Министерот за надворешни работи и надворешна трговија, Тимчо Муцунски, учествуваше и се обрати на владината донаторска конференција „Ромите и пријателите“, посветена на проекти за подобрување на интеграцијата на Ромите во општеството, со акцент на домувањето, културата и образованието.

„Ми претставува особена чест што денес учествувам на овој значаен настан, чија цел е поддршка на поголема инклузија на Ромите во нашето општество. Како мултиетничко демократско општество, Северна Македонија е целосно посветена на промоција на инклузијата и еднаквоста, со акцент на заштитата на човековите права за сите наши граѓани,“ истакна министерот.

Министерот го потенцираше значењето на Националната стратегија за инклузија на Ромите 2022-2030, која адресира клучни области како образование, вработување, домување, социјална и здравствена заштита. Тој нагласи дека Владата ќе продолжи со напорите за постигнување социјална кохезија и еднаков развој и цврсто ќе стои на ветувањето ,,никој да не биде изоставен”, во согласност со Агендата 2030 на Обединетите нации.

Во своето обраќање, министерот потсети дека нашата држава е лидер во регионот во унапредувањето на правата на Ромите, со долгогодишен придонес во спроведувањето на Декадата на Ромите. „Затоа, апелирам да продолжиме да го градиме нашето општество на принципите на инклузија и еднаквост, создавајќи услови за целосна социјална интеграција и економско зајакнување на ромската заедница,“ заклучи министерот Муцунски.

Владата вонредно расправаше поради недостигот на енергенси за обавување на јавниот сообраќај на територијата на Град Скопје, при што беше констатирана лошата состојба и недостиг на гориво за потребите на Јавното сообраќајно претпријатие.

Се донесе одлука со која се утврдува постоење на кризна состојба во снабдувањето со топлинска енергија на подрачјето на Град Скопје.

Со ова, како што велат од Владата, се овозможува да се позајмат на градот Скопје дел од нафтените резерви на државата.

Денес меѓудругото Бирото за јавни набавки донесе одлука со која се исполнети условите за спроведување на постапка со преговарање без објавување на оглас за да се скрати периодот за набавка на дериватот потребен на градот Скопје.

Со ова Владата го затвора прашањето со настаната потешкотија во работењето на градското претпријатие за јавен сообраќај, соопшти владината прес-служба.

Првата детска амбасада во светот „Меѓаши“ изразува сериозна загриженост поради актуелната ситуација поврзана со ЈСП и редовните автобуски линии.

Според нив, необезбедувањето јавен превоз има огромно негативно влијание врз животот на граѓаните, особено на децата и младите кои зависат од јавниот превоз за да стигнат до училиштата и во образовните институции. Сметаат дека обезбедувањето достапен и сигурен јавен превоз е основно право на секое дете и млад човек, а за да ги обезбедиме тие права, мора да се обезбеди безбедност, редовност и континуитет на транспортните линии.

„Заглавени во политичките пресметки надлежните институции не обезбедуваат соодветна организација на јавниот превоз, што директно ги загрозува основните права на децата, пред сѐ, правото на образование. Без редовни автобуски линии, учениците и студентите се принудени да се соочат со големи тешкотии во секојдневниот превоз, што доведува до пропуштени часови и недостиг на образовни можности. Оваа ситуација е неприфатлива и не смее да се оправдува. Некои случувања во општеството не смее да оправдаат и да следат политички интереси.

Важно е да се нагласи дека граѓан(к)ите не треба да бидат заложници на политичките игри и да страдаат од одлуките што ги засегаат нивните основни потреби и права. Апелираме до сите надлежни институции да преземат итни мерки за воспоставување редовни и сигурни автобуски линии, кои ќе овозможат нормален тек на образованието и секојдневниот живот на децата, како и на граѓаните во целост, без разлика на нивната возраст или политичка припадност“, истакнуваат од „Меѓаши“.

Првата детска амбасада во светот бара итно решение и обезбедување стабилни, редовни и безбедни автобуски линии, кои ќе ги задоволат потребите на учениците и студентите, како и на сите други корисници на јавниот превоз. Како организација, како што велат, поддржуваат дијалог, иницирање иницијативи за решение на оваа ситуација и ги охрабруваме сите што се одговорни за јавниот превоз да ги стават интересите на граѓаните пред политичките пресметки за да осигурат нормален тек и праведен пристап до образование, односно основни услуги за кои децата имаат право.