Министерот за здравство, Венко Филипче, изјави дека почнува да се враќа животот во нормала и почнуваат да се отвораат бизнисите, се враќа слободното движење, а набргу ќе се отворат и границите.

„Се отвораме како што тоа го прават сите земји околу нас и во светот. Сега сме исправени пред два избора. Да се навикнеме безусловно да ги почитуваме мерките за заштита на здравјето, кои се предуслов за нормализирање на состојбата, или со непочитување на мерките да ризикуваме повторно враќање назад кон рестрикции и остри мерки“, рече министерот Филипче.

Тој потенцира дека анализите на епидемиолозите потврдија дека состојбата е стабилна, а досегашната стратегија даде резултат.

„Го заштитивме здравствениот систем и ја одржавме епидемијата под контрола. Ова беше предуслов да ги олабавиме рестриктивните мерки. Но, мерките за лична заштита остануваат да важат и мора целосно да се почитуваат. Задолжителното носење маска или прекривка на устата и носот, одржувањето физичка дистанца, редовната хигиена и дезинфекција на рацете се мерки што остануваат дел од нашето секојдневие. Со овие мерки ние продолжуваме понатаму и со нив ќе се заштитиме“, истакна министерот Филипче.

Филипче истакна дека вирусот нема да замине и со него ќе мора да научиме да живееме и тоа подолг временски период. Ова значи дека одговорноста на граѓаните е сега уште поголема.

„Недозволиво е оние што ги почитуваат мерките да бидат во ризик од оние што тоа не го прават тоа. Апелирам и до надлежните институции, сите прекршувања што го загрозуваат јавното здравје мора да се санкционираат. Сакам на сите да им биде јасно – со заштита на сопственото здравје ги штитите сите околу вас, спасувате животи на вашите блиски, на вашите сограѓани и им помагате на здравствените работници. Ова е наша заедничка борба. Само заедно можеме да ја надминеме оваа состојба. Верувам дека од оваа криза ќе излеземе многу посилни и помудри и ќе разбереме колку се важни граѓанската солидарност, поддршката на институциите и меѓусебното помагање“, посочи Филипче.