„Во услови кога се соочуваме со најголемата светска здравствена криза, студентите на медицина, иднината на нашето здравство, активно се вклучуваат во поддршка на своите колеги. Студентите се едногласни дека сакаат и можат да помогнат во периодот што следува. Нивниот ангажман ќе биде помош на колегите епидемиолози во телефонска комуниција со пациентите, изработка на епидемиолошки анкети и обработка на податоците“, истакнува министерот Филипче по средбата и додава дека тие нема да имаат физички контакт со пациенти заболени или суспектни на Ковид-19.

Ангажманот на студентите ќе трае шест месеци и ќе биде поделен во три фази. На секои два месеца по 50 нови студенти ќе бидат ангажирани во центрите за јавно здравје.

„Вклучувањето на студентите на медицина во борбата против Ковид-19 е директна помош на здравствените работници и здравствениот систем, кои го носат најголемиот товар во оваа криза. Дополнителна придобивка е што студентите, освен што ќе стекнат искуство, преку овој ангажман ќе ја реализираат клиничката пракса по јавно здравје, која ја извршуваат во шестата година од студиите и таа ќе им биде признаена“, потенцира проф. д-р Соња Топузовска, деканка на Медицинскиот факултет во Скопје.

Координацијата и распределбата на групите е во тек, ангажманот на студентите ќе почне во најкус можен рок.