Македонија
Филипче ќе се вакцинира во некоја од следните тури, втората пратка од Србија најавена за идната недела
Министерот за здравство, Венко Филипче, најави дека преостанатата количина на 4.000 дози од Србија треба да пристигне следната недела. Информацијата следува по вчерашниот разговор на министерот со претставници на компанијата „Фајзер“.
Присуствувајќи на почетокот на процесот на вакцинација во земјата, Филипче истакна дека сите пријавени 4.000 здравствени работници за првиот бран на вакцинација, кои работат со ковид-пациенти, ќе бидат вакцинирани.
Министерот образложи дека ќе се вакцинира во некоја од следните тури на вакцини, со цел да им покаже на граѓаните дека тоа е тоа што треба да го направат.
„Не сакам да им земам место од овие сега првични дози, кои навистина се изброени, на колегите што директно работат со пациентите, сигурно ќе се вакцинирам во некоја од следните тури на вакцините што ќе дојдат со цел да им покажам на граѓаните дека тоа е тоа што и тие треба да го направат“, изјави Филипче.
Додаде дека е многу важно граѓаните да се свесни оти вакцините се безбедни, без разлика од кој производител доаѓаат, дека се развиени на безбедни платформи и ова е единствениот начин да ја смениме сликата на пандемијата, и не само ние, туку сите земји во светот.
„Системот добро функционира. Се почнува со земање анамнестички податоци, краток преглед, административната работа, внесување на податоците за веќе закажаниот термин и закажување на следниот термин за ревакцинацијата по три недели и тоа интензивно се спремаше во овие изминати денови. Тука е поставена целата инфраструктура, дел од вакцините се чува и во овие фрижидери во модуларната болница. Може да седат до 5 дена на температура од 2 до 8 степени по што се раствораат и во рок од 5 часа мора да се аплицираат на тие што ја примаат. Ова е еден систем што исто така беше дел од тренингот. Посакувам успешна имунизација, направивме организација – еднаш кога ќе почне имунизацијата, да не запре. Ги очекуваме и следните количини според најавите и верувам дека во следните месеци ќе имаме навистина успешен процес на вакцинација“, информира Филипче.
Претходно денеска, со вакцините на „Фајзер“ први се вакцинираа двајца здравствени работници од Клиниката за инфективни болести и фебрилни состојби.
Станува збор за главната сестра Габриела Темелковска и примариус д-р Добринка Наунова-Јовановска – специјалист за невроинфекции од Инфективната клиника. Со денешното нивно вакцинирање практично почна имунизацијата против коронавирусот во земјата.
Филипче потенцира дека главната сестра Темелковска и докторката Наунова-Јовановска се дел од персоналот на Инфекивната клиника, кои во изминатата година деноноќно работеа и се бореа за спасување на секој човечки живот.
„Докторката Добринка и главната сестра Габриела се првите што ја примија вакцината на ‘Фајзер’. Денеска продолжува вакцинацијата на сите вработени на Инфективната клиника, а следуваат и вработените во сите ковид-центри, најпрвин во Скопје: ГОБ ‘8 Септември’, Институтот за белодробни заболувања кај децата во Козле, интерните клиники – сите што работеле и сѐ уште работат со ковид-пациенти. Понатаму, за време на викендот и болниците во државата, како и приватните болници“, истакна Филипче.
За денешниот ден предвидено е да се вакцинираат 260 здравствени работници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ѓорѓиевски: Градоначалниците или ќе го реализираат ветеното или предвреме да бидат отповикани
Претседателот на ЗЕЛС и градоначалник на Општина Кисела Вода, Орце Ѓорѓиевски учествуваше на панел-дискусијата ,,Гласот на граѓаните: Отповикување на градоначалникот како алатка за локална демократија”, во организација на Либералниот институт Скопје, на која говореа и Ристо Пенов, Никола Пановски и Висар Ганиу.
Ѓорѓиевски истакна дека имајќи го во предвид фактот дека сеуште зборуваме за населени места каде треба да се градат фекални и атмосферски канализации, како и целокупниот хаос во градот Скопје, можеме да заклучиме дека во изминативе 30-тина години имало и сеуште има градоначалници кои својот мандат го поминуваат во хибернација, и токму затоа ова мора да биде променето со законски измени за предвремено отповикување на одреден градоначалник.
-Многу пати нашите граѓани биле изманипулирани, ветувајќи им одредена реализација на програма од страна на некој функционер, и кај градоначалниците по нивниот избор согласно актуелната законска регулатива не може да понесат одговорност за работата за која се избрани. Се произлегува од волјата на граѓаните, и се може да заврши со волјата на граѓаните. Затоа секој градоначалник откако ќе биде избран, уште од првиот ден треба да биде свесен дека многу порано од истекот на мандатот може да биде отповикан. Затоа ние како ЗЕЛС заедно со невладините организации, експертите и сите останати чинители треба да поддржиме законски измени кои би придонеле по ажурна локална самоуправа, изјави Ѓорѓиевски.
Тој додаде дека активно се работи и на законските измени со кои би овозможиле одземање на ингеренции во дадена сфера на одредена локална самоуправа, со цел да не постои простор за злоупотреби или неажурност на било кој градоначалник.
Македонија
Северна Македонија избрана за членка на Советот за човекови права на Обединетите Нации за периодот 2025 – 2027
Со 168 гласа „за“, Република Северна Македонија денес стана нова членка на Советот за човекови права на Обединетите Нации за периодот 2025-2027, на изборот што се одржаа во Генералното собрание на ОН во Њујорк, информира МИнистерството за надворешни работи.
Поддршката од земјите членки на ОН е потврда за придонесот на нашата држава како посветен промотор и заштитник на човековите права и слободи.
Во својата објава на социјалните мрежи, министерот Муцунски нагласи дека една од главните цели по овој дипломатски успех ќе биде активното учество во Советот, придонесувајќи за глобална промоција на човековите права и подобрување на ситуацијата ширум светот, што е основа и на нашата кандидатура за членство
Во најновиот Национален извештај за Универзалниот периодичен преглед презентиран пред Советот за човекови права во Женева, нашата земја е високо на листата на земји кои ги почитуваат и гарантираат човековите права и оценета како квалификуван кандидат кој ги исполни неопходните услови за да биде дел од работата на ова меѓународно тело.
Инаку, според информацијата од МНР, Република Северна Македонија по вторпат е избрана за членка на Советот за човекови права, откако претходно членуваше во периодот 2014-2016.
Македонија
Стоилковиќ- Рокас: изразена поддршка кон реформските процеси во делот на заштитата на правата на етничките заедници
Потпретседателот на Владата и министер за односи меѓу заедниците,Иван Стоилковиќ денес оствари работна средба со новоименуваниот амбасадор на ЕУ во РС Македонија, Михалис Рокас.
На средбата стана збор за клучните прашања, приоритети, но и идните планови на Министерството за односи меѓу заедниците, како и соработката со ЕУ, со акцент на помалите етнички заедници во земјава.
„Како Министерство ни значи соработката со ЕУ од причина што помалите етнички заедници немаат друга адреса освен ЕУ, со оглед на тоа какво искуство имавме се надевам дека работите со ваша помош ќе ги исправиме“, рече на средбата Стоилковиќ и истакна дека е задоволен од тоа како се одвиваат работите во првите 100 дена.
Заклучокот на двајцата соговорници беше дека заштитата на етничките заедници е приоритет на Министерството за односи меѓу заедниците, како и дека постојат многу точки за кои може да се зборува, а, како што нагласи, амбасадорот на ЕУ Рокас нашата земја секогаш може да смета на помош и поддршка од Унијата.
Амбасадорот Михалис Рокас го изрази своето задоволство од, како што рече, храброста и решителноста на вицепремиерот и министер Стоилковиќ за изнесените податоци за затекнатата состојба во Министерството, и воедно ја изрази својата поддршка кон реформските процеси и приоритетите во делот на заштитата на правата на етничките заедници и нагласи дека не смее да има никакво оправдување и сето она што е злоупотребено треба да биде процесуирано.
Тема на разговор беа и економските прилики во земјата и фактот дека соработката меѓу балканските земји ќе придонесе за стабилноста во регионот, а придобивките ќе ги чувствуваат сите.
На крајот од средбата Стоилковиќ уште еднаш упати честитки до амбасадорот за назначувањето на новата функција и изрази уверување дека соработката, но и пријателските односи не само што ќе го задржат досегашното ниво, туку и ќе се продлабочат во наредниот период.