Македонија
Форензичката лабораторија на МВР прва во регионот акредитирана според новите ISO-стандарди

Директорот на Бирото за јавна безбедност, Сашо Тасевски, денеска оствари средба со директорот на Институтот за акредитација, Слободен Чокревски, на која беше врачен сертификатот за реакредитација на системот за управување со квалитет согласно меѓународниот стандард MKC EN ISO/IEC 17025:2018, имплементиран од страна на Одделот за криминалистичко-технички испитувања и вештачења (ОКТИВ), со што овој оддел е прва форензичка лабораторија во нашиот регион, која ја потврди акредитацијата согласно барањата на стандардот за компетентност на лаборатории за тестирање.
Од ресорното министерство објаснуваат дека акредитацијата на форензичките лаборатории е од огромно значење, за државата генерално, заради зголемување на довербата во резултатите од тестирањата кои се спроведуваат во лабораториите на МВР, како и фактот дека методите кои се применуваат се хармонизирани со најдобрите европски практики, а добиените резултати се меѓународно признати.
„Придобивки од акредитацијата, исто така, ќе има и правосудниот систем во државата, бидејќи услугите кои ги нудат форензичките лаборатории се клучни во сите постапки на судовите и обвинителствата, а бенефит од сето тоа ќе имаат и граѓаните, како крајни корисници на услугите, бидејќи ефикасноста на сите судски постапки неможе да се замисли без навремено, квалитетно и стручно спроведување на потребните анализи и вештачења“, се наведува во соопштението.
Инаку, системот е имплементиран во 2019 година, а во текот на годинава, од страна на оценувачки тим од шест експерти, формиран од страна на националното тело за акредитација – Институтот за акредитација на РСМ, беше спроведен редовен годишен надзор во однос на акредитацијата на ОКТИВ и беше потврдена компетентноста на овие лаборатории и експертите кои работат во нив за спроведување одреден тип форензички анализи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Кирков: ЈСП е пример за тоа како е да се работи недомаќински

На денешната седница на Советот на Град Скопје се обрати советникот од редовите на ВМРО-ДПМНЕ, Стефан Кирков.
Кирков истакна дека по посетата на Јавното сообраќајно претпријатие, сликата била застрашувачка, со што повеќе од 200 автобуси стојат нефункционални и неупотребливи, без притоа да се поправат.
„Заедно со колегата Тони Бојковски од Советот на Град Скопје направивме посета во ова јавно претпријатие и она што го видовме навистина нѐ вџаши. Повеќе од 200 расипани автобуси стојат подолго време на паркинзите на ова јавно претпријатие и покрај тоа што овде се случува тотален хаос“, рече Кирков.
Кирков додава дека ова јавно претпријатие работи недомаќински и ги повика институциите да направат целосна ревизија, со цел да се утврди кој е причинител за ваквата катастрофална ситуација на ЈСП.
„Оттука, се прашувам, иако сѐ е изгласано од страна на советниците, зошто ова јавно претпријатие апсолутно во последните три и пол години работи недомаќински и алармирам и од оваа позиција овде ги повикувам сите јавни и државни институции да направат целосна ревизија и да се утврди одговорноста за тоа кој придонесе ова јавно претпријатие да се наоѓа во ваква ситуација. Скопјани треба да бидат мирни, јавниот превоз и целиот град Скопје ќе доживее една поубава слика“.
Македонија
Филипче од лежалка меѓу две јахти пишува статуси за економијата или телефонот му е кај Фрчкоски, велат од ВМРО-ДПМНЕ

Класична СДС матрица на лаги и дефокус. Последниот човек кој може да зборува за економија е Венко Филипче. Под него, Заев, Артан, Бујар и Али, Македонија ја виде најголемата сиромаштија најскапата струја, најскапото гориво и најголемите корупциски афери, велат од ВМРО-ДПМНЕ откако на социјалните мрежи се огласи лидерот на СДСМ Венко Филипче.
Народот, додаваат од партијата на власт, плаќаше со живот и празни џебови, а тие си полнеа сметки и договараа политики на јахти.
Според ВМРО-ДПМНЕ, денес Филипче зборува за „достоинство“, а токму тој и неговиот ментор, како што велат, ја понижија државата и ја симнаа СДС од втора на четврта партија.
Го прашуваат Филипче: „кога толку глуми загриженост за државата, зошто не им каже на своите 6% поддржувачи колку чини еден ден возење на јахтата? Тука зборуваме за материјалната цена во евра, не за фактот кој одамна е познат, дека тоа возење е само симбол на неговата заложеност кон менторот и сопственикот на јахтата.
За да му ги скратиме маките, еве ја сметката: Гориво: 1800 €; Екипаж: 500 €; Одржување: 250 €;
Марина / сидрење: 200 €; Вкупно: околу 2750 € на ден.
Без да ги пресметаме и скапите ручеци и „ужинки“, какви што има дводецот што го води СДС. Со храна и пијалоци, сумата оди и до 6–7000 € дневно.
За десетина дена тоа преку 70000 евра луксуз.
А за 30 дена, колку што летово поминуваат на јахтата и по грчките плажи и острови, а и по други земји, нека пресмета кој сака сам, колку чини сето тоа“.
Затоа, додаваат од партијата на Мицкоски, пред да глуми дека се грижи за народот, Филипче нека објасни како е можно да се трошат толку пари на јахти и дали мирно спие кога сите во државата знаат дека токму тој хедонистички двоец е одговорен за сиромаштијата, галопирачката инфлација и разурнатата економија.
„Додека народот преживуваше, тие купуваа јахти и си планираа луксузен живот со украденото од народот богатство.
Затоа, Филипче прекини!
Засрами се! Ако воопшто знаеш што е срам“.
Македонија
Шукова: ВМРО-ДПМНЕ брутално ги осквернави идентитетот и архитектурата на Скопје, време е да му го вратиме ликот на вистинска метропола

„Време е на Скопје да му го вратиме ликот на вистинска метропола, град кој ќе биде пристапен и функционален“, порача денеска кандидатката за градоначалник на Град Скопје од СДСМ Каја Шукова. Според нејзината визија за центарот на градот, се предвидува затворање на сообраќајот и ставање на јавниот простор во функција на пешаците, туристите, велосипедистите, не на автомобилите.
„Време е на Скопје да му го вратиме ликот на вистинска метропола – град кој ќе биде пристапен и функционален. Мојата визија за „Мал ринг“ е суштинска промена на центарот на градот. Проект кој подразбира затворање на мал ринг за сообраќај, адаптиран за пешаците и велосипедистите. На Рекорд ќе има дозвола за превоз само за ЈСП и специјални возила. Ќе го заживееме јавниот простор со урбана опрема и ќе воведеме посебни содржини. Центарот многу брзо ќе го добие ликот како што заслужува нашето Скопје и ќе го врати сјајот на метропола“, рече Шукова.
Порача дека Скопје сега е задушен град поради неуспешните импровизации на ВМРО-ДПМНЕ и нивната градоначалничка Данела Арсовска.
„Централното градско подрачје, познатиот „Мал ринг“ кој е срцето на Скопје, сега е задушен, поради деструктивните импровизации на ВМРО ДПМНЕ и незаинтересираноста на нивната менаџерка Данела Арсовска. ВМРО ДПМНЕ брутално го осквернави идентитетот и архитектурата на Скопје – скапо платен со народни пари, а со трајни последици по јавниот простор. Денес, строгиот центар на Градот е задушен од објекти, прекумерен сообраќај и без соодветна инфраструктура за пешаците и велосипедистите. Тоа време мора да остане зад нас! “, изјави Шукова.