Македонија
Шаќири: Сите да придонесеме за јакнење на механизмите за детекција и справување со врсничко насилство
Проблемот со врсничкото насилство не е нов ни во нашето школство, ниту во развиениот свет, па со цел спречување на секаков вид насилство и градење на соживот во училиштата, Министерството за образование и наука има развиено сет закони, проектни мерки и активности, рече министерот за образование и наука Јетон Шаќири на дебата на тема „STOP BULLYING“. Тој нагласи дека секогаш има место за дополнително јакнење на механизмите за детекција и справување со врсничко насилство.
„Во фаза на изработка е правилник наменет за училиштата за превенирање и за постапување во случај на насилство. Исто така, мораме добро да размислиме за ограничување на влијанието на социјалните мрежи во училишната средина. Отворивме и електронска адреса каде учениците, родителите но и граѓаните можат да пријават случај на врсничко насилство“, појасни Шаќири, додавајќи дека МОН е во фаза на консултации со најшироката заедница, професорите и експертите што е тоа што може да се преземе за да се подигне институционалната грижа за правилниот раст и развој на децата и младите.
Шаќири посочи дека во текот на школувањето, децата треба да израснат во луѓе со вистински вредности, со емпатија, со разбирање за различните од себе и најважно да умеат да ги решаваат конфликтните ситуации без насилство.
„Колку е важно ова не само да стои запишано во стратешки документи, туку сите чинители во едукацијата на младите луѓе да го применуваат, добро покажуваат последните регионални случаи на ескалација на девијантни однесувања кај деца и млади луѓе, со страшни последици. Затоа се значајни заедничките дискусии за врсничкото насилство, зашто, какви генерации ќе создадеме не зависи само од наставниот кадар и стручните служби во училиштата, туку тоа е процес во кој е неопходно да се вклучат сите општествени чинители“, нагласи Шаќири.
Наведувајќи дека и сега насилството е санкционирано со образовната регулатива, дека училиштата имаат обврска да планираат програми и активности за заштита од насилство а законот предвидува и обврска за директорот на училиштето да го пријави на надлежен орган секој облик на насилство, министерот посочи дека натамошното јакнење на заштитните механизми на ниво на школство, ќе значи и поздрави и поотпорни млади генерации.
Шаќири побара да се вложи сето знање и умеење во спречување на сѐ што е туѓо на образованието, затоа што секое дете е важно, а иднината ја градиме сите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во важечкиот Изборен законик стои Македонија во делот на свечената изјава – Каракамишева вели дека Силјановска го кажала она што било напишано
Во важечкиот Изборен законик, со прочистен текст во март оваа година, во делот на свечената изјава стои Македонија, а не Северна Македонија.
Професорката по уставно право и политички систем, Тања Каракамишева, на социјалните мрежи го објави делот од Изборниот законик со коментар дека новата претседателка Гордана Силјановска-Давкова, го кажала името на државата во свечената изјава, онака како што стои во текстот.
„Член 123 од важечкиот Изборен законик го содржи текстот на свечената изјава што Претседателката на Македонија Проф.д-р Гордана Силјановска Давкова требаше да го каже во својата заклетва, и го кажа“, пишува Каракамишева.
Во членот 123 стои: „Изјавувам дека функцијата претседател на Република Македонија ќе ја вршам совесно и одговорно, ќе го почитувам Уставот и законите и ќе го штитам суверенитетот, територијалниот интегритет и независноста на Република Македонија“.
Вчера, претседателот на Собранието Јован Митрески, во читањето на текстот на свечената изјава, државата ја именуваше Севрена Македонија, по што Силјановска повторуваше, но без делот „Северна“.
Грција и ЕУ реагираа дека уставното име мора да се почитува, во согласност со Договорот со Грција.
Македонија
РФМ: Благодарност до македонската ракометна јавност
Ракометната федерација на Македонија упатува голема благодарност до сите што безрезервно ѝ дадоа поддршка на машката македонска сениорска репрезентација во спортскиот центар „Борис Трајковски“ за победата против селекцијата на Фарските Острови, дополнително благодарност и до сите што го следеа натпреварот и ги бодреа нашите ракометари пред малите екрани.
„Во рамките на своите програмски определби, Ракометната федерација на Македонија како приоритет број еден ги има промоцијата и унапредувањето на македонскиот ракометен спорт во меѓународни рамки. Во текот на репрезентативните квалификациски циклуси/баражи и утврдени натпреварувачки системи од EHF/IHF во машка и во женска конкуренција за сите возрасни категории, националните селекции обезбедија учество на следните завршни турнири на континентално и на мундијално ниво:
1. Женска сениорска репрезентација – ЕП 2024 (Австрија, Унгарија, Швајцарија) 28.11.2024-15.12.2024
2. Машка сениорска ракометна репрезентација – СП 2025 (Хрватска, Данска, Норвешка) 14.01.2025 – 02.02.2025
3. Женска младинска ракометна репрезентација – СП 2024 (Македонија) 19.06.2024-30.06.2024
4. Машка младинска ракометна репрезентација – ЕП 2024 (Словенија) 10.07.2024- 21.07.2024
5. Машка кадетска ракометна репрезентација – ЕП 2024 (Црна Гора) 07.08.2024- 18.08.2024
Честитки до сите ракометари и ракометарки и до членовите на стручните штабови на сите македонски ракометни селекции! Вие сте наша гордост!!! Со почит. Ракометна федерација на Македонија“, стои во објавата на РФМ.
ПР
Македонија
Oтворен е конкурсот за ЕУ наградите за истражувачко новинарство
Отворен е конкурсот за „Наградата од Европската Унија за истражувачко новинарство 2024“.
ССНМ ги поканува сите новинари од Македонија кои имаат објавено истражувачки стории во текот на претходната календарска година да се пријават за ЕУ наградата за истражувачко новинарство. Наградата има за цел да ја подобри слободата на изразување, да го подржи владеењето на правото и да фрли светло на различни прашања кои влијаат на националните и регионалните случувања. Тоа може да вклучува организиран криминал, корупција, екстремизам, странски влијанија, прекршување на човековите права (вклучувајќи и во онлајн сферата), и други суштински прашања од јавен интерес.
Како дополнување на националните награди, втора година по ред ќе биде доделена и регионална награда за истражувачко новинарство. Регионалната награда има за цел да поддржи разработка на прашања од прекугранично значење и да адресира предизвици кои регионално влијание.
Годишниот награден фонд за Македонија изнесува 10.000 евра. Дополнително, наградниот фонд за регионалните награди изнесува исто така, 10.000 евра. Ќе бидат избрани три најдобри стории на национално, и три на регионално ниво, при што паричните награди изнесуваат по 5.000 евра за прво место, 3.000 евра за второ место и 2.000 евра за трето место.
Секој кандидат може да пријави свои стории за националната, за регионалната или и за двете награди. Еден кандидат на конкурсот може да пријави најмногу три стории.
Жири-комисијата ја сочинуваат локални и меѓународни експерти, уредници, академици и искусни новинари, со цел да се обезбеди фер и строг процес на оценување. Оваа година членовите на жири-комисијата за националната награда ќе имаат ексклузивно право сториите кај кои ќе препознаат регионална вредност да ги предложат и за регионалната награда, дури и во случај тие стории при аплицирањето да не биле пријавени за тој конкурс. Доколку пријавените не освојат една од трите награди на националниот конкурс, сепак може да се натпреваруваат за регионалната награда доколку ги исполнуваат критериумите.
Конкурсот за ЕУ наградата за истражувачко новинарство 2024 го организира „Томсон Mедија“, а спроведувач во Македонија е Самостојниот синдикат на новинари и медиумски работници (ССНМ), организации со децениско искуство во развој на медиумите, промоција на правата на новинарите и професионалното новинарство.
Како и минатата година, конкурсот е дел од проектот „Зајакнување на квалитетното новинарство во земјите од Западен Балкан и во Турција 2“, кој има за цел подобрување на видливоста на квалитетното новинарство во регионот.
Овој проект е финансиран од Европската Унија и е спроведуван од конзорциум кој го сочинуваат Балканската истражувачка репортерска мрежа – БИРН Хаб, Централно-европскиот Универзитет (ЦЕУ) – Унгарија, Асоцијацијата на новинари (АЈ) – Турција, Томсон Медија (ТМ) – Германија, Универзитетот Гоце Делчев Штип (УГД) – Македонија, Самостојниот синдикат на новинари и медиумски работници (ССНМ) – Македонија, Асоцијацијата на медиумите од југо-источна Европа (МАСЕ) – Црна Гора и Балканската истражувачка репортерска мрежа Косово (БИРН Косово).
Рокот за поднесување апликации е 13 јуни, 2024 до полноќ.
За повеќе детали за процесот, како и за потребните документи за аплицирање кликнете тука.
За дополнителни прашања пишете на електронската пошта: [email protected]