Скопскиот Кривичен суд реагира кога попладнево на протест се бараше нова пресуда за сообраќајната несреќа кај „Сити мол“, во која животот го загуби 24-годишната Викторија Николова.

Од судот велат дека тие во целост ги почитуваат уставно загарaнтираното право на секој граѓанин за протест и волјата да го искаже своето незадоволсвто. Сепак, како што додаваат, јавноста мора да знае дека во конкретниот случај судот изрекол првостепена пресуда, која сѐ уште не е правосилна и која ќе подлежи на проверка од повисоките судови во жалбена постапка.

Судот при одмерувањето на казната се водел исклучиво од постојните законски одредби што ги регулираат овие кривични дела, сите отежителни околности поврзани со загубата на млад живот, зачестеноста на конкретните кривични дела, како и репресивното и превентивното влијание на пресудата. Но, воедно, судот бил должен да ги земе предвид и олеснителните оконости дека се работи за признание на вина од страна на обвинетиот, неговата возраст и околностите под кои е сторено делото, односно колку било прекорачена дозволената брзина на возење и фактот дека обвинетиот во моментот не бил под дејство на алкохол или опијати.

„Поради тоа, конкретната пресуда не може да се компарира со други, веќе правосилни пресуди, каде што се изречени условни казни или казни над 7 години“, велат од судот преку допис до медиумите.

Понатаму, се додава дека ниту еден загубен човечки живот не може да биде надомесетен со каква било судска пресуда, па заради тоа, и судот изразува сочуство до семјеството.

„Судот е должен да се води од законските ограничувања за одмерување на казната. Поради тоа, ги повикуваме странките, кои се незадоволни од постапката, да го искористат своето право на жалба пред вторстепениот суд, каде што ќе ги изјават своите гледишта и барања поврзани со пресудата“, се додава во соопштението.