Опфатот на деца во детските градинки во нашата држава е низок, изјави денеска министерката за труд и социјална политика, Мила Царовска, која присуствуваше на предавањето во употреба на новата детската градинка во ООУ „Рамо Левката“ во Прилеп.

„Децата на возраст од 0 до 6 години опфатени се само со 29 проценти, а нешто поголем, 35 отсто, изнесува опфатот на деца од 3 до 6-годишна возраст. Нашата интенција е овој број да се зголеми, да се прошири капацитетот на предучилишното образование во државата, со цел што повеќе деца да имаат пристап. Руралните средини, одредени региони, има општини каде што нема ниту еден објект и тоа е така затоа што не сме се грижеле овој капацитет да стане реалност. Токму тоа го правиме – општините аплицираат, очекуваме дека 50 проценти ќе го зголемиме бројот на деца во градинките“, изјави Царовска.

Таа потенцира дека системот за детска заштита со години бил запуштен, дека се отворале градинки, кои всушност не се отворале. Како што истакна министерката, постоеле фотографии кои кажуваат како претходниот градоначалник се сликал во истата таа градинка, иако таа се отвора денеска, и тоа по многу технички интервенции направени од страна на новиот градоначалник Илија Јованоски.

Во изминатиот период во градинките во Република Македонија отворени се 500 нови работни места, а приоритет на Владата ќе биде, како што рече Царовска, изградба на градинки во руралните средини.

Градоначалникот на Прилеп, Илија Јовановски, изјави дека го радува тоа што во Прилеп ќе се намали бројот на деца што чекаат да бидат примени во детска градинка.

„Заедно со Министерството за труд и социјална политика интензивно работевме во изминатите неколку месеци за да се опреми оваа градинка со инвентар и кадар и мислам дека сите треба да бидеме задоволни од она што денеска го имаме. Идните основци кои ќе почнат да одат на училиште, овде ќе се социјализираат и ќе бидат спремни за на училиште. Со години недостигот на градинки, особено последниве десетина, е огромен. Затоа, со Министерството се заложивме да се изгради оваа градинка во која ќе бидат згрижени стотина деца, а на ред чекаат уште 400“, изјави градоначалникот Јованоски на денешното предавање на новата детска градинка.

Јованоски напомена дека во тек е постапка за изработка на проектна документација за изградба на градинка во населбата Точила, а се вршат подготовки за отворање уште една во тутунскиот комбинат. Исто така, градоначалникот најави дека кај две компании од градот постои интерес за отворање градинки, пред сè, за потребите на своите вработени, што ќе придонесе за ублажување на проблемот.

Орце Тодороски, в.д. директор на ЈОУ за деца Детска градинка „Наша иднина“, рече дека во употреба се предава една од најсовремените градинки не само во Прилеп туку и во Република Македонија. Во градинката ќе бидат згрижени 100-ина деца, со што бројот на незапишани ќе се намали од 500 на 400.

„Воспитно-образовниот процес во градинките ни е најважен, но и хигиенско-техничкиот и социо-економскиот се многу важни за Прилеп. Денеска се реализирани 12 нови вработувања со решенија на неопределено работно време, а претходниот месец по разни основи решенија добија 18 лица“, истакна Тодороски.

Во општина Прилеп функционираат 11 градинки, од кои 6 се во градот, 5 во населените места, во кои се згрижени 1.200 деца. Во ЈОУ за деца Детска градинка „Наша иднина“ вработени се 146 лица.