Македонија
ТАВ Аеродроми и Владата го пречекаа првиот лет на Туркиш ерлајнс од Истанбул на охридскиот аеродром

ТАВ Македонија, подружница на ТАВ Аеродроми, попладнево го пречека првиот лет на Туркиш ерлајнс од Истанбул на Аеродромот Свети Апостол Павле Охрид, со што го означи отворањето на оваа нова авиолинија која ќе ги поврзува двата града четири пати неделно.
Првиот авион на турската национална авиокомпанија од Истанбул во Охрид слета во 14:40 часот.
ТАВ Македонија ги пречека патниците со симболични подароци со ајвар и охридско макало, како и разгледници од знаменитостите на Охрид.
Главниот извршен директор на ТАВ Аеродроми, Серкан Каптан, генералниот директор на ТАВ Македонија, Неџат Курт, вицепремирот и министер за транспорт Александар Николоски, како и амбасадорот на Турција, Фатих Улусој, го поздравија главниот извршен директор на Туркиш ерлајнс, Билал Екши со кого заедно ја пресекоа лентата означувајќи го почетокот на оваа авиолинија.
„Како ТАВ Аеродроми, аеродромскиот оператор на аеродромите во Скопје и Охрид, пресреќни сме што го пречекавме првиот лет на Туркиш Ерлајнс меѓу Истанбул и Охрид, означувајќи ново поглавје во зајакнувањето на поврзаноста меѓу нашите земји. Охрид, светско наследство на УНЕСКО, е една од најдобрите туристички дестинации на Балканот, а оваа нова авиолинија ќе ја направи уште попристапна. Со оглед на тоа што славиме 15-годишнината на ТАВ Аеродроми и инвестициите во Македонија, горди сме на соработката со Туркиш ерлајнс и владата за промовирање на богатото културно наследство на земјата во светот.“ – изјави Серкан Каптан, главен извршен директор на ТАВ Аеродроми.
Туркиш ерлајнс ќе лета на оваа рута секој понеделник, четврток, петок и недела, со авион од типот Ербас А320, со капацитет од 182 седишта, обезбедувајќи им на патниците удобни опции за патување и услуга од светска класа.
„Го поддржуваме унапредувањето и развојот на Македонија во соработка со владата и воздухопловните власти. Би сакал уште еднаш да им се заблагодарам на премиерот и на министерот за транспорт за нивниот придонес во развојот на воздухопловниот сектор.“ – додаде Серкан Каптан, главен извршен директор на ТАВ Аеродроми.
Оваа нова историска авиолинија Истанбул – Охрид – Истанбул, ќе ја зајакне и подобри врската меѓу Истанбул, еден од најважните воздухопловни центри во светот, и Охрид, град на наследство на УНЕСКО, познат по својата богата историја, културно значење и неверојатна природна убавина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без дозвола реконструиран, со употреба на несоодветни материјали: дискотеката во Кочани не ги исполнувала ниту минималните услови за угостителска дејност

Вчера се приведени 13 лица инволвирани во трагедијата во Кочани, потсети денеска на прес-конференција јавниот обвинител Љупчо Коцевски.
Тој извести и дека денеска до Основниот суд во Кочани е поднесено обвинение против 34 физички и три правни лица за кривични дела поврзани со пожарот во дискотеката „Пулс“ во Кочани.
„Денеска до Основен суд во Кочани се поднесува обвинителен акт против 34 физички и три правни лица за кривични дела со кои предизвикале значителна опасност за животот и телото на луѓето и за имотот од поголеми размери, на место на кое се собрале поголем број на луѓе, односно за пожарот при настапот на музичката група ДНК на 16 март, каде што животот го загубија 62 лица, 157 се здобиле со тешки повреди и 54 лица со повреди“, изјави Коцевски.
За полицајците се бараат мерки за обезбедување на присуство, бидејќи при акциската контрола дозволиле употреба на пиротехника.
Јавниот обвинител предложи спрема осомничените да се определат соодветни мерки за забрана за напуштање на живеалиштето и да се јавуваат кај институциите за спроведување на законот, одземање на патните исправи и слично.
Обвинетите делото го сториле со свесно постапување рече обвинителот, и дејствувале спротивно на прописите за заштита.
Палењето на пиротехниката не било пријавено во полицијата.
Тој рече дека тие се гонат за тешки дела против општата сигурност.
Во деталите за случајот Коцевски кажа дека објектот не ги исполнувал ниту минималните услови за угостителска дејност.
За објектот, меѓу другото, немало основен проект за реконструкција со пренамена со соодветна статика и сеизмика, електротехнички и термички елаборати како и елаборат за заштита од пожари.
Не донеле и изработиле план за заштита и спасување.
Наспроти ова, првообвинетиот, сопственикот на објектот, преземал градежни дејствија и реконструиал и вградувал несоодветни материјали кои носата ризик од предизвикување на пожар, објасни Коцевски.
Во објектот не бил испочитуван ниту еден пропис во однос на квалитетот на вградените материјали, носивоста и стабилноста на конструктивните материјали, излезот, и влезот, паркингот, средства за ганење на пожари.
Обвинет е и братот на сопственикот на објектот кој продавал влезници, за поголем број на посетители од дозволеното и дозволувал влез на лица помлади од 18 години иако бил свесен за незаконските дејствија, појасни Коцевски како дел од деталите.
Тој потенцира дека во дискотеката никогаш не бил спроведен инспекциски надзор.
Оцени дека секоја од алките во случајот со трагедијата во Кочани имала моќ да го спречи трагичниот настан но никој не го сторил тоа.
Македонија
Се одложи судењето за убиството на бездомното куче Феликс, активистите в недела излегуваат на протест

Се одложи судското рочиште за свирепото убиство на бездомното куче Феликс. Поради тоа, актвистите за заштита на правата на животните повикаа на мирен протестен марш, што ќе се одржи на 15 јуни (недела), со почеток во 12:00 часот, пред Министерството за внатрешни работи.
„Судот немаше друг избор, почитувајќи го начелото на правичност, освен да ја одложи главната расправа поради наводни здравствени причини на бранителот на обвинетиот, токму во момент кога требаше да се произнесе одбраната. Случајност или сепак не?“, велат од граѓанската иницијатива ЗЕЛЕН ХУМАН ГРАД, кое е организаторт на протестот.
„Вчера требаше да сведочи Злате Димески — предложен од одбраната и присутен на самото место на убиството. Злате Димески го донесе стапот со кој беше убиен Феликс и на видеоснимките се гледа како немо набљудува со рацете зад грб додека Феликс беше немилосрдно претепуван и за жал подоцна им подлегна на повредите“, се наведува во соопштението.
Давањето можност убиецот да го брани лице кое со право може да се смета за соучесник — нем набљудувач кој не само што во ниту еден момент не се обиде да го спречи насилството врз недолжно животно туку и е истиот тој што го обезбеди оружјето за извршување на убиството, според Зелен хуман град, претставува дополнителна неправда и болно извртување на правото на фер судење.
„До кога ќе ја чекаме правдата за Феликс, имајќи ги предвид сите одложувања, годишни одмори, судска ферија? Ќе ја добиеме ли воопшто?“, прашуваат од Здружението.
На протестот ќе побараат итно расчистување на случајот и максимална затворска казна за сторителот Љубе Крстевски како и за неговиот соучесник Бранко Билбиловски, воведување минимум од 1 година задолжителна затворска казна за кривичното дело убиство и мачење животни од Кривичниот законик, формирање локални (општински служби за заштита на животните), донесување закон за Комунална полиција (со полиција за животни), превентивни мерки за редуцирање на насилството врз животните и системска едукација.
Македонија
(Видео) МВР предаде обемна документација за истрагата за Кочани и никој не е поштеден, вели Петрушевски

Пукна балонот на лаги и манипулации на СДС во врска со истрагата за несреќата во Кочани. Сите може да видат дека институциите постапуваат професионално и неселективно, изјави Бране Петрушевски, пратеник на ВМРО-ДПМНЕ.
„Потенцираме дека МВР и институциите на системот ги доставиле сите потребни докази и информации за несреќата во Кочани до јавното обвинителство уште пред еден месец. Сите преземени акции од ЈО до сега, сега и од сега, се исклучиво врз основа на доказите кои ги обезбедиле МВР. МВР предаде обемна документација во ЈО, и никој не е поштеден“, рече тој.
Петрушевски вели дека задача на јавното обвинителство е сега врз основа на обемната документација за случајот која им е предадена да ја лоцираат вината и да подигнат обвиненија за секој еден за кој сметаат дека според правната логика е на било кој начин виновен за пожарот и смртта на децата во Кочани.
„Ниту еден полицаец, функционер, или кој и да е граѓанин кој имал допирна точка со предметот не е изоставен и се е опфатено во документацијата“, рече тој.
Колку е сериозен обемот на документацијата, вели Петрушевски, покажува и фактот дека во овој случај се опфатени над 60 лица, од министри, преку МВР, институциите, бизнисмени, градоначалници, секој еден кој можел да има вина.
„А сега да прашаме, колку лица беа опфатени во истрагата за Модуларната болница? Нула. Колку беа во Беса транс и Ласкарци? Нула. Е сега тоа е разликата од МВР сега и од МВР кога СДС беше на власт. Одговорност има за секој, без разлика кој е и од каде е“, рече Петрушевски.