Македонија
Тасевски на конференција на шефови на полиции во САД

Во периодот од 15 до 18 октомври, директорот на Бирото за јавна безбедност, Сашо Тасевски, и помошник-министерот за обука, Суза Тасевска, на покана на ИЦИТАП присуствуваа на годинешната конференција за шефови на полиции во организација на Меѓународната асоцијацијата на шефови на полиции – IACP.
Програмата на конференцијата имаше два основни столба, првиот добросостојбата на полицискиот службеник, а другиот зголемувањето на бројот на жени лидери во полицијата.
Македонската делегација, предводена од директорот Тасевски, зеде учество и присуствуваше на неколку работилници и предавања, како и на сесија на генералното собрание на асоцијацијата, каде што се обрати и главниот јавен обвинител на САД, Мерик Гарланд, а свое обраќање преку видеолинк имаше и претседателот на САД, Џо Бајден.
На генералното собрание беа прогласени најдобриот полицаец од САД за 2022 година и уште 22 полициски службеници, кои во текот на годината покажале исклучителни резултати во својата работа.
На маргините на конференцијата, во организација на главната канцеларија на ИЦИТАП, се оствари и средба помеѓу помошникот главен јавен обвинител, Кенет Полајт, и странските делегации. На оваа средба директорот Тасевски се заблагодари за исклучителната поддршка што ИЦИТАП ѝ ја дава на македонската полиција во изминатите 20 години. Особено важно е што македонската полиција се развива во правец на грижа за добросостојбата на полициските службеници, спроведена преку програмата „Сина храброст“ на ИЦИТАП, во правец кој е идентификуван и од самата асоцијација како неопходна инвестиција за подобрување на менталното здравје на полицискиот службеник и неговото семејство.
На крајот на оваа средба, во присуство на помошник-главниот јавен обвинител Кенет Полајт и Грегори Дукот, извршен директор на ИЦИТАП, директорот Тасевски му врачи признание на полицискиот аташе во Република Северна Македонија, Карл Ришхајм, и му се заблагодари за досегашната поддршка и воведувањето на клучните проекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Продолжувањето на притворот за Бектеши додека вистинските одговорни сè уште се на слобода претставува чист израз на селективна правда и политичка одмазда“, велат од ДУИ

„Продолжувањето на притворот за поранешниот министер Крешник Бектеши, додека вистинските одговорни – оние што биле задолжени за безбедноста на децата– сè уште се на слобода, претставува чист израз на селективна правда и политичка одмазда“, реагира ДУИ.
„Ова не е само двоен правен стандард – туку отворена политичка и партиска дискриминација, која претставува флагрантно кршење на основните принципи на правната држава.
Уште повеќе, иако сведоците и родителите на жртвите јасно ги посочија виновниците и побараа одговорност од Министерството за внатрешни работи, единствено поранешниот министер Бектеши сè уште се држи во изолација – како параван за да останат вистинските виновници на слобода.
Трансакциското обвинителство и актуелната власт продолжуваат брутално да ги газат сите правни, морални и човечки принципи.
Премиерот, откако јавно го заплаши обвинителот дека ќе ги изведе луѓето на улица против него, сега целосно го има потчинето и настапува истовремено и како обвинител и како судија.
Ако улицата е решението – тогаш дојде време сите граѓани да им се придружат на семејствата на жртвите од Кочани и да побараат правда – мирно, но решително, на улица“, се додава во соопштението на ДУИ.
Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Улици во Чаир без вода, намален притисок во Топанско Поле

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради поврзување на нова со стара постоечка водоводна мрежа на улица Кемал Сејфула бб, прекинато водоснабдување ќе имаат корисниците од улицата Џон Кенеди и дел од улицата Кемал Сејфула, а со намален притисок ќе остане населбата Топанско Поле во општина Чаир.
Водоснабдувањето ќе биде прекинато од 09:30 часот до завршување на работните активности.