Македонија
Чулев: Жители на Синѓелиќ го прекршија полицискиот час од политички побуди
Еден од уапсените се претставил дека е советник од редовите на СДСМ во Општина Гази Баба со цел да изврши притисок врз полицајците за да не биде приведен.
Вака министерот за внатрешни работи, Наќе Чулев, го објасни инцидентот во скопски Синѓелиќ.
Според него, граѓаните што го прекршиле полицискиот час биле водени од политичка мисла. Чулев на прес-конференцијата рече дека МВР поднело кривични пријави против сите лица, а веќе има идентификувано и дел од толпата што излезе на улица по приведувањето на трите лица.
„Ова е предизвикано и од политички побуди. Граѓаните водени од политичка мисла свесно се изложија себеси, но и другите граѓани, на ризик, кој сите може скапо да нè чини. Додека сум јас министер за внатрешни работи, законот ќе важи за сите и неселективно. Околу 21.10 часот на социјалните мрежи е забележана слика од групирани лица на улицата Алија Авдовиќ во населбата Ченто. По добиеното сознание, од страна на полициски службеници од СВР Скопје преземени се активности и преку патролно интервенирање извршена е контрола за тоа дали се почитуваат мерките за ограничување на движењето. Кога пристигнале на конкретната локација, забележана е група од осум лица, кои по забележувањето на полициските возила, некои од нив се дале во бегство, а 3 лица останале и биле лишени од слобода и спроведени во полициска станица“, рече министерот Чулев.
Според Чулев, едно од приведените лица сакало да изврши притисок врз службениците за да не биде лишено од слобода, па се претставило како советник на СДСМ.
„При лишувањето од слобода, едно од лицата се претставило како член на Советот на Општина Гази Баба од редовите на СДСМ, со што сакал да изврши притисок врз полициските службеници со цел тој да не биде лишен од слобода. Од страна на полицајците извршен е службен разговор, врз основа на што се изготвени кривични пријави за кривично дело од член 206 од КЗ, меѓу кои и кривична пријава за советникот на СДСМ“, додаде Чулев.
Тој потенцира дека меѓу толпата, која, по приведувањето, излегла на улицата, кружеле лажни информации дека приведените биле тепани од полицијата, како и апсени од своите домови.
„Околу 22 часот добиена е информација дека на местото каде што биле приведени трите лица, собрана е поголема група луѓе, чиј мотив е лажната информација дека овие луѓе се физички малтретирани во полициската станица и дека се лишени од слобода од своите домови. Двете информации не се точни, тоа се потврдува и во исказите од лицата што беа лишени од слобода“, додаде Чулев.
Министерот го спомена и градоначалникот на општината, Борис Георгиевски, бидејќи од видеозаписи се гледало како тој дал ветување дека против трите уапсени лица нема да биде поднесена кривична пријава.
„Во однос на видеозаписите што се појавија на одредени веб-портали, а на кои се гледа и слуша како градоначалникот на општина Гази Баба дава ветување дека тој лично ќе ги ослободи лицата и дека за нив нема да има поднесок, потенцирам дека МВР постапува неселективно кон сите граѓани во државата и секаде онаму каде се прекршени законските одредби и одлуките на Владата се постапува во согласност со законот“, рече Чулев.
МВР и натаму прави идентификација на преостанатите луѓе од групата што излегоа на улицата поради апсењето на трите лица од Синѓелиќ и Арачиново.
„Во насока на целосно расчистување на случајот, МВР и во текот на денешниот ден презема активности, при што обезбеден е видеозапис за кој се спроведува детаљна анализа за идентификација на лицата и анализа за тоа кој не го почитувал полицискиот час. За оние што јавно повикуваа на непочитување на ограничувањето на движење, ќе бидат поднесени две кривични пријави за две кривични дела, и тоа за поттикнување непочитување на одлуките на Владата и засамото непочитување на мерките на Владата. На некои од лицата им е утврден идентитетот“, рече Чулев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Герасимовски: Со видео надзор, општината ќе ја зголеми безбедноста на граѓаните и ќе ги заштити јавните добра
Советот на Општина Центар на 35. Седница на советот го прифати предлогот на градоначалникот Горан Герасимовски во општина Центар да се постави видео надзор.
Станува збор за видео надзор поради обезбедување заштита на имотoт и имотните права на општината односно Заштита на урбаната опрема (автобуски постојки, опрема во функција на туристички и културни и спортски настани, самостоечки рекламни паноа, детски игралишта, фонтани, чешми, клупи, корпи за отпадоци и други согласно законите), Заштита на инфраструктурните објекти (улици, плоштади и други инфраструктурни објекти во надлежност на Општината), Заштита на сообраќајни знаци и семафори и друга вертикална и хоризонтална сигнализација, Заштита на улична јавна осветлување, броење и евиденција на возила за статистички мерења.
Герасимовски во образложението за дополнувањето на дневниот ред истакна дека одлуката е преземена и модифицирана од други општини во кои веќе неколку години има поставен видео надзор и каде по поставувањето има намалување на штетите во општината.
„Се обидовме да ја заштитиме урбаната опрема особено детските игралишта но по сите напори не успеваме да го направиме тоа. Тие не ни траат ниту два месеци, се кршат детските реквизити, обрачите на спортските игралишта, се крши се. Затоа овие снимки може да служат како доказ за нечие дивеење. Но Министерството за внатрешни работи или Јавното обвинителство, исто така ќе може да ги користат при евентуално сторено кривично дело, нарушување на јавен ред и мир, или кршење на друга урбана опрема. Верувам дека снимките ќе ја зголемат и безбедноста во општината. Суштината е снимката да се користи како доказ за евентуална судска кривична или прекршочна постапка со цел да имаме намалување на девијантните појави во општината“, рече Герасимовски на седницата.
Македонија
Маскиран со „фантомка“ влегол во казино во Лешок, репетирал автоматската пушка и украл 329.780 денари: притвор за 28-годишник
Јавен обвинител од Основното јавно обвинителство Тетово донесе Наредба за спроведување истражна постапка против 28-годишен жител на Непроштено, осомничен за разбојништво и поседување автоматска пушка.
На 24 април, осомничениот, маскиран со „фантомка“, влегол во казино во Лешок и со автоматска пушка која на граѓаните им е забранета им се заканил на вработениот во обезбедувањето и на уште едно присутно лице. Ја репетирал автоматската пушка и им наредил на оштетените да легнат на подот, по што од фиоките на касите одзел 329.780 денари.
На овој начин осомничениот сторил кривично дело – Разбојништво по член 237 став 4 во врска со став 1, како и кривично дело – Неовластено изработување, држење, посредување и тргување со оружје или распрскувачки материи по член 396 став 2 во врска со став 1 од Кривичниот законик, соопшти Обвинителството.
Јавниот обвинител до судијата на претходна постапка од Основниот суд во Тетово достави предлог за определување мерка притвор за осомниченото лице, бидејќи постои опасност од бегство, можност тој да влијае врз сведоците и да го повтори делото. Судот го прифати предлогот и определи притвор во траење од 30 дена.
Скопје
Градоначалникот Георгиевски на увид во реконструкцијата на игралиштето за мал фудбал во Текија, општина Илинден
Увид во работните активности за реконструкција на игралиштето за мал фудбал во рамки на подрачното општинското основно училиште во населено место Текија направи градоначалникот на општина Илинден, Александар Георгиевски.
Како што истакна градоначалникот Георгиевски и на ова фудбалско игралиште целосно ќе биде обновен асфалтниот слој, проширување на теренот, ќе биде поставено лед осветлување, обновување на заштитната ограда, а ќе бидат поставени нови голови, клупи, корпи за отпадоци, просторот ќе биде партерно уреден. Со обновувањето на игралиштето ќе се создадат услови за реализација на часовите по физичко образование како и комплетно реконструиран, убаво уреден простор каде младите во спортски дух ќе го поминуваат слободното време, соопшти општина Илинден.
Покрај реконструкцијата на игралиштето за фудбал ќе се обнови и детското игралиште во рамки на училиштето, односно оштетените реквизити ќе бидат заменети со нови.
Со цел уредување на секое населено место како и создавање квалитетни и безбедни услови за жителите, општина Илинден продолжува со реконструкција на постоечките и изградба на нови спортски терени и во останатите населени места, се наведува во соопштението.