Македонија
Хаос на скопскиот аеродром – одложени, па откажани летови до Македонија
Стотици заглавени патници, неизвесност, потрага по алтернативи. Вака им изгледаат патувањата изминативе денови на низа граѓани, кои требаше да се вратат во Македонија, но и на туристи што планираат да ја посетат Македонија. Вчера, откажани се 13 лета на авиони што требаше да слетаат на скопскиот аеродром. Причината е густата магла. Има и такви, кои наместо во Македонија, слетаа во Косово. И денешниот ден почна така, со откажување на летот од Шведска за Македонија. На аеродромот останаа иселеници, посетители, но и патници што само транзитираат преку Македонија. Меѓу нив има и родители со бебиња и деца.
Како и за другите летови, така и за летот од Шведска за Македонија постоеше обид да се остави време за да се подобрат временските услови пред да се полета. По три одложувања, стигна и известувањето дека летот целосно се откажува. Некои од патниците целосно го откажаа патувањето, а оние што мораа да стигнат веќе утре во Македонија – бараа алтернативи. Првиот следен лет што им беше понуден за Македонија е в петок. За да не чекаат четири дена, повеќето се одлучија да го променат летот и да патуваат во Белград или Софија – дестинации за кои веќе вечерва има лет во попладневните часови. Бидејќи летовите се доцна попладнево, патниците половина ден ќе треба да го поминат на аеродром. Слетувањата во соседните земји се во доцните ноќни часови, а од таму сами ќе треба да најдат начин како ќе стигнат во Македонија.
Авионите што утрово треба да полетаат од Македонија, според веб-страницата на ТАВ, тоа го прават со задоцнување. Вчера имаше десет откажани лета. Утрово само едно полетување. И за денеска има десетина нови лета што се во неизвесност поради временските услови. До 10 часот утрово има три потврдени лета за кои извесно е дека ќе полетаат за Македонија, но не се знае дали ќе имаат можност да слетаат или ќе се упатат на аеродромите во близина.
Проблемите со летовите почнаа пред три дена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.