Седумдесет и два медиума влегоа во првата фаза за резултатите од креирањето регистaр на професионални онлајн медиуми.

Во овој регистар, во кој влезе и новинската агенција „Макфакс“, се онлајн медиумите кои имаат транспарентна сопственичка структура, кои објавуваат информативни содржини, кои ќе објават банер со коj се обврзуваат дека ќе ги почитуваат професионалните стандарди, а ќе ги објавуваат и одлуките на Советот за етика. Дополнително, тие би требало да имаат ценовници за реклами, да се регистрирани на мк домејн, да имат најмалку еден уредник и двајца вработени.

Регистарот е направен со цел читателите да знаат дека медиумот ги почитува стандардите и да се избегне ширењето дезинформации, пропаганда и лажни вести, а од почетокот на јануари ќе биде во функција веб-платформата www.promedia.mk, на која ќе има детали за сите членки.

Регистарот „Промедиа“ беше изработуван половина година од страна на Советот за етика на новинарите на Македонија, Здружението на новинарите, а во соработка со Стопанската комора.

„Ова e отворен инклузивен процес, не е конечен. Ова не значи дека по оваа прва фаза, понатаму нема да бидат, ова е фаза, жив процес. Ние како новинари сме способни сами да си го исчистиме сопствениот двор“, рече Катерина Синадиновска, претседателка на СЕММ.

Според претседателот на ЗНМ, Младен Чадиковски, ова е бескраен процес кој ќе трае.

„Промедиа не ја направивме само за бизнисмените, за да се спречат заканите од уценувачите, туку и за граѓаните, да ги препознаат оние што шират пропаганда и да знаат кому да веруваат, а за политичарите, еве шанса да покажете дека ги цените професионалните стандарди“, рече тој.

Некои од порталите кои не се опфатени со регистарот, а покажале желба да бидат дел од него, имаат рок од 3 месеци да почнат да ги применуваат стандардите, беше речено на прес-конференцијата.