Македонија
Филков: На сторителите што трет пат ќе се најдат на суд за прекумерна брзина или возење под дејство на алкохол ќе им биде одземена возачката дозвола

Министерството за правда смета дека постои сериозна потреба за понатамошно разгледување и анализа на постојната законска регулатива. Фокусирани сме на утврдување на можни измени и дополнувања во законите, кои ќе придонесат за значително зајакнување на безбедноста на патиштата.
Министерот за правда Игор Филков во своето обраќање на јавната расправа ,,Анализа и утврдување на потребата за изменување на законската регулатива со цел зајакнување на безбедноста на сообраќајот“, посочи дека е потребно да се подобрат казнените одредби во однос на прекршителите, поткрепени со детална анализа на практиката на изрекување и спроведување на казните.
,, При изготвувањето на измени на законската регулатива, особено во делот на санкциите, потребно е да се постави прашањето: „Дали казните за прекршувачите на сообраќајните правила се соодветни и доволно ригорозни за да имаат одвраќачки ефект?“. Ова ќе ни помогне да идентификуваме кои области е потребно да се засилат со нови законски мерки, како што се алкохолот, брзината, користењето мобилни телефони и други ризични фактори”,рече министерот Филков.
Дополнително, според министерот одредени сообраќајни прекршоци треба да бидат регулирани како кривични дела. Во таа насока, потребно е да се иницираат законски измени кои ќе ја прошират листата на кривични дела против безбедноста во сообраќајот. Ова не се однесува само на тешките кривични дела кои вклучуваат опасност за животот и имотот на луѓето, туку и на прекршоците како што е неукажувањето помош на лице повредено во сообраќајна незгода.
,,Зачестеноста на сообраќајните деликти со висок степен на општествена опасност, заедно со ниското ниво на сообраќајна култура во нашето општество, создаваат силна потреба за заострување на казнената политика. Ова ќе обезбеди ефективни санкции за прекршителите, кои ќе имаат одвраќачки ефект и ќе помогнат во намалувањето на сообраќајните несреќи и нивните тешки последици”, порача Филков.
Министерот информираше дека заедно со Министерството за внатрешни работи, судии од Одделот за прекршоци во Кривичниот суд Скопје и универзитетски професори, работат на интензивна имплементација на новите законски измени во Законот за прекршоците, Законот за безбедност на сообраќајот на патиштата.
Новите измени и дополнувања во Законот за прекршоци ќе вклучуваат посебна постапка за прекршоци од областа на безбедноста на сообраќајот на патиштата, која ќе се однесува на прекршоците кои се детектирани преку електронски системи, како што е системот „безбеден град“ (safe city).
Овој систем ќе овозможи брзо и точно утврдување на прекршоците, со што ќе се намали бројот на несреќи и ќе се обезбеди побрза реакција на властите. Со оваа новина се предвидува кратки рокови за постапување пред судот, што ќе го забрза процесот на правдата.
За сторители кои по трет пат ќе се најдат на суд, а во случај на сериозни прекршувања, како што се возење под дејство на алкохол или прекумерна брзина, судот ќе изрече санкција која подразбира престанок на важење на возачката дозвола. Ова ќе значи дека возачот нема да може да стекне нова возачка дозвола додека не помине една година од правосилноста на пресудата.
Сите измени имаат за цел и се стремат да го намалат бројот на сообраќајните незгоди, особено оние кои резултираат со смртни последици, и да ги заштити животите на сите учесници во сообраќајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Ќе изумреме како диносаурусите aко не се справиме заедно“ – Марковски и Белчева најавуваат решение за депонијата Вардариште

Во близина на депонијата Вардариште во Скопје, кандидатот за градоначалник проф. Д-р Горан Марковски и носителката на кандидатската листа за советници Јана Белчева Андреевска од граѓанската платформа „Независни заедно“ одржаа прес-конференција, откако граѓаните протестираа поради повторното горење на депонијата.
„Ќе изумреме како диносаурусите, ако не се справиме со загадувањето“, изјави Марковски, додавајќи дека досегашниот проблем со Вардариште е резултат на недостиг на политичка волја, иако постојат стручни студии и акциски планови. Тој потенцира дека решението мора да биде стручно, вклучувајќи методи за собирање и користење на метанот од депонијата за производство на електрична енергија.
Белчева Андреевска нагласи дека реализацијата на усвоените стручни планови, како чистење на дивите депонии, рекултивација на Вардариште, модернизација на системите за гас и исцедок и зајакнување на селекцијата и рециклирањето, ќе донесе видливи резултати. Таа додаде дека планот треба да вклучува затворање на дивите депонии, 24/7 периметарска контрола со видео-аналитики, термални камери и дронови за откривање на нови истурања и жаришта, со интегрирани податоци и јавна отчетност.
„Нам сојузници во овие напори мора да ни бидат граѓаните кои се будни, свесни и бараат промени и ќе го дадат гласот за оние кои веќе биле активни, и ќе продолжат да работат за јавниот интерес – а тоа е чист воздух и здрава животна средина“, рече Белчева Андреевска.
Платформата „Независни заедно“ ги обединува независните советници и локални иницијативи од неколку општини во Скопје и има за цел враќање на локалната власт во рацете на граѓаните преку чесен, стручен и транспарентен пристап кон управувањето со јавниот интерес.
Македонија
Коњановски даде отчет за сработеното на повеќе од сто страници

На повеќе од сто страници градоначалникот на Општина Битола, Тони Коњановски ги сумираше резултатите од работењето на локалната самоупорва под негово водство.
Со одговорност, транспарентност и посветеност во извештајот стои дека се реализирани стотици капитални и локални проекти, насочени кон подобрување на инфраструктурата, образованието, културата, спортот и социјалната заштита.
Меѓу поважните инвестиции се осветлувањето на Широк Сокак, изградбата на влезовите во градот од Охрид и Скопје, нови велосипедски патеки, нов парк во Нова Битола, поставување фотоволтаици во десет училишта, изградба на нови детски градинки, реконструкција и изградба на над 50 километри улици и патишта, урбано зазеленување, како и бројни спортски и рекреативни содржини.
Во извештајот се потенцира дека Општина Битола добила 707 милиони денари од Владата за реализација на 65 нови проекти, од кои 14 од 16 се веќе започнати. Со тоа, според Коњановски, се потврдува насоката кон одржлив развој и европски стандарди во функционирањето на општината.
„Овој отчет е доказ дека визијата, преку стратешко планирање и упорна работа, може да се претвори во конкретни дела. Битола чекори напред со проекти кои оставаат траен белег за идните генерации,“ рече градоначалникот Коњановски.
Документот со отчетот е прикачен на веб страницата на Општина Битола и достапен е за сите граѓани.
Македонија
Алиу потврди дека Кардиохирургија не прави операции оти нема анестезиолози и најави ад хок решение: лекари од Словенија ќе ги пополнуваат празнините

Со билатерален договор за мобилност на лекари и медицински сестри меѓу Словенија и Македонија ќе се пополнуваат празнините во нашиот здравствен систем. Министерот за здравство Азир Алиу договорот го претстави како ад хок решение за недостигот од анестезиолози на Клиниката за кардиохирургија, каде што веќе неколку дена пациенти се жалат дека не се прават операции оти нема анестезиолог.
„Затоа денес имавме состанок да се направи билатерален договор меѓу Словенија и Македонија со цел да имаме мобилност на лекари и медицински сестри меѓу двете држави. Ценам дека ова ад хок решение ќе покрие дел од потребите. Билатералниот договор значи дека лекари и сестри од Словенија може привремено да работат тука, од три до шест месеци, и наши лекари и сестри да работат во Словенија. Тоа ќе значи пренос на знаења, нови методологии и технологии меѓу двете земји. Во ваков случај, како на Кардиологија, каде што во моментот се многу лимитирани за операции, проблемот ќе може да се надмине привремено, а за долгорочно надминување нам ќе ни требаат, за жал, години“, рече министерот Алиу, кој утрово имал состанок со директорот на словенечката Кардиохирургија.
Според министерот, здравството е доведено до сегашната точка поради лошиот пристап и лошото креирање политики. Најави дека отсега политиките ќе се креираат долгорочно, за најмалку десет години, колку што вообичаено е потребно да се создаде кадарот што сега го нема. Најави посебен пристап, кој ќе тргне уште од средното медицинско образование преку факултетот, специјализациите и супспецијализациите за да се направи проектирање на капацитетите за најмалку десет години.