Македонија
Филипче: Со буџет од 6,3 милијарди денари ќе се подобруваат условите за лекување

Буџетот на Министерството за здравство следната година ќе изнесува 6,3 милијарди денари, односно ќе има 300 милиони денари повеќе од проекцијата за минатата година, најави министерот Венко Филипче, кој додаде дека 2019 година ќе започне со зголемување на платите во јавното здравство.
„Од јануари ќе следи дополнително зголемување на платите за 10 проценти за докторите специјалисти и 5 проценти за медицинските сестри. За сите останати здравствени работини, покачувањето на платите ќе се реализира од септември 2019 година“, рече Филипче.
Зголемувањето на буџетот значи подобрување на условите за лекување, тврди минситерот Филипче. Ќе се завршува реконструкцијата на болницата „св. Еразмо“ во Охрид, ќе се продолжат градежните активности во Општата болница во Струмица, ќе се започне со изградба на нова болница во Струмица, но и со предприпремни активности за новата градска болница кај Мајчин Дом во Аеродром. Ова се само дел од проектите кои ги кажа Филипче а треба да се реализираат со буџетот од 6,3 милијарди денари во текот на идната година.
„Имаме буџет и за изградба на амбуланти во рурални средини, а акцент ќе ставиме на изнаоѓање на објект за лекување на зависници, односно целосно преместување на центарот од Кисела Вода. Предвидени се средства за изведување на припремни работи за клиничкиот центар во Скопје и изнесуваат повеќе од 587 милиони денари. Дел од овие средства ќе се користат и за интервентни градежни работи за сегашниот кампус на Клиничкот центар. Планираме нови влезови и излези, градење на монтажни катни гаражи“, додаде Филипче.
Имунизацијата ќе биде приоритет и во идната година, вели министерот, а ќе се набават вакцини во износ од 394 милиони денари.
„Во програмата за превенција од кардиоваскуларни болести, се предвидува ангажирање на странски хирурзи кои ќе вршат хируршки интервенции а истовремено ќе работат на едукација на нашите лекари. Би потенцирал дека имаме зголемување на средствата во програмата за ретки болести, па така, следната година располагаме со буџет од 380 милиони денари, со кои ќе набавиме и лекови кои третираат повеќе од 20 ретки болести“, вели Филипче.
Стратешки цели на Министерството за здравство ќе бидат набавка на инсулин, лекови за ретки болести, медицинска опрема, подобрување на инфраструктрата и припрема за изграда на новиот Клинички центар во Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Пожарот кај хотелот „Њу Стар“ локализиран, ЦУК бара итни мерки за дивата депонија во Визбегово

Пожарот кој избувна во близина на хотелот „Њу Стар“ во скопската населба Визбегово е локализиран, но на терен и понатаму дежураат две екипи на Територијалната противпожарна единица на Град Скопје.
Како што информира Центарот за управување со кризи (ЦУК), во денешната интервенција биле ангажирани вкупно седум противпожарни возила и 20 пожарникари. Пожарот зафатил површина од околу 5000 квадратни метри, при што биле опожарени жито, еден магацин со градежни материјали, како и дворот на хотелот.
„Денеска, при повторно разгорување, пожарот се прошири до хотелот „Њу Стар“, како и до околните куќи, со што директно беа загрозени животите на граѓаните“, стои во објавата на ЦУК на Фејсбук.
Оттаму апелираат до сите надлежни институции и локалните самоуправи итно да се вклучат со конкретни чекори и да се стави крај на проблемот со дивите депонии, кои, според нив, претставуваат сериозна опасност по животната средина и јавното здравје.
ЦУК информира дека директорот Мухамед Али денеска испратил ново барање до надлежните институции со цел итно преземање активности за конечно решавање на овој проблем.
„Проблемот со оваа дива депонија трае подолг временски период и претставува реална закана за здравјето, безбедноста и добробитта на граѓаните, како и сериозна оперативна оптовареност за БППЗ, која често е ангажирана на истата локација“, посочуваат од ЦУК.
Оттаму потсетуваат дека во текот на изминатата недела директорот Али повеќекратно испратил официјални барања за интервенција, но засега нема конкретен одговор од надлежните.
Македонија
Мицкоски ја доби тужбата против Славјанка Петровска за клевета

Граѓанскиот суд во Скопје донел правосилна пресуда во корист на премиерот Христијан Мицкоски, утврдувајќи дека пратеничката од СДСМ и поранешна министерка за одбрана, Славјанка Петровска, јавно ширела невистини и клевети против него.
Како што информира премиерот преку објава на социјалните мрежи, судот ѝ наложил на Петровска не само да се извини, туку и да ја објави пресудата во медиумите.
„Ова е уште една потврда дека на лагата ѝ се кратки нозете. Судот потврди дека поранешната министерка и актуелна пратеничка ширела лаги и клевети против мене. Вистината мора да излезе на виделина“, напиша Мицкоски.
Тој ја искористи приликава и за поширока критика на политичката култура на неговите опоненти.
„Очигледно, лажењето како синдром на политичката култура на СДСМ не престанува да биде нивен заштитен знак. Со оваа пресуда се потврдува не само дека лажат, туку и дека не се промениле. Продолжуваат да го потценуваат народот“, порача премиерот.
Според Мицкоски, оваа судска победа не е лична, туку борба за вистината и достоинството на секој човек кој се спротивставува на политичките манипулации.
„Ова не е моја лична битка, ова е битка за принципи, за вистината, за достоинството на секој поединец кој не дозволува неказнето да му се лепат лаги“, стои во неговата објава.
Тој додава дека продолжува да работи со посветеност и дека „лагите ќе паднат, а вистината победува“.
Скопје
Град Скопје: Обвинителството го отвори првиот случај за дивоградбите во Чаир

Основното јавно обвинителство ја започна постапката по првата пријава за фалсификати поврзани со градби во Општина Чаир, информираа денеска од Град Скопје.
Според соопштението од прес-службата, истрагата се однесува на сомневања за фалсификување на документи и незаконска легализација, а се поврзува со поранешниот градоначалник на општината, Висар Ганиу.
„Основното јавно обвинителство ја започна постапката по првата пријава со фалсификатите. Таму веќе се водат уште две постапки претходно започнати за Висар Ганиу, првата за фалсификување на целата архивска книга со броеви и барања за легализации, а втората за уште еден случај каде што незаконски се легализирале објекти со соучесник“, стои во соопштението.
Од Град Скопје испратија и повик до Основното јавно обвинителство за гонење на организиран криминал и корупција, со барање конечно да започне постапка против, како што велат, „организираната криминална банда“ во Чаир.
„Очекуваме и Основното јавно обвинителство за гонење на организиран криминал и корупција да се одважи и да почне да постапува против организираната криминална банда во општина Чаир, која овозможувала градење незаконски на небезбедни згради со црни пари од нелегални извори“, велат од Град Скопје.
Во реакцијата се посочува и дека некои од лицата кои се појавуваат како сопственици на овие објекти сега се милионери, а официјално се прикажани како градители на зградите уште од пред 5, 6, 10, па и 11 години.