Ексградоначалникот на град Скопје и функционер во ВМРО-ДПМНЕ, Коце Трајановски, како сведок на рочиштето за организаторите на „27 април“ рече дека партијата немала учевство во протестите на „За заедничка Македонија“. Според него, народот излегол на улица бидејќи, како што рече, почувствувале дека нешто се подготвува во Македонија.

„Во декември 2016 година ВМРО-ДПМНЕ доби најголем број пратеници во парламентот. Притоа се направија такви комбинации со кои партијата не можеше да формира влада. Се направи мнозинство. Се вознемири политичката сцена во Македонија и народот, нормално, кој ни даде најголема доверба со оглед на пратениците што ги добивме, поради тоа излезе на улица. Почувствува дека нешто се подготвува во Македонија, тоа се мои претпоставки. ВМРО-ДПМНЕ овие протести ги оцени како спонтани, ненасилни. ВМРО-ДПМНЕ немаше учевство во овие протести“, рече Трајановски.

Контакт со Јанакиески и Ристовски имал, но не за „27 април“, рече Трајановски, појаснуваќи дека тој во тој период бил градоначалник. Тој негира дека обвинетите ги координирале од градскиот комитет во Скопје. Трајановски беше дециден дека ВМРО-ДПМНЕ не ги организирала протестите, кои резултираа со насилен влез во Собранието.

„Со Миле Јанакиески и Спиро Ристовски не сум имал конктакт за протестите. Јас никогаш не сум ургирал кај ниту еден во администрацијата да излегува на протести, ниту сум влијаел врз институциите под надлежност на Град Скопје“, додаде Трајановски.

Тој негира дека Јанакиески и Ристовски имале меѓусебна комуникација поврзана за настаните од 27 април.

„Моите сознанија се дека ниту Спиро Ристовски ниту Миле Јанакиески имал комуникација поврзана со ‘27 април’“, рече Трајановски.