Македонија
Уште една комисија ќе бара како починатото бебе од Прилеп се заразило со ешерихија коли откога ДСЗИ не најде пропусти
Комисија за стручен надзор формирана од министерот за здравство, Фатмир Меџити, ќе анализира зошто починало бебето од Прилеп десет дена по раѓањето. Кај бебето битолската болница откри жолтица, а Детската клиника, каде што беше последните седум дена, при приемот во дишните патишта регистрира бактерија ешерихија коли.
Министерот Меџити денес извести дека ја формирал комисијата откога вчера Државниот санитарен и здравствен инспекторат извести дека не нашле пропусти во лекувањето, кои се во надлежност на Инспекторатот, и иницирале формирање стручна комисија.
„ДСЗИ има соопштение дека нема пропусти во лекувањето на детето и во прилепската болница и во Детската клиника. За жал, вакви случаи има и во светот. Нема пропусти во моментот, ние формиравме и стручна комисија од експерти од Детската клиника и тие ќе го испитаат случајот дали има некој пропуст, но тоа што го имаме досега од ДСЗИ е извештајот, кој кажува дека нема пропусти. За мене како министер и за сите здравствени работници, многу е тешко кога ќе изгубиме нечиј живот, а особено на новороденчињата и на малите деца“, рече министерот Меџити, кој денес во Клиниката за гинекологија и акушерство го одбележа денот на предвреме родените бебиња и се пофали со неколкукратно намалени бројки на смртноста кај предвреме родените.
Рената Димитриовска, неонатолог и началник на одделението за интензивна нега и терапија на Клиниката за гинекологија, објасни дека неонаталната смрт е сериозен проблем затоа што од смртноста на децата до петтата година, 50 отсто се должи на неонатална смрт. Од тие 50 отсто, најголемиот број бебиња починале во првата недела од раѓањето.
Бебето од Прилеп почина од сепса, а мајката обвини за негрижа и пропусти на лекарите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.
Македонија
(Видео) Битиќи: Над 75% од граѓаните се за членство во ЕУ, власта да каже која е алтернативата
Во сите анкети над 75% од граѓаните велат дека се за членство во ЕУ. Политичарите имаат обврска да носат одлуки, за да одговорат на нивното очекување. Владата треба да каже кој е нивниот план. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, рече пратеникот на СДСМ, Фатмир Битиќи во одговор на новинарско прашање.
На власта беше да ги подобри условите како што ветуваше, додаде тој.
-И сегашната партија ВМРО-ДПМНЕ нема добиено повеќе од 25% од вкупниот број граѓани на изборите Легитимитетот на изборите не мора да значи дека се носат добри одлуки. Но и да прифатиме дека е тоа така, нивно беше да ги сменат условите. Да го сменат и Францускиот предлог, да ја сменат и преговарачката рамка, и да го вратат името. Очигледно гледаме сценарио во кое за жал продолжува стариот манипулативен приод на оваа гарнитура, да изманипулираме што можеме за избори а после кога ќе ја добиеме власта ништо од тоа не важи, додаде Битиќи.
Која е алтернативата? Власта треба да каже како понатаму после одвојувањето на европскиот пат, рече Битиќи.
-Наредната недела изминуваат 100-те дена и убаво на следните пратенички прашања Владата да дојде со план каде ќе се движи Македонија во наредните години, кога е очигледно одвојувањето на европскиот пат од другите земји.