Македонија
Шврговски: Незаконски е Мијалков да биде притворен веднаш само затоа што против него се водат повеќе постапки

Бранителите на ексдиректорот на УБК, Сашо Мијалков, на денешната јавна седница на Апелациониот суд ја образложуваа жалбата за одредениот притвор за Мијалков по донесената пресуда од 3 години казна затвор за случајот „Титаник 2“, кој се однесува на изборни нерегуларности.
Адвокатот Љупчо Шврговски рече дека незаконски и неосновано е изречена мерка притвор за Мијалков до извршување на затворската казна бидејќи досега не прекшил ниту една мерка што му била изречена од страна на судот.
„Со донесување на мерката притвор за Сашо Мијалков сторени се суштествени повреди. Опасноста од бегство судот ја има образложено со една реченица, тоа воопшто и не може да се нарече образложение. Не е дозволиво со такво образложение да се одреди притвор.
Тоа што судот го стори е незаконски и неосновано. Судот за човекови права во Стразбур вели дека мора да се дадат причини дека која било претходно изречена мерка е повредена, па потоа да биде дадена мерка притвор“.
Шврговски истакна дека во македонската судска пракса за вакво дело, каде што казната затвор изнесува од 1 до 5 години, не се случило да биде определена мерка притвор со образложение дека против обвинетиот се водат други постапки. Тој додаде дека и пресудата за овој предмет е бесмислена.
Адвокатот Петар Василев во целост се приклучи кон жалбата на другите бранители на Мијалков за изречената мерка притвор по што додаде дека мерката притвор е изречена од страна на неовластен совет, а пресудата е донесена врз основа на обвинение од новластен тужител и дека таа не е основана.
„Неовластениот тужител, кој даде предлог пред неовластен судечки совет, не образложи зошто притворот е неопходен. Одбраната не е виновна што неовластениот тужител поднел обвинение 25 дена подоцна од рокот што му е предвиден во законот. СЈО воспоставило надлежност на 4.12.2015 година, а обвинителниот предлог го поднело на 29.6.2017. Дали пречекорувањето на роковите имаат растеглива димензија? Како што јас знам, завршувањето на рокот значи смрт за одреден предмет, како што е и сега“, рече Василев.
Обвинителката од специјалното јавно обвинителство, Фатиме Фетаи, уште пред апелацискиот совет ги образложи барањата за притвор на Сашо Мијалков и Бедредин Ибраими по што истакна дека при одредување на притворот не е направена суштествена повреда, како и дека не се точни наводите на бранителите дека судечкиот совет и Обвинителството се неовластени за случајот.
„Законскиот рок за поведување обвинение за случајот ‘Титаник 2’ е испочитуван. Не се точни наводите на одбраната дека обвинението е поведено 18 месеци по добивање на незаконски прислушуваните материјали и преземање на случајот, рече Фетаи.
Обвинителката како образложение за можно бегство на Сашо Мијалков ги наведе неговите контакти што ги има создадено со оглед на тоа дека подолго време бил во тајните служби на државата.
Покрај жалбите за притворот на Сашо Мијалков и Бедредин Ибраими, бранителите донесоа жалба и против одредените мерки на претпазливост против другите осудени во случајот, Влатко Сајковски, Сашо Срцев и Анета Стефановска.
Лидерот на ДПА, Мендух Тачи, кој за случајот беше осуден на 3 години и 2 месеци затворска казна, е единствениот што не поднесе жалба за изречената мерка на претпазливост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) „На повидок е корупциски скандал во Владата, дали Меџити барал мито“, прашува Илиевски

„На повидок е голем, робусен корупциски скандал во Владата! Бараме премиерот Христијан Мицкоски да излезе и да одговори: дали е точно дека Државниот управен инспекторат констатирал „злоупотреба на службената должност“од страна на министерот и вицепремиер Изет Меџити и неговиот кабинет“, прашува Методија Илиевски, потпретседател на СДСМ.
„Не е прашањето дали Меџити бил лишен од своите надлежности, прашањето е дали во Решението на Инспекторатот од 17.01.2025 година е констатирана злоупотреба на службенета должност.
Бараме веднаш Решението на инспекторатот да биде јавно објавено. Јавноста мора да им увид во сите детали.
Особено што според информациите кои треба да се потврдат оваа мерка е донесена како резултат на бројни поплаки и пријави од граѓани и компании кои биле уценувани и условувани.
Ова се сериозни индикации за робусна корупцијата во врвот на владата на Мицкоски. На колку бизнис компании им е барано мито? Дали Меџити барал мито? Кој е се оштетен?
СДСМ ја повикува Државната комисија за спречување корупција и Јавното обвинителство за отворат предмет и да преземат соодветни постапки.
Очигледно зад превезот на лажниот патриотизам се крие корупција и злоупотреба на државните институции од страна на ДПМНЕ и ВЛЕН. Нема да дозволиме ваквите скандали да останат без правна завршница последици. Надлежните институции мора да реагираат“, изјави Методија Илиевски, потпретседател на СДСМ.
Македонија
(Видео) Мицкоски: По три децении започна реконструкцијата на Домот на култура „11 Октомври“ во Ченто

„На мое задоволство денеска сум дел од еден вака убав настан којшто ќе реши еден проблем што трае, еве, само што добив информација, речиси три децении. Место коешто ќе добие нов лик, место коешто ќе го користат жителите на општина Гази Баба, зошто да не и од цело Скопје. Овој културен дом ќе претставува навистина убаво место, каде што ќе можат да се случуваат културни настани“, рече премиерот Христијан Мицкоски.
„Јас би сакал да ја искористам оваа прилика да честитам и на градоначалникот и на министрите и на сите оние коишто беа вклучени во овој процес, да отпочнеме со реализацијата на овој проект, бидејќи ценам дека на општина Гази Баба ѝ е потребно едно вакво место.
Продолжуваме и понатаму да финансираме како Влада, проекти за општините, капитални инвестиции. Веќе новиот повик е објавен, според она што го имам како информација, а тоа најдобро го кажа и градоначалникот. Веќе аплицираше општината Гази Баба со новите проекти, така што очекуваме, би рекол, динамична пролет и реализација не само на оние од првиот повик, туку и отпочнување на реализацијата на проектите од вториот повик.
Така што, уште еднаш дозволете ми да му честитам на градоначалникот, на пратениците, на советниците, на администрацијата во општина Гази Баба, на министрите, на сите оние кои беа вклучени во реализацијата и во подготовката практично на овој проект, кој по речиси три децении ќе добие нов лик, којшто ќе може жителите на општина Гази Баба да го користат и културно да се воздигнуваат“, изјави Мицкоски.
Македонија
„Воведувањето кривична одговорност за судиите е неопходна, тие не смеат да бидат недопирливи“, Левица бара власта да го поддржи нивниот предлог

„Покрај Предлог-законот за заштита на потрошувачите со кој Левица предлага да се укинат двојазичните декларации на производите, на утрешната собраниска седница ќе се најде и уште еден предлог на пратеничката група на Левица – дополна на Кривичниот законик со цел воведување кривична одговорност за судиите“, велат од Левица.
Од таму ги повикуваат сите пратеници, особено владејачкото мнозинство, на утрешната седница на Собранието да ги поддржат овие „разумни и неопходни предлози“ на Левица.
„Воведувањето на кривична одговорност за судиите е неопходна за да се стави крај на децениската пракса на неказнивост, праксата каде корупцијата е правило, а а правдата исклучок. Судиите не смеат да бидат недопирливи!
Со години гледаме како политичките и бизнис елитите манипулираат со правниот систем. Мораме да се спротиставиле на судските мафијашки врски, да ја заштитиме правдата и да ја вратиме довербата на граѓаните во институциите.
Овој Предлог-закон е првиот чекор кон вистинска реформа во судството. Ги повикуваме сите пратеници, доколку се навистина против корупцијата, ако навистина се залагаат за правда – да го поддржат овој предлог.
Секој што ќе гласа против, или ќе се воздржи од гласање – ќе докаже дека е соучесник и дел од криминалот и корупцијата која ја гуши Македонија“, соопшти Левица.