Македонија
Фински искуства како поддршка во креирање и спроведување автентичен модел на образованието
Во согласност со сите параметри и показатели што го одредуваат нивото на квалитет, финскиот образовен модел е еден од најдобрите во глобални размери. Најрелевантен показател се постигнувањата на финските ученици на најпознатите и најпрестижни меѓународни тестирања и натпревари каде што тие се секогаш меѓу прворангираните. Тоа е потврда за стекнатите знаења и вештини на финските ученици во тамошните училишта, велат од Министерството за образование.
Додаваат дека Северна Македонија како земја во развој има тенденција да ги следи глобалните образовни трендови, а благодарение на нововоспоставената билатерална соработка помеѓу двете земји, Министерството за образование и наука и другите институциите на системот во државава што работат во оваа област добиваат поддршка од финските.
Во таа насока, денес беше организиран и еднодневен вебинар, на кој беа споделени фински образовни искуства како поддршка на реформите во основното образование во нашата земја. На вебинарот учествуваа министерот за образование и наука, Јетон Шаќири, и раководителите на повеќе сектори во МОН, како и претставници од Бирото за развој на образованието, од Педагошката служба и од повеќе основни училишта во државата. А од другата страна претставници беа финскиот амбасадор за Република Северна Македонија, Кимо Лахдевирта, советници во финската Национална агенција за образование, професори од финскиот Универзитет за едукација на наставен кадар „Оулу“, како и низа образовни експерти.
Повеќе теми беа предмет на дискусија, но фокусот најмногу беше ставен на градењето мрежа на училишта што континуирано ќе се заложуваат за подигнување на конкурентноста и со какви стимулативни мерки тие да бидат поддржани од надлежните институции на системот. Претставниците на Финска го споделија искуството за подготовката на нивната национална стратегија.
Во своето воведно обраќање на вебинарот, финскиот амбасадор Кимо Лахдевирта истакна дека развивањето на целиот образовен систем бара време.
„Во Финска реформирањето на образовниот систем сè уште трае. Станува збор за единствена комбинација од разни фактори, така што секоја земја што се стреми да ги следи финските чекори треба да ја види поголемата, сеопфатна слика. Финска е подготвена да го сподели своето знаење и оттаму веруваме дека за образованието меѓународната соработка е од клучно значење“, истакна Лахдевирта.
Министерот за образование и наука, Шаќири, изрази голема благодарност до претставниците од финските образовни институции за отвореноста да ѝ помогнат на нашата земја да напредува во процесот на креирање и спроведување автентичен концепт за современо образование.
„Во период кога Северна Македонија е насочена кон имплементација на крупни реформи, особено во делот на основното образование, многу ни е важно да ги чуеме искуствата на оние што всушност ги диктираат глобалните образовни трендови. Ние и досега учевме од Финска. Сме го анализирале финското образование, но оваа непосредна комуникација е најдобар начин за запознавање со политиките шт вие ги креирате и спроведувате, а тоа многу ќе ни помогне“, рече Шаќири.
Двете страни дискутираа и за важноста да се поседува стратегија за мотивација и обука на наставниот кадар за организирање што повеќе креативна и интерактивна настава за што неопходно е вложување во нивните дигитални вештини, обезбедување ИТ-технологии и дигитални и интерактивни материјали за учење.
Министерот Шаќири рече дека МОН во последните две-три години посветува големо внимание на наставниот кадар, кој е всушност најважната алка во процесот на едукација потенцирајќи дека и најдобрите реформи хартија не би успеале доколку училиштата не поседуваат квалитетен, добро обучен и мотивиран кадар за работа.
„Затоа и ги зголемивме нивните плати над 20 проценти во изминатиот период, а воведовме и можности за кариерен напредок. Работиме на тоа да имаат подобри услови за реализирање на наставата, а особено сме посветени на обезбедувањето континуирани обуки за професионален развој“, рече Шаќири.
На крајот од семинарот се дискутира и за креирањето политики за заштита на учениците од сите облици на насилство, особено од насилството преку интернет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Муртезани, поранешниот генерален директор во МЕПСО и МЖ е кандидат за министер за европски прашања на Алтернатива
Орхан Муртезани е кандидатот од Алтернатива за министер за евроинтеграции, додека Љуљзим Алиу е предложен за заменик министер за образование, а Сафије Садики Шаини за заменик министерка за односи меѓу заедниците, информира Алтернатива.
Муртезани е поранешен генерален директор во МЕПСО и во Македонски Железници – Транспорт, како и актуелен секретар за односи со јавноста и портпарол на Алтернатива.
На оваа средба се разговарало и за кандидатот за заменик министер за образование и наука, при што исто така едногласно било одлучено да биде проф. д-р. Лулзим Алиу, универзитетски професор и продекан на Педагошкиот факултет, поранешен заменик министер за образование, а моментално секретар на Секретаријатот за стратегиски политики во Алтернатива.
„Бидејќи Алтернатива презеде одговорност и за заменик-министерот во Министерството за етнички заедници, за ова име Централното претседателство едногласно одлучи кандидат на Алтернатива за оваа функција да биде Сафије Садики Шаини – универзитетски професор, поранешен пратеник и потпретседателка на Алтернатива“, стои во соопштението.
На средбата се разговарало и за оставката на поранешниот претседател на Алтернатива, Африм Гаши, кој е избран на функцијата Претседател на Собранието на Република Северна Македонија.
„Судејќи дека во интерес на партиското претставување е партијата да има претседател со полн легитимитет, Централното претседателство на Алтернативата одлучи да му предложи на Централното собрание да донесе одлука за организирање на вонреден конгрес за избор на новиот претседател на Алтернатива“, соопштија од партијата.
Македонија
Лифт потиснал и заробил куче, го спасија пожарникари од Прилеп
Центарот за управување со кризи информира за несекојдневна ситуација во Прилеп каде пожарникари спасиле куче заглавено во лифт.
„Пожарникарите од ТППЕ Прилеп, покрај гасењето на пожарите во населени места и на отворено имале имале уште една помала техничка интервенција за безбедно извлекување на куче коешто било потиснато и заробено од лифт во ООУ ‘Кочо Рацин’. Интервенирано е со едно возило и двајца пожарникари“, велат од Центарот за управување со кризи.
Македонија
Филипче: Младите бараат нешто ново, не бараат ригидна партиска структура
„Сметам дека оваа организациска поставеност на партијата го дала својот максимум во некои минати времиња. Луѓето бараат нешто ново. Младите бараат нешто ново, не бараат ригидна партиска структура во којашто ќе слушнат наредба во која не учествувале. Сакаат да дадат свој придонес. А ќе дадат свој придонес кога ќе може да комуницираат на соодветен начин и соодветно ќе бидат вклучени и вреднувани“, истакна Венко Филипче на првата од осумте партиски трибини во рамки на кампањата на СДСМ за избор на претседател.
Тој рече дека е овој модел на организација мора да се менува со цел да се прилагоди на потребите и начините на комуникација на луѓето во денешно време, но и да се обезбеди поголема и постојана вклученост на членовите.
Филипче смета дека е потребно основата на политиките и одлуките да доаѓаат од најниско кон највисоко ниво, каде на база на реалните потреби на граѓаните понатаму ќе обликуваат решенијата.
„Најголемиот проблем со којшто се соочивме изминатиот период и кое луѓето најдиректно ни го кажуваат е дека имале затворени врати. Едноставно не можеле да си ги кажат ни барањата, ни потребите и идеите. И што прават луѓето? Нормално се повлекуваат. Така да ако се отвори партијата, ако се симне структурата кон општинските организации каде што ќе се градат политиките и после тоа дојдат до централното ниво каде што понатаму ќе се дообликуваат е вистинскиот пристап. Само така ќе можеме да кажеме дека сме креирале политики согласно реалните потреби на луѓето“, рече Филипче.