Македонија
(Видео) Утврден судир на интереси кај градоначалниците на Бутел и Ресен, извршувале две неспојливи функции
Двајца градоначалници се на листата на функционери кај кои Државната комисија за спречување корупција утврди судир на интереси по извршените проверки на доставените изјави за интереси. Градоначалникот на општина Бутел, Велимир Смилевски, пријавил дека ја извршува и функцијата член на Управниот одбор на Градскиот трговски центар од 2017 година, а градоначалникот на општина Ресен, Живко Гошаревки, истовремено е член на Управниот одбор на ЈП „Студенчица – Кичево“, исто така од 2017 година.
На листата каде што антикорупционерите констатираа судир на интереси се уште 16 службени лица, кои истовремено биле директори, членови на општински совети, членови на управни и надзорни одбори во јавни претпријатија.
„Утврдена е листа на лица што извршувале две или повеќе функции истовремено. Кај сите има судир на интереси и тие се известени дека треба да си го отстранат судирот на интереси во рок од 15 дена од доставувањето на одлуката“, рече претседателката на Комисијата, Билјана Ивановска, и нагласи дека поради неспојливост на функциите, предвидена е и прекршочна постапка.
Антикорупционерите утврдиле дека Ѓорги Граматиков извшувал три функции што не може да бидат споени, односно пријавил дека е член на Советот на Општина Дојран, член на Управниот одбор на градинката „Кокиче“ во Дојран од 2014 година и член на Надзорниот одбор на ЈП за комунални дејности „Полин“ од 2013 година.
Александар Цуцулоски, член на одборот на директори на АД за стопанисување со станбен и деловен простор од значење за Републиката, истовремено е член на Управниот одбор на студентскиот дом „Пелагонија“ од 2017 година.
Љупка Јаневска, в.д. директорка на детската градинка „Гоце Делчев“ во Пробиштип, истовремено е член на Управниот одбор на студентскиот дом „Доне Божинов“ во Пробиштип.
Габриела Иливеска е член на Советот на Општина Кратово и член на Управниот одбор на градинката „Царка Андреевска“ во Кратово од 2017 година.
На листата се и Билјана Манасиева, која истовремено е член на Советот на Општина Виница и член на Управниот одбор на Меѓуопштинскиот центар за социјални работи – Виница од 2017 година, Џелал Абиду, член на Советот на Општина Маврово – Ростуше и член на Управниот одбор на Националниот парк „Маврово“, Маврови Анови, од 2009 година, Кире Алексов, член на Советот на Општина Свети Николе и член на Управниот одбор на ХС „Злетовица“ – Пробиштип, Драгана Плешкова, член на Управниот одбор на ЈЗУ „Универзитетска клиника за пулмологија и алергологија“ и член на Управниот одбор на ЈЗУ „Универзитетска клиника за радиотерпаија и онкологија“ – Скопје од 2017 година, Славјана Михаиловиќ, член на Советот на Општина Струмица и заменик-народен правобранител во Скопје, Ристо Џинев, претседател на Советот на Општина Дојран и член на Управниот одбор на детската градинка „Кокиче“ во Дојран од 2014 година, Тони Мартиноски, член на Советот на Општина Бутел и в.д. директор на Управата за животна средина и просторно планирање од 2014 година, Богослав Лескаровски, член на Управниот одбор на ЈП „Паркинзи на Општина Центар“ и член на Управниот одбор на Агенцијата за катастар од 2017 година, Бедри Вељиу, заменик-претседател на Управниот одбор на ЈЗУ „Општа болница Куманово“ и претседател на Управниот одбор на ЈЗУ „Центар за јавно здравје“ – Куманово од 2017 година, Томче Ѓуровски, член на Советот на Општина Аеродром и член на Надзорниот одбор на АД „Македонски железници – Транспорт“ од 2017 година, Милена Строимановска, член на Советот на Општина Куманово и член на Управниот одбор на Центарот за култура „Трајко Прокопиев“ – Куманово од 2011 година и Марјан Неделковски, член на Управниот одбор на Државниот студенски дом „Скопје“ – Скопје и член на Управниот одбор на ученичкиот дом „Лазар Лазаревски“ – Велес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево и потопло со мала до умерена облачност
Времето денеска ќе биде сончево и потопло со мала до умерена облачност. Ќе дува слаб до умерен ветер од северен правец. Минималната температура ќе биде во интервал од 12 до 19, а максималната ќе достигне од 29 до 37 степени. UV=8
Во Скопје сончево и топло со мала до умерена облачност и со слаб до умерен северен ветер. Минималната температура ќе се спушти до 17, а максималната ќе достигне до 34 степена.
Во деновите од викендот и во понеделник времето ќе биде сончево и топло со мала до умерена локална облачност. Дневните температури насекаде ќе бидат над 30 степени.
Во вторник се очекува повторно дестабилизирање на времето со пороен дожд, грмежи и засилен ветер, локално во форма на невреме.
Македонија
ВМРО-ДПМНЕ: Безобразно е Еролд Муслиу да збори за мерит систем, човекот од Агенција за разузнавање, направи партиски штаб на СДС
Безобразно и некоректно е Еролд Муслиу да говори за професионализам и мерит систем. Човекот од Агенцијата за разузнавање направи партиски штаб на СДС, организирајќи хајки, напади и пресметувајќи се со ВМРО-ДПМНЕ, велат од оваа партија.
„Воедно агенцијата предводена од Еролд се пресметуваше со новинари, медиуми и личности кои го критикуваа криминалот на СДС и ДУИ.
Муслиу со такво портфолио може да се кандидира единствено за лидер на СДС наместо да рони солзи за неговото разрешување.
А за неговото работење доволно говори податокот дека додека Муслиу е директор, неговата сопруга со помош на владата доаѓа до грант од 620.000 евра. Во која НАТО земја сопруга на директор на служба добива 620.000 евра грант за работа која е дејност на службата на сопругот?“, прашуваат од ВМРО-ДПМНЕ.
Тешка манипулација, како што додаваат во соопштението од владејачката партија, е неговата одбрана со етничката припадност и дека тоа е можната причина за смена. „Тоа е завесата позади која тој ја крие неговата неспособност, злоупотреби и партиска пристрасност“, потенцираат од партијата.
Македонија
Муслиу: Претседателката попушти пред партиските притисоци, партиската логика го надвладеа мерит системот
Претседателката на Република Северна Македонија, Гордана Силјановска-Давкова денеска ме разреши од функцијата директор на Агенцијата за разузнавање.
Без да навлегувам во политичката логика и автономија при одлучувањето за моето разрешување, очигледно е дека претседателката попушти пред партиските притисоци, вели разрешениот директор на Агенцијата за разузнавање Еролд Муслиу, откако од кабинетот на Сиљановска Давкова попладнево беше соопштено дека таа донела одлука за негово разрешување и за именување на Габриела Јаковлева на таа функција.
„Законската оправданост и мерит системот за кој цело време зборува претседателката, за жал во случајот со моето разрешување , отсуствуваат.
Посебно сум разочаран од постапката и начинот кој го избра при моето разрешување, не покажувајќи доблест да се сретнеме на прва информативна средба на која би добила брифинг за природата на работата на Агенцијата и за безбедносното опкружување и актуелната состојба во регионот.
Со гордост и посебна чест ја раководев Агенцијата во изминатиот период во кој вложив надчовечки напори да го подигнам нивото на квалитетна работа и да го пренесам професионалното искуство и знаење стекнато во мојата 31 годишна кариера.
Честа е уште поголема и заради фактот што јас сум првиот Албанец во историјата на безбедносно-разузнавачката заедница во нашата држава на кого во 2019 година му беше доверена задача да ја предводи АР.
Иако цело време бев изложен на гнасна дезинформациска кампања која доби размери на политички линч кој остави и последици врз моето семејство, сепак, разбивајќи ги табуата во нашето општество, докажав дека Албанец, притоа и без партиска припадност, може да постигне високо ниво, да биде прифатен и почитуван во колективот, во национални и меѓународни рамки.
Пионер сум во идејата и достигнувањето највисоко ниво на родова застапеност и еднаквост како и на раководно ниво во АР, како и во делот на етничка рамноправност давајќи простор на сите од етничките заедници застапени во нашето општество да бидат дел од АР.
Под мое лидерство го подигнавме нивото и ги надградуваме нашите технички капацитети во процесот на дигитализација, информатичка и кибер безбедност.
Постигнавме фантастични достигнувања во стратешките зафаќања и оперативно-разузнавачките активности кои АР ги реализираше самостојно, како и на билатерално и на сојузничко ниво.
Искажувам огромна благодарност до целиот колектив во АР што во изминатиот, навистина динамичен и полн со предизвици период, ми дадоа безрезервна подршка во тешките зафаќања кои мораше да ги превземеме особено во периодот на ковид пандемијата, реформата на АР, активностите со отпочнувањето на Руската агресија на Украина, конфликтот во Газа и регионалната нестабилност во соседството.
На крај, на новата директорка на АР и посакувам успех во раководењето со Агенцијата, на останатите колеги им посакувам да бидат фокусирани на исполнување на визијата и мисијата на АР , да ја чуваат и бранат РСМ, не затоа што е голема или мала, туку затоа што таа е наша“, вели во изјавата Муслиу.