Во големата сала на Општина Кисела Вода вечерва се одржа Буџетски форум, организиран со цел креирање на буџетот за 2025 година. Настанот, кој се одвиваше под слоганот „Мојот народ одлучува, буџет 2025“, претставуваше можност граѓаните директно да учествуваат во дефинирањето на приоритетите и потребите на локалната заедница.

Жители на општината, претседатели на месни заедници, секретари и членови на одборите активно дискутираа со градоначалникот Орце Ѓорѓиевски и раководителите на секторите од општинската администрација. Граѓаните предлагаа идеи од различни области, како што се инфраструктура, образование, култура, создавање на паркинг места, и многу други. Сите предлози беа разгледувани од финансиски и технички аспект, при што голем дел од нив беа прифатени за понатамошна реализација.

Како дел од форумот, присутните пополнија и анкетни листови со цел детално да ги истакнат своите идеи и приоритети.

„Денес сме тука заедно, за да го трасираме нашиот заеднички пат кон креирање на буџет на Општина Кисела Вода кој е одраз на вашите потреби, идеи и приоритети. Месните заедници, чии претставници сте вие, како форма на делување, отсекогаш биле првиот гласник на проблемите и потребите на граѓаните. Вашето учество овде денес е од исклучителна важност, бидејќи вие сте оние кои први ги дознавате реалните предизвици, но и можностите на секој наш жител, од секоја улица, од секое маало“, истакна градоначалникот во своето обраќање. Тој го нагласи досегашниот успех на транспарентниот и инклузивен пристап во работата на општината, подвлекувајќи дека дури 95% од неговата четиригодишна програма е реализирана. Додаде дека бројни проекти, кои не биле планирани во програмата, се спроведени врз основа на идеи и потреби изразени токму преку вакви форуми.

Настанот продолжува утре со нова форумска сесија на која граѓаните ќе земат активно учество во одредувањето на приоритетите за буџетот за 2025 година, соопштија од општината.

ДУИ со реакција на напишаното од страна на министерката за образование и наука Весна Јаневска која им порача конечно да почнат да ја почитуваат државата.

„Министерке, можете да го толкувате повлекувањето на законот за средно образование како противење од страна на ДУИ бидејќи наводно не ја сакаме државата, но тоа е далеку од вистината – всушност, токму затоа што ја сакаме, го направивме тоа.

Ние се спротивставивме на овој закон за да ја заштитиме државата и мултиетничкиот карактер на нашата земја од поединци како вас, кои не веруваат во соживот и меѓусебна почит.

Вашиот слеп ентузијазам кој изгледа како „моќна бура“, но тој е непромислен и краткотраен, додека штетата што можете да ја предизвикате ќе биде долгорочна.

Вашиот пристап, кој исклучува и создава тензии, претставува закана за сите граѓани, без разлика на нивната етничка припадност“, пишуваат од партијата на Ахмети.

„ДУИ се спротивстави на овој закон затоа што се грижиме.

Се грижиме за Албанците, за Македонците и за секој граѓанин на оваа земја, за да не станат жртва на вакви неодговорни пристапи и одлуки.

Нашата држава има потреба од визија и лидерство што обединува, а не што разделува“, и порачуваат од ДУИ на Јаневска.

Не дозволувам политички партии да печалат поени и да враќаат рејтинзи преку игри во образованието и на штета на воспитно – образовниот процес, порача министеката за образование и наука Весна Јаневска, преку социјалните мрежи.

„Законот за средно образование кој го предложивме во Собранието и предвидуваше повеќе нови права и можности за наставниците, стручните соработници, учениците и родителите, вклучително и изборна можност за интонирање на македонската химна во училиштата, ќе почека некоја недела за усвојување. Во меѓувреме ќе ја подобриме неговата содржина. Денеска го повлеков од дневниот ред, за да не дозволам ДУИ да го закочи усвојувањето на целата нова правна регулатива во образованието, на која заедно со бројни општествени чинители, макотрпно работевме во изминатите неколку месеци. Користејќи националистички реторики, обвинуваат за создавање наводно некаква си меѓуетничка нерамноправност. Убаво ќе беше да си ја сакаат татковината, државата каде се образуваат, работат и земаат плата и да изразат почит кон нејзините симболи. Но, гледаме нешто друго. Заради остварување на партиски цели и програми, спремни се да го спречат развојот, јакнењето на основниот столб на државата – образованието“, вели Јаневска.

Со вакви потези, како што оценува таа, несвесно, го уназадуваат и воспитно – образовниот процес на сите деца, независно на која етничка заедница припаѓаат.

„Но, очигледно тоа и не е така важно. На пратениците од ДУИ сакам да им порачам дека Владата ќе продолжи да ги спроведува промените кои народот ги побара, тоа е сигурно. Но, им порачувам и конечно да почнат да си ја почитуваат државата, да покажат волја за соживот, за соработка, разбирање и единство. По не знам кој пат ќе повторам, живееме во една заедничка држава, сите треба да ја чувствуваме како своја и заедно да се грижиме за нејзиниот развој. Во меѓувреме, како министерка ќе продолжам да се заложувам за јакнење на меѓуетничките односи особено меѓу младите генерации во Македонија и на целосна интеграција на ова општество. За следната година веќе предвидовме повеќе средства за училишни активности кои ќе ги зближуваат младите од различните етнички генерации“, напиша Јаневска.