Македонија
„Титаник 2“: Тачи не се чувствува виновен за изборните нерегуларности, ги убедуваше и судот и обвинителот

Лидерот на ДПА, Мендух Тачи, во завршниот говор бара ослободителна пресуда за предметот „Титаник 2“, кој се однесува на изборни нерегуларности.
Во повторното судење нему му е направена преквалификација на делото, па од злоупотреба на службената положба и овластувањето, сега тој се гони за повреда на избирачко право. Во почетокот на завршните зборови сакаше да го убеди обвинителот Гаврил Бубевски, кој му го поднесе обвинението, дека не е виновен. Судијата Огнен Ставрев му рече дека треба да го убеди судот.
„Не се чувствувам виновен, сакам, обвинителе, да ве убедам уште еднаш“, рече Тачи, на што возврати судијата Огнен Ставрев: „Сега треба судот да го убедите, а не обвинителот“.
„Немав никогаш намера да наштетам. Јас не сум наивен, јас сум имал многу можности да го информирам Ибраими. Јас немам намери, туку ставови како политичар. Јас имав став да ги убедам набљудувачите за нерегуларностите во Чаир. За Струмица, јас не знаев за кои избирачки места се зборува. Умисла немаше, намера немаше. Моите зборови се политички ставови. Другите работи што ги слушнав дека требало некој да губи, дека имало договор – мислам тоа не се однесува на мене“, рече Тачи.
И неговиот адвокат го кажа истото.
„Тачи не е виновен за ништо од обвинителниот акт. Барам од судот, бидејќи нема елементи за кривично дело, да има ослободителна пресуда за Мендух Тачи. Тој немал умисла, ниту се заканил ниту ветувал“, рече адвокатот.
Тачи додаде дека нема доказ кој покажува зошто би сторил кривично дело, односно која ќе биде неговата корист.
„Нема ниту еден доказ дека сум зел пари, дека сум заплашен, дека сум уценет. Нема врска. Личните кафеански муабети на одредени функционери на ВМРО-ДПМНЕ дека имаат договор со некого ги сметам како евтини маркетиншки трикови, кои не се прават само во Македонија туку и на Балканот“, посочи Тачи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Имаме 828 потпишани проекти, без разлика градоначалникот од која партија доаѓа

На денешната седница за пратенички прашања во Собранието, пратеничката Драгана Бојковска му постави прашање на претседателот на Владата, Христијан Мицкоски за капиталните инвестиции кои се однесуваат на општините од вториот повик од унгарскиот кредит, кои се проектите, какви се проектите и каков бенефит за граѓаните тие ќе носат.
„Ова за прв пат се случува во Македонија, ваков тип на инвестиција која што од Владата директно ќе биде наменета за општините. Во минатото сме сведоци на многу проекти од Владата кои што биле со одреден фокус и имале поинаква оптика и ова е сосема различен пристап. Јас сум многу задоволен бидејќи нема поубаво чувство кога ќе се организира настан и ќе се соберат градоначалниците од сите општини, од сите политички партии кои што имаат свои градоначалник, но и независни и кои што во мое присуство ќе потпишат договори за реализација на ваков тип на проекти. Овој проект преставува модел како треба државата да функционира, кога имаме заеднички интерес. Во случајот тој заеднички интерес се проектите во општините. И сите тие без да постои било каква замерка, дојдоа и потпишаа договори во една апсолутна хармонија, и тоа е примерот како треба да функционира. Од една страна е добро за граѓаните, кои не се тие кои треба да ја платат сметката поради политичките разлики кои ги имаат политичарите“, истакна премиерот Мицкоски.
Премиерот потенцираше дека имаме 1.200 градилишта, активни и идни, во државата и дека истото е добро за бизнисот, градежни компании градат булевари, спортски сали, паркови, училишта, градинки и други капитални инвестиции. Тој додаде дека до сега над 20 милијарди денари е вкупниот обем на инвестициите и процесот е целосно транспарентен.
„И самото тоа што никој не негира и негодува, туку напротив се заблагодаруваат и опозицијата и тоа е добро. Еве да речеме градоначалникот на една општина во југоисточна Македонија, излезе и јавно се заблагодари исто така и други градоначалници кои што се од опозицијата излегоа и се заблагодарија и овој пример треба да се следи. Тоа е добро затоа што од истата таа опозиција слушавме дека станувало збор за апсолутистичка власт, јас сум бил деспот, сум имал елементи на деспотско однесување, а од друга страна се заблагодаруваат на Владата што финансира и поддржува општини кои што не се само дел од власта, туку и од опозицијата“, објасни Мицкоски.
Македонија
Сиљановска-Давкова свика втора седница на Советот за безбедност

Претседателката Гордана Сиљановска-Давкова ја свика втората седница на Советот за безбедност што ќе се одржи утре, 1 август 2025 година, петок, со почеток во 12 часот.
Членови на Советот за безбедност по функција се: Африм Гаши, претседател на Собранието; Христијан Мицкоски, претседател на Владата; Панче Тошковски, министер за внатрешни работи; Владо Мисајловски, министер за одбрана; Тимчо Муцунски, министер за надворешни работи и надворешна трговија и тројцата членови, именувани од претседателката: Џевдет Хајредини, Малинка Ристевска-Јорданова и Владо Спиридонов.
На втората седница на Советот за безбедност, на покана на претседателката Сиљановска-Давкова ќе присуствуваат и директорот на Агенцијата за национална безбедност, Бојан Христовски; директорката на Агенцијата за разузнавање, Габриела Јаковлева и директорот на Дирекцијата за заштита и спасување, Стојанче Ангелов.
Македонија
Фатон Селами предложен за нов Народен правобранител од владеачката коалиција

Пратениците од владеачката коалиција во Комисијата за избори и именувања го избраа 40-годишниот Фатон Селами за предлог кандидат за нов Народен правобранител.
Селами во моментот е општински советник во Тетово од партијата Алтернатива, која е дел од коалицијата Вреди, а предложен е од координаторот на пратеничката група Беким Ќоку. Опозициските пратеници од Европскиот Фронт го оспорија изборот.
За избор на Народен правобранител потребни се најмалку 61 глас и најмалку 20 гласови од пратениците од помалите етнички заедници.
Селами има десетгодишно искуство во канцеларијата на Народниот правобранител, магистратура, и минато како државен секретар во Министерството за правда. Исто така, има положено правосуден и нотарски испит и има авторски трудови за човекови права.