Македонија
Цените за катастарските услуги удрија по џебот на граѓаните: поскапувањето не е 300 отсто, туку 90

Според претседателот на Комората на трговските друштва за геодетски работи, Никола Рибароски, најновите поскапувања на тарифниците на Агенцијата за катастар на недвижностите ќе удрат директно врз џебот на граѓаните.
„Чудно е што ние како комора ќе даваме образложенија за тарифниците што ги носи Агенцијата, а тие испраќаат некакви штури соопштенија, од кои и стручната јавност и граѓаните се збунети.
Го креваме гласот против маскирањето на она што го прави Агенцијата по цели 10 години на тарифникот за услуги на приватните геодетски компании, сега се маскира со повторните енормни поскапувања на Катастарот, кои се директен удар по џебот на обичниот граѓанин“, вели тој.
Агенцијата, според Рибароски, ваквите поскапувања ги правда со зголемените трошоци на струја, на лиценци за софтвери, на покачените плати за вработените.
„Цените што сега се предвидени се многу пореални од претходно. Претходно, имавме цени што беа апсолутно нелогични врз основа на сите трошоци, компаниите немаа никаква исплатливост.
Имотниот лист пред две години чинеше 153 денари, го покачија на 250 денари, сега најновото поскапување не се одонесува на имотниот лист, туку тоа се однесува на прв упис во имотен лист. Сега граѓаните ќе плаќаат 1.250 денари од имотен лист“, појасни Рибароски.
Ова значи дека за упис на новокупен стан во Агенцијата за катастар на недвижностите, за имотен лист, наместо 1.250 денари, граѓаните ќе треба да платат најмалку 3.750 денари затоа што при промена на сопственост, ќе треба да платат за секој имотен лист посебно, тоа граѓаните ќе ги чини 3.750 денари плус 600 денари за нотарски услуги. Ако купуваат и гаража, ќе треба да платат за уште еден имотен лист, односно дополнителни 1.250 денари.
Не е тоа поскапување од 300 проценти како што беше објавено во некои написи, објасни Рибароски, туку, како што пресметал, сега станува збор за поскапување од максимум 90 проценти.
„Во зависност за која услуга станува збор, тоа е поскапување од 50, 70, до максимум 90 отсто, значи тука нема никаде поскапување од 300 проценти“, вели Рибароски.
Оценува дека Агенцијата за катастар со нејзиното функционирање во прашање го доведува функционирањето на целиот правен систем во државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски со честитка за Курбан Бајрам: Борбата за подобра иднина да бидат нашата заедничка водилка

Премиерот, Христијан Мицкоски, упати честитка до пoглаварот на Исламска Верска Заедница, Реис Ул Улема Шакир ефенди Фетаху, по повод денешниот празник Курбан Бајрам.
„Дозволете ми од мое лично име и од името на Владата да Ви го честитам муслиманскиот празник Курбан Бајрам, Вам и на сите граѓани припадници на исламската заедница и да Ви посакам празникот да го поминете во добро здравје, мир, благосостојба и спокој во Вашите срца и домови.
Празникот Курбан Бајрам не потсетува на вистинските вредности и принципи во животот, а тоа е да правиме добри дела, да помагаме и да сме хумани бидејќи хуманоста и солидарноста се најголемите човечки особини.
Исламската заедница и сите нејзини верници се дел од оваа држава, затоа потребно е да си подадеме рака и да ги почитуваме различностите, бидејќи само така ќе изградиме држава на среќни и задоволни граѓани.
Нашата заложба е државата да ја градиме во меѓусебно разбирање, почитување, доверба и толеранција. Тоа ќе го постигнеме само доколку сме обединети заедно.
Како Влада за краток период успеавме да ја трансформираме државата, преку дијалог и соработка да реализираме проекти од кои најголеми придобивки ќе имаат сите граѓани без разлика на нивната етничка или верска припадност.
Но, потребни се крупни чекори за остварување на заедничките цели и затоа нека борбата за подобра иднина, надеж и поквалитетен живот бидат нашата заедничка водилка за успешна и победничка Македонија, држава дом за секој граѓанин и Македонија држава на промените“, пишува во честитката.
Македонија
Православните верници денеска ја одбележуваат Задушница

Во спомен на починатите, православните верници денеска ја одбележуваат Задушница во пресрет на големиот празник кој доаѓа во недела – Духовден.
Сеќавајќи се на покојните претци, верниците на овој ден се молат за простување на гревовите. Во црквата се служи парастос, а по службата се посетуваат гробовите на најблиските, се пали свеќа, се чита молитва и се принесува жртва за спасение на починатите. Наспроти обичаите на гробовите да се носи и раздава огромно количество храна, од Македонската православна црква апелираат дека смислата на овој ден е во молитвата, а жртвата треба да се ограничи на варена пченица, вино и леб.
Спомнувањето на сите починати благочестиви христијани во саботата пред Педесетница е востановено затоа што со собитието на слегувањето на Светиот Дух се завршило домостроителството на спасението на човекот, а во тоа спасение учествуваат и упокоените.
Затоа, Црквата која на Педесетница упатува молитви за оживотворување со Светиот Дух на сите живи, на самиот ден на празникот, ја проси и за упокоените благодатта на сесветиот и сеосветуваштиот Дух-Утешител, којашто тие уште во својот живот се уподобиле да ја имаат за извор на блаженства, бидејќи преку Светиот Дух „живее секоја душа“.
Оние кои не се во можност да одат на гробиштата поради оддалеченоста, треба да одат во најблискиот храм и да извршат помен за своите покојни.
Духовден, пак, го означува слегувањето на Светиот Дух врз апостолите, или како што го нарекуваат светите отци „Роденденот на Црквата“.
На 10-тиот ден од Христовото вознесение, а на 50-тиот од Неговото воскресение, на еврејскиот празник Педесетница, Светиот Дух слезе врз апостолите во вид на пламени јазици, а тие се исполнија со сила и добија дар да зборуваат на разни јазици.
За црквата овој настан има посебно значење затоа што Светиот Дух од тоа време, па се до денес не ја напушта и непрестано слегува врз црквата на литургијата, во молитвите, во сите дела. Тој е оној Дух по кој христијанскиот живот се нарекува духовен.
Македонија
Сончево и многу топло време, попладне локално невреме

Времето денеска ќе биде сончево и многу топло со мала до умерена облачност. Попладне ќе има локален развој на нестабилна облачност со пороен дожд и грмежи, наместа во форма на невреме со засилен ветер и услови за појава на град, информира УХРМ.
Максималната температура ќе биде во интервал од 29 до 36 степени.
Во Скопје, сончево и многу топло со мала до умерена облачност. Попладне во делови од котлината ќе има услови за појава на нестабилност со пороен дожд, грмежи и засилен ветер. Максималната температура ќе достигне до 36 степени.