Министерката за труд и социјална политика, Јованка Тренчевска, заедно со градоначалникот на општина Центар, Горан Герасимовски, официјално го означи почетокот на изградба на новата детска градинка „Пролет“, која се наоѓа во населбата Пролет.

Новата градинка, која е прва градинка во населбата Пролет, ќе обезбеди опфат на 150 деца, сместени во 9 занимални. Овој капитален проект ќе обезбеди поддршка во згрижувањето на децата од населбите Пролет и Маџир Маало, велат надлежните.

Тренчевска го потенцира значењето на предучилишното згрижување и воспитание, кое е клучно за понатамошниот психофизички развој на децата и нивно поуспешно приспособување во понатамошниот образовен процес. Таа ја посочи како особено значајни инклузивноста и пристапноста на децата со попреченост, која оваа градинка ја има воспоставено при креирањето на проектот за нејзина изградба.

„Како Министерство чија надлежност е детската заштита, во континуитет инвестираме во зголемување на капацитетите за згрижување деца, креирање програми за работа соодветни за возраста на децата, но и не помалку значајно – зајакнување на капацитетите на вработените во јавните установи за предучилишно воспитание“, рече Тренчевска.

Таа информира дека од 2017 година до денес обезбеден е опфат на нови 4.300 деца во предучилишно воспитание преку изградба на 69 градинки во државата, а само во градот Скопје се отворени 17 детски градинки.

„Со изградбата на оваа градинка се овозможува децата што се на листите на чекање за прием во детските градинки во другите населби да влезат во воспитно-образовниот систем и да се подготват за образовниот процес. Воедно, им овозможуваме на младите родители згрижување на нивните дечиња, но создаваме и услови за нови вработувања“, истакна градоначалникот на општина Центар, Горан Герасимовски.

Тој информира дека изградбата на детската градинка е резултат на ослободено државно земјиште по ревидиран детаљно урбанистички план и е место на кое претходно бил впишан деловен објект. Герасимовски потенцира дека локалната самоуправа треба да работи според потребите на граѓаните.

До крајот на годината, според најавите, предвидено е отворање уште четири објекти во Скопје, и тоа во општините Ѓорче Петров, Карпош, Аеродром и во Сопиште, а градинките во Чаир и Арачиново, кои се исто така во тек на градба, а ќе бидат отворени 2023 година.