Македонија
Тунтев бара одговорност од претставниците на МРТ

Координаторот на пратеничката група на СДСМ, Томислав Тунтев, денеска побара одговорност од претставниците на МРТ бидејќи според него биле несериозни што не дошле да ги образложат извештаите за работа.
„Не го почитуваат Собранието“, рече Тунтев на собраниската Комисија за транспорт, врски и екологија, која ја продолжи седницата со предлог-законот за изменување и дополнување на Законот за аудио и аудиовизуелните медиумски услуги. Пратениците го разгледуваат и предлог-законот за изменување и дополнување на Законот за основање на Јавното претпријатие Македонска радиодифузија.
Претставникот на Агенција за електронски комуникации, Зоран Трајчевски, образложувајќи го извештајот, рече дека имало говор на омраза во медиумите, но не можеле да реагираат. Тие биле во комуникација со ОЈО, но соработката не вродила со плод.
„Во 2017 година, поради непочитување на законите од страна на радиодифузерите, Агенцијата презела 90 мерки. Поведени се 28 постапки за одземање на дозволата, од кои 3 беа усвоени“, рече Трајчевски, кои додаде дека се доделени и нови дозволи за работа.
Пратеникот на ВМРО-ДПМНЕ, Владимир Ѓорчев, го праша Трајчевски дали кај медиумите има автоцензура, но и дали кај стопанските субјекти имало принуда од Владата да се рекламираат.
„Има медиуми со најголема читаност, а немаат реклами бидејќи, ако платат, ќе се соочат со притисоци и инспекции. Во врска со укинувањето на радиодифузната такса, повторно плаќаат граѓаните“, рече Ѓорчев.
Според директорот на АЕК, има подобрување во слободата на медиумите. Но, според него, слободата на медиумите е кревка, а тоа го утврдиле со настаните од минатата недела за време на лидерската средба, но и укинатата емисија на телевизија со национална концесија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ со повик до партиите да го поддржат законот за ветинг

ДУИ упати повик до сите политички партии да го поддржат предлог-законот на ДУИ за ветинг.
Според партијата, процесот на ветинг е неопходен и клучен за да се изгради довербата на граѓаните во правдата, институциите и државата.
„Нашиот став е јасен и непроменлив: им упатуваме повик на сите парламентарни политички партии да го поддржат предлог-законот на ДУИ за ветинг со меѓународен надзор, еден сеопфатен и бескомпромисен процес што ќе ја врати довербата на граѓаните во правосудството и институциите, го повторуваме нашиот одамнешен став за истрага против сите политички партии, без исклучок, за периодот од изминатите 33 години, бараме проверка и контрола на потеклото на имотот на сите носители на јавни функции во последните 33 години: министри, пратеници, градоначалници, директори, судии, обвинители – сите, без исклучок; ја потенцираме потребата од длабoка истрага на процесот на приватизација, кој во многу случаи служеше како основа за создавање на недопирливи олигарси. Ова темно поглавје не смее да остане нерасчистено. Правдата не се мери со изјави, туку со конкретни одлуки, бараме исто така истрага за дејствувањето на безбедносните служби на државата, како и за функционерите кои биле дел од тие служби од 1945 година наваму: ОЗНА, УДБ-а, СДБ, ДБК, УБК, АНБ“, изјави потпретседателот на ДУИ, Арбер Адеми.
Според него, ова не е само политички проект, ниту пак стара заложба на ДУИ, туку услов за правда и за поправедна иднина за сите граѓани.
Македонија
Отворена нова градинка „Верверичка“ во Кисела Вода

Во населбата 11 Октомври Згради во општина Кисела Вода денеска беше отворена новата градинка „Верверичка“, како дел од ЈДГ „Весели Цветови“.
Градинката е изградена во финансиско партнерство помеѓу Општина Кисела Вода и Комерцијална банка, која со донација од 6 милиони придонесе за реализација на овој проект, вреден над 14 милиони денари.
Новата градинка се простира на површина од 525 м², располага со 6 занимални, 4 воспитни групи и јасли, и овозможува згрижување на 125 деца. Оваа инвестиција директно ја решава проблематиката со недостиг на места во градинките.
Со отворањето на денешниот објект, изградбата на уште две градинки кои се во тек, претходно отворените две градинки и петте градинки кои беа доградени, во моментот во Кисела Вода, за прием чекаат само 20-тина дечиња, велат од Општина Кисела Вода.
Македонија
Кривична пријава за градоначалникот на Кичево – дозволил дива депонија во населена зона во градот

Полицијата поднесе кривична пријава против градоначалникот на Кичево, Фатмир Дехари, поради постоење основи на сомнение за сторени кривични дела „несовесно работење во службата “ и „загрозување на животната средина и природата со отпад “.
Според информациите од СВР-Охрид, тој, постапувајќи несовесно при извршување на своите законски обврски и не вршење должен надзор, од 2020 година, дозволил да биде формирана дива депонија на повеќе илјади квадратни метри во населена зона во Кичево.
Дехари давал задолженија на вработени секојдневно да складираат, оставаат или расфрлаат отпадни материи, односно со нив да постапуваат на начин со кој се менува квалитетот на воздухот, почвата, водата или водотекот, во мера што може да ги влоши условите за живот на луѓето или животните и растенијата со што го загрозил нивниот опстанок.