Македонија
Царовска: Да ги научиме децата дека сите сме еднакви со различни потреби и можности
Министерката за образование и наука, Мила Царовска, по денешната посета на ПОУ „Д-р Златан Сремец“ , рече дека образовниот систем треба од една страна да ги пресретне потребите на децата со попреченост, а од друга, да ги подготви сите деца да ги прифатат и заеднички да разговараат за различните потреби на другите деца со попреченост.
„Се трудиме да создадеме образование кое ќе ги поттикне сите ученици да го постигнат својот максимален потенцијал. Специјалните училишта согласно Закон за основно образование треба до 2023 година да прераснат во ресурсни центри коишто ќе го поддржуваат инклузивното образование во сите редовни училишта. Токму затоа, пред две недели донесовме правилник и упатство на кој начин треба да се одвива соработката меѓу регуларните училишта и специјалните училишта, понатаму ресурсни центри, на кој начин и во која динамика. Полека се подготвуваат специјалните училишта за оваа трансформација, затоа што секое дете треба да биде изложено на максимално добра развојна средина, опкружено со различни од себе, за на тој начин се стимулира да ги прифати различните од себе. Секое дете да може разбере дека сите сме еднакви но едноставно имаме различни потреби и различни можности“, изјави Царовска.
За првпат образовните асистенти во учебната 2021/2022 ќе бидат финансирани од буџетот и сместени формално во образовниот систем. И капиталните инвестиции во МОН се врзуваат со инклузивноста. Во повикот до општините за проекти кои ќе влезат во листата за инвестиции за наредната година, МОН како главен услов постави или објектот којшто треба да се реконструира да биде инклузивен и да има обезбедено пристап до сите простории или во самиот проект да биде предвидена инвестиција за пристапност за да може да добие финансиска поддршка. Министерката Царовска укажа дека на ваков начин директно и системски се инвестира во подобрување на инклузивноста на училишните згради.
За зголемување на инклузивноста во образованието, МОН работи на две програми со Европската делегација. Со првата, 12 образовни објекти, по 4 од основно, средно и високо образование, ќе бидат реконструирани и ќе добијат пристапни рампи и пристапност до просториите, со средства од ЕУ. Исто така, доделени се и 287 стипендии за деца со попреченост коишто се вклучени во редовното образование, за прво и второ одделение, со цел да се поддржат семејства и учениците со основните материјали коишто им се потребни.
Градоначалникот на општина Кисела Вода, Филип Темелковски, истакна дека иако ова специјално училиште е во надлежност на државата сепак локалната самоуправа во партнерство со МОН дава неизмерна поддршка во обезбедување на подобри услови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Времето денеска сончево и потопло
Времето денеска во земјава ќе биде претежно сончево и потопло, попладне во планинските подрачја со услови за краткотраен пороен дожд и ретки грмежи. Ќе дува слаб ветер од јужен правец. Минималната температура ќе биде во интервал од 3 до 10, а максималната ќе достигне од 18 до 25 степени.
Во Скопје претежно сончево и тивко. Минималната температура ќе се спушти до 7, а максималната ќе достигне до 24 степен.
Утре времето ќе биде претежно сончево и топло, попладне во планинските подрачја со услови за краткотраен пороен дожд и ретки грмежи. Во вторник попладне ќе има локална појава на нестабилност, а во среда и четврток под влијание на нов влажен бран во поголем дел од земјава ќе има пороен дожд и грмежи, локално во форма на невреме со пообилни врнежи и засилен ветер.
Македонија
Православните верници го слават Велигден
Православните верници денеска го слават најголемиот христијански празник Велигден – Христовото воскресение, ден кога Исус Христос ја докажал својата божествена моќ и воскреснал од мртвите. Воскресението Христово на полноќ беше објавено во сите храмови на Македонската православна црква, а денеска се одржуваат воскресенски литургии.
Поглаварот на МПЦ-ОА г.г. Стефан богослужеше во Соборниот храм „Свети Климент Охридски“ во Скопје од каде го објави Христовото Воскресение и упати Велигденски пораки.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.