Македонија
Црвенковска од Судски која остана без интернет: Немаше точка за одговорност на Енвер Беџети, а и со мене немаше кворум за изземање на Дамева од комисијата

Немаше точка за одговорност на судијата Енвер Беџети кој го држеше предметот „Таргет-тврдина“ во фиока, а ниту со нејзиниот глас немало да има кворум на последната седница, тврди експретседателката и член на Судскиот совет, Павлина Црвенковска за „Макфакс“. Таа посочува дека требало само да се одлучува по барањето за изземање на Весна Дамева од комисијата која ќе утврдува дали апелациониот судија сторил незаконско постапување. Според нејзе, има цела процедура која треба да се испочитува, пред да се донесе одлука дали кај Беџети има одговорност.
„Не знам зошто изминативе денови се пласира тезата дека со тоа што јас сум се исклучила, немало кворум. Ни со мојот глас, немаше да има повторно кворум. Бидејќи, точка на дневен ред беше изземање на Весна Дамева од комисијата која одлучува за Енвер Беџети. Воопшто не беше точка на дневен ред разрешување на Енвер Беџети, ниту постапка за Енвер Беџети или било што“, посочува Црвенковска за „Макфакс“.
Таа додава дека и со нејзиниот глас – кворум немало да има. Посочува дека е точно дека се исклучила од онлајн врската поради проблеми со интернет конекцијата – но тоа не било ниту намерно, ниту тенденциозно. За кворум се потребни најмалку осум гласови. Во моментот на гласање, членовите Мирсад Суроји и Весна Дамева биле на одмор, како што била Црвенковска – што значи дека имало три гласа помалку. За предлогот не смее да гласа ниту поднесителот на барањето. Изземен е и експотпретседателот Селим Адеми, што значи дека и тој не може да гласа. Остануваат шест гласови – а со нив, кворум – нема.
„Се вклучив бидејќи ме замолија да се вклучам од одмор. Останаа само шест гласови, а со шест гласови нема кворум. Јас навистина бев во камп каде интернетот е горе-долу. Додека траеше седницата се исклучив. Не е дека јас сум се исклучила тенденциозно или намерно кога беше точката за изземање на член на Судски совет, по барање за изземање од комисијата за Енвер Беџети“, додаде Црвенковска.
Таа ја објасни и процедурата која треба да се помине пред да се утврди одговорност кај судија. Посочува дека тоа не требало да се направи на седницата каде била онлајн, па и снемало интернет.
„Прво се формира комисија, па таа испраќа до Енвер Беџети, па потоа ќе одржи расправа, па ќе донесе одлука, па има право на жалба до Врховен суд, па потоа станува правосилна. А на таа седница, отворете го дневниот ред и видете – немаше точка за разрешување на Енвер Беџети, оти немавме комисија (во периодот кога се разрешуваше Весна Дамева). Всушност, не го ставаше на дневен ред формирањето на комисијата. Новиот претседател ја продолжи седницата со дневниот ред кој го состави Весна Дамева. Пред да ја продолжи, одлучивме едногласно да биде проширен дневниот ред со точка за формирање комисија за Енвер Беџети. Новиот претседател ја формираше комисијата“, додаде експретседателката и член на Судски совет.
Утре во полн состав, Судскиот совет треба да има кворум без подносителот и изземениот член. Кога ќе се одлучи по барањето за изземање на Дамева, ќе има избор на нов член во комисијата. Оттука, комисијата почнува да работи.
„Тогаш комисијата доставува сѐ што има до Енвер Беџети. Тој се произнесува. Се закажува расправа. Потоа комисијата поднесува извештајот до Судски совет. Судски совет одлучува дали ќе продолжи постапката, дали ќе запре, што и како ќе биде“, додаде Црвенковска.
Енвер Беџети, еден од петте судии кои одлучија „Таргет-тврдина“ да се суди одново, со тоа го ослободија Сашо Мијалков. Додека предметот „Таргет-тврдина“ за масовното прислушување бил држен во фиоката на Апелациониот суд, судии од судечкиот совет си учествувале во комисии, оделе на одмори, користеле боледувања. Енвер Беџети, судија известител за предметот „Таргет-тврдина“ не дал образложение колку време користел боледување, причина поради која се одолговлекувало одлучувањето.
На судијата Енвер Беџети ова не му е прво одлучување во корист на Мијалков. Тој пред повеќе од една година, беше дел од советот кој го пушти ексдиректорот на УБК на слобода, укинувајќи му го притворот за „Трезор“. Одлуката ја донесоа откако Мијалков претходно беше во бегство, односно недостапен за органите на прогонот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Вилијам Михајловски, осуден на 14 години затвор, ќе ја води Комисијата за безбедност и правда на Единствена Македонија

Централниот комитет на Единствена Македонија на дводневната седница во Охрид меѓудругото донесе и неколку кадровски одлуки од своја надлежност.
„Беше избран нов Извршен комитет, а воедно за генерален секретар беше избран Милан Јовчески, а за член на Извршниот комитет беше избран уставобранителот Вилијам Михајловски – Гајда во моментот неоправдано осуден на 14 години затвор за Македонија. Вилијам Михајловски како член на Извршниот комитет ќе ја води и Комисијата на Единствена Македонија за внатрешна безбедност, одбрана, правда и политички затвореници“, соопштија од партијата.
Централниот комитет утврди 29 кандидатски листи за локалните избори, а уште шест се во постапка за утврдување на следната седница на Централниот комитет.
Од партијата соопштија дека е донесена и одлука за кандидат за градоначалник на Град Скопје.
Македонија
Османи формира тим во Чаир со задача да донесе милион евра од европските фондови

Кандидатот за градоначалник на Чаир, Бујар Османи, денес го најави формирањето на специјална Task Force единица посветена на IPA фондовите, со јасна цел – европските средства да дојдат директно во оваа општина.
„Три години бев државен координатор за IPA фондовите. Знам како функционираат овие програми, каде се можностите и кои се луѓето во Брисел што одлучуваат за нив,“ истакна Османи.
Тој додаде дека од денес Чаир има тим со еден единствен мандат: да донесе милиони евра од европските програми директно во општината.
„Ова значи подобри улици, посилни училишта и побогата заедница. Чаир заслужува да биде директно поврзан со Европската Унија и ние тоа ќе го направиме реалност,“ истакна Османи.
Со оваа иницијатива, додаде тој, Чаир стапува на патот на европска интеграција на локално ниво, користејќи ги можностите што ги носат фондовите на ЕУ.
Македонија
„Таравари не излезе од Владата поради грижа за правата на Албанците, одговорите нека ги побараат во обврските преземани за инвестицијата Ѓока“, реагира ВМРО-ДПМНЕ

„Алијанса на Албанците на Арбен Таравари треба да научи дека кога неосновано критикуваат и измислуваат, притоа ставаат зборови во уста кои не биле кажани од премиерот Мицкоски, ќе добијат аргументиран и издржан одговор“, реагира ВМРО-ДПМНЕ на соопштението на Алијансата за Албанците.
„А вистината зошто излегоа од Владата не се крие во грижата на Таравари за Албанците ниту пак борбата за некакво подобрување на нивните права.
Вистината е многу едноставна и болна.
Членовите и заинтересираните за вистината одговорите нека ги побараат во една инвестиција на Таравари што се вика Ѓока. Какви обврски превземал и какви услови прифатил. Тоа не е наш проблем. Оставаме сами да си ги решат“, се додава во реакцијата на ВМРО-ДПМНЕ.