Македонија
ЦУК: Тимовите храбри пожарникари и пилоти дејствуваат сега и веднаш врз големиот пожар меѓу Лозово и Велес, иако од утре се најавуваат врнежи од дожд и студено време
На почетокот на денот пожарот на отворен простор помеѓу селата Иванковци и Мамутчево во општина Велес и кај с. Милино во општина Лозово се разгоре. Поради временските услови, конкретно силен ветер, тој се проширува и зафати делови од боровата шума во тој реон. Градоначалникот на општина Лозово, Бошко Цветковски, кој е на терен заедно со тимовите за гаснење на големиот пожар, преку единствениот број за итни повици 112 во ЦУК побара ангажирање авиони за гаснење на пожарот.
Директорот на Центарот за управување со кризи, Стојанче Ангелов, веднаш при координацијата за гаснење на пожарот меѓу Лозово и Велес даде насоки за упатување еден хеликоптер „бел“ од МВР за гаснење на таа локација по хеликоптерскиот ангажман и дејството врз пожарот кај с. Кондово, Скопско. Ангелов информира дека истовремено при координацијата дал насоки за да полетаат и двата противпожарни авиона „ер трактор“ од ДЗС, кои веќе дејствуваат на теренот.
„Конкретно, во Регионалниот ЦУК Велес пожарникарите на ТППЕ Велес дејствуваат од вчера врз пожарот на отворен простор помеѓу селата Иванковци и Мамутчево во општина Велес и кај с. Милино во општина Лозово. На терен дејствувале 17 пожарникари со четири ПП-возила од ТППЕ Велес, од ЈП „Национални шуми“ – подружница „Бабуна“ од Велес дејствува екипа од пет вработени со едно теренско возило, а од страната на Свети Николе дејствува една екипа од 5 пожарникари со теренско возило од ТППЕ Св. Николе, со тим од 4 вработени од ЈП „Национални шуми“ – подружница „Шумарство“ од Свети Николе.
Денеска, временските услови сè уште се во прилог на пожарите, а силниот ветер ги разгорува и тимовите храбри пожарникари и пилоти од повеќе институции од Системот за управување со кризи (ЦУК) имаат сè уште полни раце работа и мора да дејствуваат како и што дејствуваат, сега и веднаш, иако од утре се најавуваат врнежи од дожд и студено време од УХМР. Едноставно, денешните сериозни пожари што сè уште горат во земјата не ги засега утрешната најава за дожд. Конкретно, под влијание на влажен и студен бран утре времето се предвидува дека ќе биде облачно и студено со повремени врнежи од дожд. Наместа врнежите ќе бидат пообилни, особено во западните делови (над 20 l/m2), а дневната температура утре ќе биде во интервал од 9 до 15 степени. За очекување е дека од утре пожарите значително ќе намалат во нашата земја“, информираат од ЦУК.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Здружението на судии загрижено за изјавите за Управниот суд: со нив се врши притисок врз судиите и судиското одлучуваљње
Здружението на судии во врска со реакцијата на Управниот суд на РСМ, ја искажува својата загриженост за изјавите на поединци со кои, како што се истакнува во соопштението, директно или индиректно се врши притисок врз судиите и судиското постапување и одлучување.
Како што велат, припадноста кон одредена политичка партија и можноста за идно владеење односно учество во извршната власт, не смее да се користи за коментирање, заканување или влијание врз судиското одлучување.
Оценуваат дека таквите изјави се штетни пред се за политичките субјекти кои ги пласираат во јавноста, а истовремено може да се разберат и како обид да се поткопа непристрасноста и интегритетот на судиите.
„Во однос на неоснованите обвинувања кои беа упатени на адреса на Претседателот на Управниот суд на РСМ, како Здружение на судии даваме целосна поддршка на колегите од именуваниот суд и напоменуваме дека секој избран судија е независен во своето одлучување и таа независност му е Уставно загарантирана. Па во тој правец и при најмал сомнеж за евентуален обид за притисок или влијание врз неговата работа, без разлика од кого доаѓа, е должен да ги извести надлежните судиски инстанци. Воедно, сите останати општествени чинители, а особено претставниците на политичките партии се должни да ја почитуваат загарантираната судиска независност што е во духот и на демократскиот развој и Европскиот просперитет на земјата“, потенцираат од ова здружение.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.