Македонија
Таравари нема да се слика со акцелераторот во „8 Септември“ пред да се пушти во употреба, како што правеа Филипче и Сали

Најмалку шест месеци ќе требаат за да биде ставен во употреба акцелераторот во ГОБ „8 Септември“ за зрачна терапија на онколошките пациенти. Министерот за здравство Арбен Таравари, денес, по посетата на болницата рече дека ќе им требаат најмалку три месеци за да ги направат сите потребни контроли и да утврдат што недостасува и каде треба да се инвестира. За тоа најави дека ќе ангажираат специјалисти.
Не би кажал дека за помалку од шест месеци би можеле да го ставиме во функција акцелераторот. Отсега не промовираме однапред. Пет – шест пати се дојдени различни министри и промовирале дека акцелераторот почнува да се користи. Искрено состојбата таму изгледа добра, кај што е поставен акцелераторот, Ние ќе дојдеме да го промовираме откако ќе бидат зрачени двајца или тројца први пациенти. Тогаш ќе дојдеме, но дајте ни рок од шест месеци да ги направиме сите потребни подготовки за да може да функционира“, рече министерот Таравари.

Димитар Ковачевски заедно со Беким Сали покрај акцелераторот го прослави Денот на независноста во 2022 година и најави дека акцелераторот ќе биде пуштен во употреба до крајот на годината
Акцелераторот го набави поранешниот министер Никола Тодоров во 2015 година за 1,9 милион евра. Во 2016 беше ставен камен – темелник на бункерот за него, а во 2019 година тогашниот министер Венко Филипче се сликаше со акцелераторот за да покаже дека финишира неговото инсталирање, но апаратот никако да биде ставен во функција.

Во 2019 година тогашниот министер Венко Филипче се сликаше со акцелераторот за да покаже дека финишира неговото инсталирање
Пациентите, тргнувајќи од Филипче, слушаа изговори зошто апаратот не е во функција и лажни рокови за негово пуштање во употреба. Покрај апаратот се сликаа и премиери. Последен беше Димитар Ковачевски кој заедно со поранешниот министер Беким Сали покрај акцелераторот го прослави Денот на независноста во 2022 година и најави дека ќе биде пуштен во употреба до крајот на годината. И следната година Ковачевски како премиер Денот на независноста го славеше во истата болница, но со друг министер – Фатмир Меџити и промовираа друга модерна опрема. Меџити пред крајот на мандатот кажа дека ја потпишал потребната документација за акцелераторот, но тој остана непуштен во употреба.
Според најавите на актуелниот министер, Таравари, акцелераторот ќе може да биде пуштен во употреба најрано следната година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Церемонија на свечено менување на државното знаме пред претседателската вила во присуство на основци од Скопје

Ученици од скопските основни училишта „Ѓорѓија Пулевски“, од општина Аеродром, „Св. Климент Охридски“ и „Кирил Пејчиновиќ“ од општина Кисела Вода, денеска го посетија Кабинетот на претседателката Гордана Сиљановска-Давкова.
Придружени од своите наставници, учениците ја проследија свечената церемонија на менување на државното знаме. Оваа церемонија се одржува секој втор петок во месецот и се реализира од Баталјонот за почести при македонската армија како израз на почит кон македонското знаме, како државен симбол.
По завршувањето на свечениот чин, младите посетители ги разгледаа просториите на Кабинетот и разговараа со претседателката за нејзините работни обврски, но и за личниот живот, почнувајќи од детството, школските и студентски денови, како и професорската кариера.
Во разговорот со учениците, претседателката ги охрабри да учат и да веруваат во себе, да го почитуваат знаењето, оти тоа ќе ги направи компетитивни, сигурни и успешни.
Македонија
Авионска дезинсекција против ларви од комарци во Скопје

Согласно добиено известување од Град Скопје- Сектор за комунални работи, Регионалниот центар за управување со кризи -Скопје информира дека на ден 11.05.2025 година (Недела) во раните утрински часови ќе се изврши Авионска дезинсекција против ларви од комарци.
Доколку временските услови не го дозволуваат вршењето на дезинсекцијата, истата ќе се изврши првиот нареден ден, кога временските услови ќе бидат поволни, во ист термин, велат надлежните.
Се известуваат пчеларите навремено да ги превземат потребните мерки за заштита на пчелите.
Македонија
Бискупот Стојанов упати честитки до папата Лав XIV: Вашата служба да донесе обнова и зацврстување на верата

Скопскиот бискуп и Струмичко-скопски епарх, Киро Стојанов упати писмо со честитки до новиот папа Лав XIV.
„Со голема радост и синовска љубов ја примив веста за Вашиот избор за Петров наследник и Пастир на Универзалната Црква. Од името на верниот Божји народ на Католичката Црква во Македонија, свештенството и монаштвото, како и од мое лично име, Ви го честитам изборот и воедно благодарам што ја прифативте оваа одговорна и света служба, свесни за сите предизвици со кои се соочува Христовата Црква.
Сигурен сум дека со мудроста што Ви е дарувана преку Вашето мисионерско искуство, пасторалната грижа и верноста кон Евангелието, водени од Светиот Дух ќе управувате со коработ Петров – Црквата, низ немирното море, за доброто на целиот Божји народ.
Од Македонија, портата од каде што Свети Павле го пренесе христијанството низ цела Европа, од просторите од каде што потекнуваат светите браќа Кирил и Методиј и од родниот град на света Мајка Тереза, Ви ја ветувам мојата лична молитва, како и молитвите на целиот Божји народ во Македонија, со желби Вашата служба да донесе обнова и зацврстување на верата, единство меѓу христијаните и мир во целиот свет“, напиша бискупот Стојанов.