Македонија
ФЗО призна дека техничките проблеми се сајбер-напад, молчат дали се загрозени податоците на пациентите

Системот на Фондот за здравство бил цел на хакерски напад. По три дена, институцијата се реши да признае дека, всушност, системот има технички проблем и не функционира дел од серверите.
„Моментно ФЗО се справува со сајбер-напад, кој предизвикува нефункционалност во дел од ИТ-системите. Експертски тим работи 24/7 за справување со предизвиците и нивно отстранување во најбрз можен рок. Приоритет се дава за најбргу што може да се врати во функција системот за исплата на боледувањата, породилното и рефундациите, а ФЗО веќе има издадено упатство кон подрачните служби за решенија со кои граѓаните тековно ќе ги остваруваат своите права“, велат од ФЗО.
„Макфакс“ побара од Фондот токму листа на услуги што во моментот, поради паднатиот систем, не им се достапни на корисниците. Оттаму, наместо листа, Фондот испрати соопштение, без никакви детали. Од оваа институција не кажуваат дали листата со лични податоци на стотици илјади осигуреници завршила во рацете на хакерите, како и тоа дали се загрозени.
Во меѓувреме, „Макфакс“ побара одговор и од МВР дали кај нив е пријавен сајбер-напад, од каде што негираа. Тие посочија дека има технички проблеми.
„Од страна на ФЗОМ до МВР е пријавено дека имаат технички проблеми на дел од серверите. МВР постапува по пријавата за дијагностицирање и отстранување на проблемот“, велат од институцијата.
Системот на Фондот е паднат од понеделникот. Пациентите што немаат матичен лекар не може да изберат нов, а оние што имаат потреба од боледување повеќе од 15 дена не може да добијат документ за да го оправдаат отсуството од работа. Избраните матични лекари во согласност со договорите со ФЗОМ до 10 во месецот треба да ги достават фактурите, а тоа не може да го направат.
Фондот и денес уверува дека и покрај детектираните технички проблеми и нефункционалности на дел од електронскиот систем, пациентите ќе може и понатаму непречено да се лекуваат на сите клиники, како и преку матичните лекари, кои може да вршат прегледи, да издаваат упати и рецепти, кои се подигнуваат во аптеките без застој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Водовод и канализација – Скопје: Последен ден од акцијата за отплата на долгови без пресметка на камата

ЈП Водовод и канализација – Скопје ја известува јавноста и граѓаните на град Скопје, дека акцијата за отплата на долговите без пресметка на камата за задоцнето плаќање завршува денес.
„Акцијата за отплата на долговите на рати без камата е со определено времетраење и започна од 17.02.2025 година, а завршува заклучно со 02.04.2025 година.
Ги повикуваме сите корисници кои имаат заостанат долг за потрошена вода (тужен и редовен), да ја искористат можноста за плаќање на рати без пресметана камата.
Одлуката за спроведување на акцијата за отплата на заостанатите долгови без пресметка на камата не важи за органите на државната и локалната власт и другите државни органи основани согласно Уставот и со закон и институциите кои вршат дејности од јавен интерес утврден со закон, а организирани како агенции, фондови, јавни установи и јавни претпријатија основани од Република Македонија или од општините, од градот Скопје, како и од општините во градот Скопје.
По истекот на овој период одлуката престанува да важи“, соопшти ЈП Водовод и канализација – Скопје.
За секоја дополнителна информација за услугите на ЈП Водовод и канализација – Скопје контактирајте на:
02 3073 010, Дежурно Информативен Центар; 02 3240 300, Дирекција; [email protected]; www.vodovod-skopje.com.mk; www.facebook.com/jpvodovod.skopje
Македонија
Поплавени куќи, магацини и индустриски објекти во Студеничани, Батинци, Пинтија и Горно Лисиче

РЦУК – Скопје, известува дека поради врнежите од дожд, во текот на доцните попладневни и вечерните часови, дојдено е до зголемување на нивото на Маркова Река поради што истата е излеана преку мостот кај н.м.Љубош и низводно, и дојдено е до поплавување на неколку куќи, магацини и индустриски објекти во селата Студеничани и Батинци, како и делови кон Пинтија.
Исто така пријавено е и поплавување на дел од булеварот Борис Трајковски кај населба Пинтија, каде исто така имало пријави за поплавени магацини. Според информациите од лицето за контакт од ЕЛС Студеничани, интервенираат службите на ЕЛС Студеничани со локалните фирми, а исто така на терен има и претставници од ЕЛС Кисела Вода.
Во текот на ноќта, на Единствениот број за итни повици 112 добиени се и пријави за поплавени куќи во Горно Лисиче (општина Аеродром), каде интервенира ЕЛС Аеродром.
Исто така, на поплавените места интервенираат и БППЗ на град Скопје и Јавните претпријатија на град Скопје и ЕЛС.
АМСМ известува дека непроодни се локалниот пат село Горно Лисиче према село Долно Лисиче (општина Аеродром) и првиот мост во село Батинци (општина Студеничани).
ЈСП Скопје, известува дека поради поплавите од Маркова река, автобусот со број 70 сообраќа до почетна/крајна станица Дризла и автобусот со број 33 преку населба Драчево во двете насоки.
Македонски железници известуваат дека железничкиот патнички и товарен сообраќај, од 22:50 часот е во прекин во правец на Лисиче и Драчево и обратно, додека патничкиот сообраќај се одвива преку станицата Трубарево.
Македонија
Дел од Карпош денеска без вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради санирање појавен дефект на водоводна мрежа со пречник Ф-1 цол на ул. Копенхагенска, крстосница со ул. Стокхолмска во населба Тафталиџе, прекинато водоснабдување ќе имаат корисниците од улиците: Копенхагенска, Стокхолмска, Софиска, Његошева, Гаврил Лесновски и Петар Драганов во општина Карпош.
Водоснабдувањето ќе биде прекинато од 11:30 часот до завршување на интервенцијата.