Македонија
Царовска до наставниците: Вие сте најважната алка во образовниот процес

Признанието просветен работник на годината за учебната 2019/2020 година го добија професорите Штефица Ујчик од Куманово, Добри Јовевски од Крива Паланка, Марјан Радески од Охрид и педагогот Маринела Бошева од Скопје. Министерката за образование и наука, Мила Царовска, честитајќи им на наставниците што со својот труд, креативност, иновативност и посветеност кон децата вклучени во училишно и предучилишно образование оставиле посебен белег, им посака и понатаму да останат високо мотивирани за работа и креативни.
„Ви посакувам да бидете инспирација на уште многу генерации на млади и пример за колегите. Лично сум уверена дека имаме многу вакви наставници во државата. Со многу од нив и лично се сретнав и видов кај нив желба да придонесат кон градењето квалитетен образовен систем и кон создавањето генерации што ќе гарантираат добра иднина за нашата држава“, рече Царовска на денешното доделување на признанијата.
Особено важно е во услови на пандемија просветните работници да не покажат слабост и немоќ, туку со целиот свој капацитет да се заложат воспитно-образовниот процес непречено да се одвива и во вонредни околности какви што сме немале никогаш досега.
„Затоа, просветните работници се и најважната алка во образованието. Како министерка за образование и наука, ќе продолжам да се борам за унапредување на дигнитетот на професијата наставник и секој што избрал да биде учител на нашите деца, да го добие местото што и го заслужува“, нагласи министерката Царовска.
Лидија Николовска-Георгиевска, претседателка на Сојузот на просветните работници, истакна дека оваа награда се доделува традиционално секоја година, а ја добиваат наставници и други просветни работници, кои имаат значаен придонес во образованието и воспитувањето на децата.
„Изборот на добитниците го прави Сојузот. Всушност, самите просветни работници одлучуваат кому ќе му го доделат признанието“, рече Николовска-Георгиевска.
На средбата беше истакнато дека секое решение во образованието се креира преку инлузивен пристап, со учество на сите засегнати страни, вклучително и наставниците. Министерството за образование и наука со поддршка на просветните работници ќе продолжи и во периодот пред нас затоа што од личната мотивираност и желба за работа на секој наставник најмногу зависи какви генерации ќе создадеме.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски од Чучер Сандево: Да излеземе масовно на 2 ноември и да го заокружиме бројот 9 за развој и напредок

Претседателот на ВМРО-ДПМНЕ, Христијан Мицкоски, се обрати од денешниот настан одржан во Чучер Сандево, во рамки на вториот круг од локалните избори закажани за 2 ноември 2025 година, под слоганот ,,Вистинскиот избор! Твојот човек! Твоето место! За твојата иднина!“.
Мицкоски во својот говор ги повика граѓаните во вториот круг да излезат на гласање, да учествуваат во креирањето на политиките и да го заокружат бројот 9.
„Би сакал да упатам неколку политички пораки за да можат граѓаните самите да донесат заклучок и одлука по кој пат ќе ја водиме државата, дали ќе ја водиме државата по патот којшто го нуди коалицијата ВМРО-ДПМНЕ или ќе се вратиме на патот којшто го гледавме 7 години, тоа бешe сосема поинаква коалиција предводена од СДСМ и ДУИ или пак третата група ќе останеме дома па ќе видиме каде ќе не води бранот ние заедно со бранот и ќе немаме можност да одлучуваме, што сметам дека е најпогрешната опција. Затоа што ако се остане дома и не се излезе на избори и не се гласа по сопствено убедување тогаш вие дозволувате друг да одлучува за вас и за вашата општина и насоката во која ќе оди државата. Мојата молба до сите жители на Чучер Сандево и генерално до сите граѓани во Македонија е да излезат првично на овие избори првиот круг таму каде што ќе се гласа и да гласаат по сопствено убедување“ нагласи Мицкоски.
Мицкоски ги повика функционерите постојано да бидат достапни на граѓаните и да испорачаат резултати.
„Втора работа која сакам да ја кажам е дека на овие избори во првиот круг се донесе одлука за 33 градоначалници од редот на ВМРО-ДПМНЕ и коалицијата и тоа е бројка која е импресивна и уште во 26 општини ВМРО-ДПМНЕ се или на прво место или на второ што значи 59 општини плус Градот Скопје тоа претставува историски резултат политички но и голема обврска во смисла дека очекувањата на граѓаните се големи. Ние сме народна партија, партија која што треба да биде слуга на граѓаните на народот. Тоа значи дека нема одмор и треба да се работи секој ден во неделата бидејќи имаме многу да сработиме нема работно време се почнува рано се завршува доцна секогаш треба градоначалникот да биде достапен. Секој од избраните од народот функционери треба да биде достапен и секогаш да одговара на потребите на граѓаните. Тоа е втората порака која сакам да ја упатам“ кажа Мицкоски.
Македонија
ВМРО-ДПМНЕ ги демантира како лаги и глупости изјавите за мигрантски кампови: „СДСМ да се реформира“

ВМРО-ДПМНЕ остро регира на денешната прес-конференција на Богданка Кузеска од СДСМ, која побара премиерот Христијан Мицкоски јавно да одговори дали за време на посетата на владината делегација во Велика Британија било разговарано за прифаќање мигранти и отворање мигрантски кампови во Македонија.
Од ВМРО-ДПМНЕ ваквите настапи на СДСМ ги опишаа како правење штета на државата, а на социјалдемократите им порачаа да се реформираат.
„Реформирајте се, ставете прст на чело, погледнете се во огледало и престанете да правите штета на државата и како опозиција со истите и повторно истите бесмислености“, се вели во реакцијата.
Со вакви лаги, велат ВМРО-ДПМНЕ, не се добива доверба кај граѓаните.
„И после едвај 120 илјади гласови добиени додека се на пат на пасокизација, да ја доживеат судбината на левата грчка партија која се распадна, СДСМ продолжува со истите глупости и измислици“, додаваат.
Македонија
Aрсовска: Советниците од ВМРО/ВЛЕН не ги гласаа програмите на „Комунална хигиена“

Градоначалничката Данела Арсовска рече дека нашла над 10 седници на Совет каде советниците од ВМРО-ДПМНЕ и Влен не ги гласале програмите на Комунална хигиена Скопје, како одговор на тврдењето на ВМРО-ДПМНЕ дека сите одлуки предложени од Арсовска и поврзани со претпријатието биле усвоени од страна на нивните советници.
„Во Градот Скопје стотина одлуки на повеќе од десет седници на Советот, советниците од ВМРО/ВЛЕН не ги гласаа програмите за работа на ЈП ‘Комунална хигиена – Скопје’ и останатите јавни претпријатија со што директно беа блокирани клучни услуги за чистење и одржување на градот“, вели Арсовска.
Додава дека граѓаните на Скопје заслужуваат конструктивна соработка, одговорни одлуки и политички субјекти кои ќе го стават интересот на граѓаните пред партиските калкулации.