Македонија
Христова за иселувањето: Колеги од власта дали ги вративте сопствениците на чевлите кои ги остававте пред Влада?

На почетoкот на мојот говор ќе ја поздравам целата македонска дијаспора, онаа која немала некакви придобивки од овој министер и онаа која не заминала во белиот свет затоа што не си ја сака државата, туку заминала од мака и во потрага за подобар живот, вели пратеничката на ВМРО-ДПМНЕ, Даниела Христова од собраниската седница на која на дневен ред е разрешувањето на министерот без ресор задолжен за дијаспора, Џемаил Чупи.
Христова, од говорницата, ги праша пратениците од владејачкото мнозинство дали ги вратија сопствениците на чевлите кои пред неколку години, во периодот кога беа во опозиција, ги оставаа пред Влада.
Секако посочи, Христова, дека не ги вратија, напротив, младите во Македонија се повеќе се иселуваат, затоа што власта не направи ништо за да ги подобри условите за живот, а масовно иселување допрва ќе се случува, затоа што погубните политики на владата се неподносливи.
„Втори, сакам да ги запрашам колегите од власта, чевлите што ги остававте пред Влада пред неколку години, дали ги вративте назад нивните сопственици, дали ги подобривте условите за живот, дали ја подобривте економската состојба од тогаш до денес? Што подобривте во државата за да ги вратите сите оние кои што заминаа и ни избегаа по туѓите земји? Ништо! Напротив, откако СДСМ и ДУИ се на власт бројката од 600 илјади тогаш, до денес е уште поголема. А, последните анкети на граѓаните зборуваат дека допрва ќе се случи масовно иселување, затоа што погубните политики на оваа Влада се веќе неподносливи“, истакна Христова.
Посочи дека ова не го зборува на памет, туку тоа го покажуваат сите релевантни истражувања, како што е и последното на ИПИС, резултатите од кое покажуваат дека нај работоспособното и нај продуктивното население планира да си замине од Македонија.
„Неодамнешната анкета на ИПИС зборува дека 45,3% од младите до 29 годишна возраст, размислуваат за иселување. А, исто голем е процентот од 44,3 на возраст од 30-39 години кои би ја напуштиле Република Македонија. Нај работоспособното и нај продуктивното население во државата би си заминало. Затоа што нема никаков просперитет и никаква иднина во родната земја, затоа што при вработување кај нас не се гледа ниту способноста, ниту компетенциите кои ги поседуваат младите, туку пред се се гледаат роднинските врски со функционерите на власта, се гледа партиската припадност и партиската послушност“, рече меѓу другото Христова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.