По седум години, денес се отвори етно-комплексот „Македонско село“. Премиерот, Христијан Мицкоски, рече дека Скопје добива уште едно туристичко место,  со убав поглед и преубави соби и апртмани.

„За мене претставува задоволство што уште еден заборавен, запуштен и би рекол полу уништен објект се става во функција, тоа е овој комплекс, наречен „Македонско село“. Благодарност до инвеститорите, до концесионерите, кои што се охрабрија да инвестираат и да понудат и на Скопје и на сите оние кои ќе го посетуваат Скопје уште едно туристичко, алтернативно и би рекол, ултра квалитетно место, каде што може да се ужива во преубав поглед, во преубави соби, апартмани, би рекол и сигурен сум во превкусна храна. Така што јас би им посакал многу среќа во работата, се разбира“, рече Мицкоски.

Тој ги повика сите оние кои што не го посетиле „Македонско село“, да дојдат во посета.

„И се разбира, во периодот кој што следи, да се погрижиме сето она кое што за жал изминативе седум години беше заборавено, уништено, девастирано, полека, но сигурно го обновуваме и повторно му го враќаме сјајот и го ставаме во функција, едно по едно, во зависност од приоритетите и можностите“, рече Мицкоски.

Кај бројот на починати лица во Македонија лани е забележан благ пораст од 0,1 процент во однос на претходната година, покажуваат податоците на Државниот завод за статистика.

Според извештајот, лани починале 20.201 лица, од кои 10.604 се мажи (52,5%), а 9.597 жени (47,5%).  Се забележува дека мажите, во просек, умираат 4 години порано од жените. Просечната возраст на починатите мажи е 71,9 години, додека кај жените таа изнесува 76,8 години.

Водечка причина за смрт с болестите на циркулаторниот систем, кои се причина за смрт кај 36,7% од вкупно починатите.  Следна причина се неоплазмите (малигни болести) со 19,6%, а потоа ендокрините, нутритивните и метаболичките заболувања со 7,7%. Болестите на респираторниот систем сочинуваат 4,1% од вкупните случаи.

Минатата година се регистрирани и 47 смртни случаи кај доенчиња, што претставува 0,2% од вкупниот број починати.

Министерот за внатрешни работи Панче Тошковски денеска оствари работна средба со директорката на Центарот за спречување на конфликти на Организацијата за безбедност и соработка во Европа, Кејт Фирон и Шефот на Мисијата на ОБСЕ во Скопје, амбасадорот Килиан Вал.

На средбата беше потврдена одличната соработка помеѓу двете институции во огромен број проекти, а беше изразено уверување во нејзиното натамошно унапредување, како и благодарност за константната поддршка и разбирање.

Министерот Тошковски се осврна на приоритетите и фокусот на МВР во периодот што следи, подвлекувајќи ја важноста и посветеноста на надградбата на капацитети, борбата против организираниот криминал и корупцијата на сите нивоа и реформите во министерството.