Македонија
Црвенковска од Судски која остана без интернет: Немаше точка за одговорност на Енвер Беџети, а и со мене немаше кворум за изземање на Дамева од комисијата
Немаше точка за одговорност на судијата Енвер Беџети кој го држеше предметот „Таргет-тврдина“ во фиока, а ниту со нејзиниот глас немало да има кворум на последната седница, тврди експретседателката и член на Судскиот совет, Павлина Црвенковска за „Макфакс“. Таа посочува дека требало само да се одлучува по барањето за изземање на Весна Дамева од комисијата која ќе утврдува дали апелациониот судија сторил незаконско постапување. Според нејзе, има цела процедура која треба да се испочитува, пред да се донесе одлука дали кај Беџети има одговорност.
„Не знам зошто изминативе денови се пласира тезата дека со тоа што јас сум се исклучила, немало кворум. Ни со мојот глас, немаше да има повторно кворум. Бидејќи, точка на дневен ред беше изземање на Весна Дамева од комисијата која одлучува за Енвер Беџети. Воопшто не беше точка на дневен ред разрешување на Енвер Беџети, ниту постапка за Енвер Беџети или било што“, посочува Црвенковска за „Макфакс“.
Таа додава дека и со нејзиниот глас – кворум немало да има. Посочува дека е точно дека се исклучила од онлајн врската поради проблеми со интернет конекцијата – но тоа не било ниту намерно, ниту тенденциозно. За кворум се потребни најмалку осум гласови. Во моментот на гласање, членовите Мирсад Суроји и Весна Дамева биле на одмор, како што била Црвенковска – што значи дека имало три гласа помалку. За предлогот не смее да гласа ниту поднесителот на барањето. Изземен е и експотпретседателот Селим Адеми, што значи дека и тој не може да гласа. Остануваат шест гласови – а со нив, кворум – нема.
„Се вклучив бидејќи ме замолија да се вклучам од одмор. Останаа само шест гласови, а со шест гласови нема кворум. Јас навистина бев во камп каде интернетот е горе-долу. Додека траеше седницата се исклучив. Не е дека јас сум се исклучила тенденциозно или намерно кога беше точката за изземање на член на Судски совет, по барање за изземање од комисијата за Енвер Беџети“, додаде Црвенковска.
Таа ја објасни и процедурата која треба да се помине пред да се утврди одговорност кај судија. Посочува дека тоа не требало да се направи на седницата каде била онлајн, па и снемало интернет.
„Прво се формира комисија, па таа испраќа до Енвер Беџети, па потоа ќе одржи расправа, па ќе донесе одлука, па има право на жалба до Врховен суд, па потоа станува правосилна. А на таа седница, отворете го дневниот ред и видете – немаше точка за разрешување на Енвер Беџети, оти немавме комисија (во периодот кога се разрешуваше Весна Дамева). Всушност, не го ставаше на дневен ред формирањето на комисијата. Новиот претседател ја продолжи седницата со дневниот ред кој го состави Весна Дамева. Пред да ја продолжи, одлучивме едногласно да биде проширен дневниот ред со точка за формирање комисија за Енвер Беџети. Новиот претседател ја формираше комисијата“, додаде експретседателката и член на Судски совет.
Утре во полн состав, Судскиот совет треба да има кворум без подносителот и изземениот член. Кога ќе се одлучи по барањето за изземање на Дамева, ќе има избор на нов член во комисијата. Оттука, комисијата почнува да работи.
„Тогаш комисијата доставува сѐ што има до Енвер Беџети. Тој се произнесува. Се закажува расправа. Потоа комисијата поднесува извештајот до Судски совет. Судски совет одлучува дали ќе продолжи постапката, дали ќе запре, што и како ќе биде“, додаде Црвенковска.
Енвер Беџети, еден од петте судии кои одлучија „Таргет-тврдина“ да се суди одново, со тоа го ослободија Сашо Мијалков. Додека предметот „Таргет-тврдина“ за масовното прислушување бил држен во фиоката на Апелациониот суд, судии од судечкиот совет си учествувале во комисии, оделе на одмори, користеле боледувања. Енвер Беџети, судија известител за предметот „Таргет-тврдина“ не дал образложение колку време користел боледување, причина поради која се одолговлекувало одлучувањето.
На судијата Енвер Беџети ова не му е прво одлучување во корист на Мијалков. Тој пред повеќе од една година, беше дел од советот кој го пушти ексдиректорот на УБК на слобода, укинувајќи му го притворот за „Трезор“. Одлуката ја донесоа откако Мијалков претходно беше во бегство, односно недостапен за органите на прогонот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Без разлика на етничката, верската и политичката припадност, на 2 ноември да се обединиме во Кичево
После вториот круг очекувам 59 градоначалници да има коалицијата предводена од ВМРО-ДПМНЕ, со што ќе ја заокружиме највисоката бројка во историјата на демократската Македонија, по бројот на градоначалници, којашто некогаш се случила. И ако на тоа се додаде и извесната победа на Орце Ѓорѓиевски за град Скопје, којшто води 3:1 после првиот круг во однос на неговиот противкандидат, тогаш заокружуваме бројка од 60 градоначалници коишто ќе дојдат од коалицијата предводена од ВМРО-ДПМНЕ, вклучително и главниот град, рече претседателот на ВМРО-ДПМНЕ, Христијан Мицкоски на вечерашниот мини митинг во Кичево во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември во недела.
Мицкоски се осврна и на победата на коалицијата предводена од ВМРО-ДПМНЕ за листите на советници во 58 општини.
Додаде дека не било лесно, туку дека било тешко, но единството и поддршката на граѓаните покажале дека може да се совлада и помногуброен противник.
„Затоа е многу важно на 2 ноември во недела да се обединиме овде во Кичево, без разлика на нашите различности, без разлика дали тие различности се етнички, верски или политички. Многу е важно да бидеме како едно, да се обединиме околу вредностите коишто ги споделуваме, да се обединиме околу цивилизацијата којашто ја застапуваме. Затоа што јас сум убеден дека против кандидатот на Александар не ги споделува нашите вредности, не ја споделува нашата цивилизација. И секој оној којшто ќе го земе пенкалото во рака и ќе застане позади гласачката кутија, со гласачкиот лист пред него, нека го слуша својот разум и своето срце и нека гледа длабоко во својата душа, од таму ќе извира бројот 9. И нека го заокружи бројот 9, нека заокружи за Александар“, повика Мицкоски.
Секој оној кој ќе биде исправен пред предизвикот дали да го поддржи Александар или неговиот против кандидат, додаде Мицкоски, нека се присети на вредностите кои ги застапува Александар и вредностите кои ги застапува неговиот против кандидат.
„Дали вие сакате да живеете во средина во којашто ќе владеат криминалот, блуд, разврат и уцени? Дали сакате Кичево да биде домаќин на блуд, разврат, криминал и уцени? Заборавете на етничката припадност, сетете се на вашите ќерки, на вашите внуки, дека некоја од нив може да биде жртва на овој човек. Затоа, кога ќе го имате пенкалото во рака, верувајте во вредности, не во басни, не во приказни. Заборавете на нешто што некој ви кажува дека се случило пред 4, 5, 6 децении, верувајте на оние коишто ви кажуваат што ќе се случува за четири, пет децении од денес. Заборавете на оние романтични приказни што некој ви ги кажува за некое измислено минато коешто никогаш не се случило. Верувајте на иднината којашто сите ние заедно Македонци, Албанци, Турци, Роми, Срби, Власи, Бошњаци и останати ќе ја градиме. Тоа е иднината на Македонија“, упати Мицкоски обединувачка порака и повик до сите етнички заедници.
Македонија
Николоски: Скопје од денеска директно се поврзува со шпанската престолнина Мадрид
Скопје од денеска директно се поврзува со шпанската престолнина Мадрид, авиолинија која е една од дваесетте авиолинии што ги воведовме во изминатата година, истакна вицепремиерот и министер за транспорт Александар Николоски, кој заедно со амбасадорот на Шпанија во Македонија, Рафаел Сориано Ортиз и Неџат Курт, генерален директор на ТАВ Македонија, го означија првиот лет Скопје-Мадрид.
Николоски потенцираше дека ова е огромен успех за авиосообраќајот, бидејќи со воведувањето на новите линии се забележува и значителен раст на патници и туристи во Македонија.
„Многу ми е драго што денеска почнува директна линија помеѓу Скопје и Мадрид, ги поврзуваме двата главни града, главниот град на Кралството Шпанија и главниот град на Македонија, нешто што е многу значајно, за развојот на туризмот, за развојот на бизнисот и за размената помеѓу двата народи, размената во културата, нешто што навистина многу значи“.
Од минатата година кога беше избрана оваа Влада до денес, додаде тој, отворена е 21 нова дестинација.
„Од Париз, од “Орли” се лета за Скопје, од Истанбул се лета за Охрид, од Дубаи ќе почне да се лета за Скопје оваа зима, од Барселона, од Лион, од Амстердам и од Љубљана се лета за Скопје, тука се чартерите на “Фрибрд Ерлајнс” кои што секој ден слетуваат на скопскиот аеродром, кои за скоро ќе бидат и по два дневно. До Охрид почна да се лета од Базел, Ларнака, Мадрид, Штутгарт, Бари, Стокхолм на главниот аеродром почнуваат овие денови. Понатаму, ја отвараме Женева, Келн, многу значајно за мене Прага, а веќе од пролет Неапол-Италија, Будимпешта-Унгарија, Катовице и Вроцлав до Охрид, и Милано исто така до Охрид.
Вкупно 21 нова дестинација, 21 нова линија, за зголемување на бројот на туристи и повеќе бизнис во Македонија. Сакам да се заблагодарам на директорот на ТАВ на неговиот тим, за одличната соработка која што ја имаме, да се заблагодарам на амбасадорот на Шпанија и да најавам дека ќе има уште дестинации од Шпанија, Барселона и Мадрид нема да се последни” истакна вицепремиерот Николоски
Македонија
Утре наутро претежно ведро и студено, преку денот сончево
Утре наутро ќе биде претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Во наредните денови следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

