Македонија
СЈО ги гони ВМРО-ДПМНЕ и Груевски за рекет и незаконско градење на Белата Палата

За првпат, ВМРО-ДПМНЕ како партија станува дел од обвиненијата на СЈО. Случајот „Талир“ кој ја отвори Пандорината кутија за тоа како црни пари влегувале во ВМРО-ДПМНЕ, а потоа со истите бил купуван имот, влегува во судска процедура.
Никола Груевски како поранешен лидер на партијата, а сега азилант во Унгарија, е обвинет за незаконско финансирањето на партијата, но и за изградбата на Белата Палата и за него се бара притвор. И ВМРО-ДПМНЕ како правно лице е дел од обвинението, нешто што досега не беше случај во постапките на обвинителството, кога се гонеа само претставници на партијата.
За случајот „Талир“ поднесени се две обвиненија – првото е за начинот на кој е изградено седиштето на ВМРО-ДПМНЕ, а второто за начинот на финансирањето на партијата, каде што се слевале пари од рекет од фирми кои добивале државни тендери.
За изградбата на Белата Палата обвинети се Никола Груевски и Кирил Божиновски, а за финансирањето на партијата освен Груевски и Божиновски, обвинети се и Миле Јанакиески, Илија Димовски, Елизабета Чингароска и Леко Ристоски.
За овој случај, СЈО презело стар предмет од Основното јавно обвинителство, па затоа има и законско право да поднесе обвинение за случајот, со оглед на тоа што рокот од 18 месеци течел од моментот кога е преземен предметот од ОЈО.
За случајот „Талир“, „Макфакс“ веќе објави истражување со сите детали околу имотот на ВМРО-ДПМНЕ, кој сега е замрзнат како привремена мерка за обезбедување.
Рекетирани биле фирми кои добивале државни тендери
Во првото обвинение, на Груевски му се става на товар дека во периодот од 2009 година до 2015 година со злоупотреба на службената положба, спротивно на Законот за финансирање на политички партии и Законот за спречување на корупција, обезбедувал пари од анонимни и противправни извори на финансирање за ВМРО-ДПМНЕ.
Според обвинението, тој бил помогнат од Кирил Божиновски и Миле Јанакиески кои вршеле притисок на фирми со кои имале склучено договори за јавни набавки со државни органи, јавни претпријатија или единици на локална самоуправа истите да обезбедат пари во кеш за потребите на финансирање на политичката партија како противуслуга за добиените јавни набавки.
Вака обезбедените пари во кеш, Груевски не ги вратил на лицата од кои средствата доаѓале, односно не ги упатил во Буџетот како што имал обврска да стори според Законот за финансирање на политички партии, со што, според СЈО, прибавил незаконски средства за финансирање на партијата во износ од најмалку 4,6 милиони евра.
„Со цел да се прикрие дека ваквите средства потекнувале од кривично дело, обвинетите Никола Груевски и Кирил Божиновски, а во периодот од 2011 до 2015 година и обвинетите Миле Јанакиески и Елизабета Чингаровска, организирале средствата да бидат уплатени на жиро сметката на политичката партија ВМРО-ДПМНЕ преку готовински уплати на ПП10 уплатници во кои биле внесени невистинити податоци дека уплатата ја вршат лицата наведени во уплатниците, иако тоа не било случај“, стои во соопштението на СЈО.
Отакако паричните средства кои потекнувале од кривично дело биле внесени на жиро сметката на политичката партија ВМРО-ДПМНЕ, според СЈО, обвинетите Илија Димовски, Елизабета Чингаровска, Леко Ристоски и Миле Јанакиески, како овластени потписници на сметката на партијата, иако знаеле дека парите потекнуваат од кривично дело, ги пуштале во натамошен оптек со потпишување на налози за плаќање на обврските и купување на недвижен имот за политичката партија ВМРО-ДПМНЕ.
Кон обвинението поднесен е предлог за определување мерки за претпазливост спрема Чингароска – обврска да се јавува еднаш неделно во Кривичниот суд, а привремено ѝ е одземен и пасошот.
„Бетон“ додека добивал тендери, го градел седиштето на ВМРО-ДПМНЕ за 7 милиони евра
Обвинението за изградба на седиштето на политичката партија ВМРО-ДПМНЕ е поднесено против Груевски и Божиновски, кои, според СЈО, со злоупотреба на службената положба, овозможиле фирмата ДГ Бетон АД Скопје да го изгради седиштето на партијата, иако „Бетон“ во времето на обезбедување на услугата имала склучено договори за јавни набавки со државни органи и јавни установи или претпријатија спротивно на Законот за политички партии, Законот за финансирање на политички партии и Законот за облигациони односи.
„За реализирање на оваа цел обвинетите ја искористиле состојбата на зависност во која се наоѓало правното лице ДГ Бетон АД Скопје во однос на политичката партија, со оглед дека над 75% од приходите кои ги остварило правното лице во 2011 и 2012 година биле од државни органи, единици на локална самоуправа или јавни претпријатија раководени од функционери на политичката партија ВМРО-ДПМНЕ“, се вели во соопштението.
И покрај тоа што за правното лице ДГ Бетон АД Скопје важеле ограничувањата од Законот за финансирање на политички партии, сепак обвинетите договориле несразмерна корист за политичката партија ВМРО-ДПМНЕ во однос на обврските кои ги имало правното лице ДГ Бетон АД Скопје, овозможувајќи му да го изгради седиштето на политичката партија ВМРО-ДПМНЕ кое имало инвестициска вредност од речиси 7 милиони евра, како и да уплати на жиро сметката на партијата над 2 милиони евра, иако вложувањата на политичката партија ВМРО-ДПМНЕ изнесувале само 815.323 евра.
„На ваков начин, а спротивно на законските прописи, обвинетите прибавиле значителна имотна корист за политичката партија ВМРО-ДПМНЕ во износ од 8.246.576 евра“, се вели во соопштението на СЈО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Арсовска: Мицковски несреќо, на кого се закануваш, за ѓубрето низ Скопје се одговорни твоите градоначалници

„Мицковски несреќо, на кого се закануваш, објави на социјалните мрежи градоначалничката нa град Скопје во заминување, Данела Арсовска, откако Владата на седница донела заклучоци со кои се задолжуваат МВР и останатите надлежни институции веднаш да извршат вонреден надзор врз работењето на Град Скопје и ЈП Комунална хигиена за отпадот во градот.
„Те велича Орце Самка Ѓорѓиевски дека си господ и си почнал да веруваш дека си семоќен? Политички прогон сакаш да правиш несреќо.
За ѓубрето низ Скопје е одговорна твојата криминална структура во Комунална хигиена на чело со Јулијана Спировска која е претседател на Управниот одбор (земи читај допис ако имаш време меѓу заканите и правење бизнис)“, му порачува Арсовска на Мицкоски
За ѓубрето низ Скопје, како што вели, се одговорни неговите градоначалници кои сред избори додава Арсовска, повикале граѓаните да фрлаат кабаст отпад.
„А немаат ни ресурси ни механизација да го собираат истото, па тоа ѓубре се мачат да го собираат вработените од КХС кои веќе се на крај на силите.
За ѓубрето низ Скопје е одговорно твоето министерство за здравство, кое милиони му должи на Комунална хигиена. Нив ќе им влезеш ли со полиција несреќо?
По корумпирана и по плитка власт од твојава не постоела, ни ќе постои некогаш во Македонија. Уствари заборавив Северна, бидејќи и името дека ќе го вратиш лажеѓе, како и за сѐ друго што лажеш денес“.
Македонија
Николоски, Кочоска Димитриеска и Муцунски во Лондон: Македонија е на пат да реализира инфраструкутрни проекти во делот на железничкиот, патниот транспорт и здравството

Стабилни економски и политички односи, високо ниво на трговска соработка меѓу Македонија и Велика Британија и силен партнер во релизацијата на стартешките цели на земјата. Ова беше констатирано на средбата помеѓу потпретседателот на Владата и минстер за транспорт Александар Николоски и државниот министер во Одделот за бизнис и трговија во Владата на Обединетето Кралство, Сер Крис Брајан, која денеска се одржа во Лондон.
Македонија е на пат да реализира огромни инфраструкутрни проекти во делот на железничкиот и патниот транспорт и инфраструктура и здравството и тоа со огромна подршка на Владата на Велика Британија преку Договорот за соработка, истакна на средбата потпретседателот Николоски.
Како што е истакнато, токму инвестициите и пренесување на нови искуства и знаења кои произлегуваат во Договорот за соработка, ќе ги доближат двете земји до воспоставување на стратешки партнерства и реализација на регионални инфраструктурни проекти.
Ваквата соработка е ново поглавје за стратешкото инвестициско партнерство меѓу Македоннија и Велика Британија, потенцираше вицепремиерот Николоски. Тој ги потврди силните заложби и активности што ги презема Владата за економски развој на државата како и за регионалното поврзување и соработка.
Обединетото Кралство, како што е соопштено, е силен подржувач на земјите од Западен Балкан меѓу кои и Македонија и како резултат на таквата соработка, инвестициите од Обединетото Кралство имаат силен импакт во растот на македонската економија, исткана потпретседателот Николоски.
На средбата се разговараше за новите текови во економските односи меѓу двете земји со посебен фокус на проектите кои ќе се реализираат согласно Договорот за соработка како и подршката што ќе ја овозможи Велика Британија во реализација на истите.
Министрите се дел од владината делегација која ја предводи премиерот Христијан Мицкоски, која присуствува на Самитот за Западен Балкан- Берлински процес, кој се одржува во Лондон.
Владината делегација денеска и во текот на утрешниот ден ќе оствари повеќе економски и политички средби со високи владини преставници на Обединтетото Кралство.
Македонија
OJO со детали за пироманот од Скопје: носел бензин во шише, го полеал возилото и го запалил

Основното јавно обвинителство Скопје поведе постапка и предложи мерка притвор против едно лице осомничено за кривично дело – Предизвикување општа оапсност по член 288 став 1 од Кривичниот законик.
Осомничениот, на 16 октомври, на улицата „Народни херои“ во Скопје, со бензин предизвикал пожар на паркиран автомобил во сопственост на друго лице. Бензинот го носел во пластично шише, го полеал автомобилот и го запалил, а со тоа предизвикал значителна опасност за животот и телото на луѓето.
„Бидејќи постои опасност од бегство, но и веројатност осомничениот да го повтори кривичното дело, јавниот обвинител од судијата на претходна постапка побара да биде определена мерка притвор“.