Постапка за избор на фирма, која ќе ги печати свидетелствата – има, но дали учениците ќе ги добијат на време – нема конкретен одговор од министерот за образование, Јетон Шаќири. Тој посочи дека тоа е обврска на Бирото за развој на образованието. Министерот само посочи дека се надева оти учебниците нема да доцнат.

„За свидетелствата одговорноста е во Бирото за развој на образованието. Јас како министер имам побарано пред еден месец и веќе имаат почнато постапка за економски оператор. Се надевам дека ќе заврши навремено. Истото прашање треба да го поставите во Бирото за развој на образованието. Во врска со учебниците, постапките за трето одделение завршија. Имаме време да ги одобриме. Постапките за шесто одделение веднаш се пуштени на повик за автори. Веќе имаме одобрени учебници за повеќе одделенија, што претходната година беше процес на одобрување“, рече Шаќири.

Минатите две години учениците добиваат свидетелства во септември наместо во јуни, како што е пракса. На крајот од учебната година свидетелства добиваа само учениците на кои документот им беше потребен за префрлање од училиште во училиште или за запишување на средно или факултет.