја зафати селотејп коалицијата. Тие сè уште не ја разбрале пораката на народот дека е време за реформи, а не за измислување бајки за да ги држат будни милитантите.
Четири дена по ред, нивниот „неоспорен“ лидер, Али Ахмети, не се појави никаде. Можеби сè уште чека да му бидат прикажани резултатите од „референдумот“.
Им посакуваме на Арбер Адеми, Блерант Рамадани и Кренар Љога почести јавни настапи. Секој пат кога ќе проговорат, НАИ губи илјада гласови. И ние, искрено, немаме ништо против тоа“, се додава во соопптението.
Македонија
Минчев со честитка за празникот: Ја продолжуваме борбата за општество какво што го замислувале нашите предци
Министерот за јавна администрација, Горан Минчев, упати честитка по повод 23 Октомври – Денот на македонската револуционерна борба.
„На денешен ден оддаваме почит на визијата и пожртвуваноста на македонските револуционери кои со својата борба ги поставија темелите на нашата државност и стремежот за слобода, правда и еднаквост.
Храброста и идеалите на борците од Илинденската и народноослободителната традиција остануваат втемелени во нашето колективно сеќавање и не водат во напорите за градење на современа, демократска и праведна држава.
Како министер за јавна администрација, силно верувам дека токму преку отчетност, професионализам и служба на граѓаните, ја продолжуваме борбата за подобро општество, општество какво што го замислувале нашите предци.
Да го одбележиме овој ден со чувство на единство и одговорност кон иднината.
Честит Ден на македонската револуционерна борба!“, се вели во честитката.
Македонија
Арсовска: Советот на градот и управниот одбор се одговорни за состојбата во Комунална
Градоначалничката Данела Арсовска во објава на социјалните мрежи утрово пишува дека одговорноста за состојбата во ЈП „Комунална хигиена“ – Скопје е во рацете на Советот на градот и управниот одбор, кои, како што наведува, се составени од кадри на ВМРО-ДПМНЕ и ВЛЕН.
„Ако не ви е јасно дека кадрите на Мицковски се одговорни за ѓубрето низ Скопје, ќе се обидам да ви појаснам уште еднаш,“ напиша Арсовска на социјалните мрежи.
Таа наведе дека според законот, ЈП „Комунална хигиена“ – Скопје го основа Советот на Град Скопје, кој одлучува за сите согласности и оперативни планови. Управниот одбор, кој управува со претпријатието, е составен од членови на ВМРО-ДПМНЕ и ВЛЕН, а неговата претседателка – како што посочува Арсовска – е „осудена за две кривични дела и наградена со советничко место во општина Бутел“.
Во објавата се наведува и дека Советот не презел мерки за да обезбеди нормално работење на претпријатието, ниту пак ги разрешил управниот и надзорниот одбор, иако, според Арсовска, тоа е законска обврска.
„Функционирањето на секој директор зависи од одлуките на управниот одбор на ВМРО/ВЛЕН и тој може единствено да спроведува тоа што тие ќе изгласаат. Кој и да е поставен, е блокиран и зависен од нивните одлуки,“ појасни Арсовска.
Во завршницата на соопштението се наведува дека Советот на градот не презел ниту една законска мерка за подобрување на состојбата, а дека целата одговорност за натрупаното ѓубре низ Скопје, според Градот, лежи кај кадрите на ВМРО-ДПМНЕ и ВЛЕН.

