Македонија
Шилегов на регионален самит во Истанбул

Градоначалникот на град Скопје, Петре Шилегов, ја потенцира важноста од имплементирањето на системот на иновации во креирањето еколошки напреден град, како и чекорите што Град Скопје ги реализира во оваа област за време на неговото учество на регионалниот самит Regional Living Lab Summit, кој во наредните неколку дена се одржува во Истанбул, Турција.
„Град Скопје презема чекори и активности за да овозможиме систематски и интегрален пристап кон креирање услови за развој на иновативен екосистем. Нашиот пристап се рефлектира преку еден поширок концепт на Центарот за креирање и развој на бизниси. Преку овој концепт системски се развиваат повеќе области, каде што реализираме поголем број активности и проекти. ‘Скопје лаб’ е резултат на соработката помеѓу Град Скопје и УНДП. Целта на овој центар е зајакнување на капацитетите на градската администрација, нејзините процеси, постапки и дејствување. ‘Скопје лаб’ функционира како центар за иновации на Град Скопје, чиј фокус е подобрување на услугите што градот им ги нуди на граѓаните.
‘Лабораторијата за урбано живеење’ во Скопје е резултат на успешното дејствување во рамките на проектот РОК во рамките на европската програма за истражување и иновации ‘Хоризонт 2020’. ‘Лабораторијата за урбано живеење’ има цел да биде модел за развивање на можности во Скопје. Од аспект на функционалност, целта му е да ги зближи широкиот опсег на заинтересирани страни од областа на развојот и урбаното планирање“, рече Шилегов.
Самитот го отвори градоначалникот на Истанбул, Мевлут Ујсал, и тој има цел да креира модел за развој на иновативен екосистем во регионот, со акцент на можноста Истанбул да прерасне во регионален центар и мост помеѓу земјите во развој од Блискиот Исток и Северна Африка и веќе развиените земји од Европа.
Искуството на градот Истанбул на полето на иновативен развој покажува дека клучот на успехот е во моќта на одлучувањето, политиките и посветеноста на општините и владата, кои се поддржани од страна на јавни, приватни или академски иновативни екосистеми. Истанбул има екосистем составен од повеќе од 60 иновативни центри.
На самитот во Истанбул учество зедоа претставници на голем број општини и државни институции од Турција, научни центри и универзитети и организации вклучени во иновативните екосистеми, како и градоначалниците на Тунис – Бен Суад, на Приштина – Шпенд Ахмети и на општината Трептоу-Копеник во Берлин, Свен Шмол.
Во рамките на посетата на Истанбул градоначалникот Шилегов и делегацијата на Советот на Град Скопје остварија средба со градоначалникот на Истанбул, Мевлут Ујсал. На средбата е дискутирано за досегашната соработка меѓу двата збратимени града, како и за можностите и областите во кои може таа да се интензивира.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Јанковиќ: Наместо лаги за Филипче, Бојан Стојановски да се покаже во Собрание и нека гласа за минимална плата од 500 евра

Наместо лаги за Филипче, Бојан Стојановски да се покаже во Собрание и нека гласа за минимална плата од 500 евра, изјави Јовица Јанковиќ од СДСМ.
„Со ВМРО-ДПМНЕ граѓаните осиромашуваат. Ударот врз куповната моќ на граѓаните е резултат на неспособноста на владата на ВМРО-ДПМНЕ и дебаклот на сите нивни промашени економски политики. Бидејќи ВМРО-ДПМНЕ не испорача никаков резултат а разочарувањето кај граѓаните е огромно штанцаат невистини за Венко Филипче. Очигледно Бојан Стојановски одработува за нечии бизнис интереси штим зборува лаги во кои ниту тој самиот не верува. За катастрофалната економска состојба во која ја доведоа државата се знае кој е крив, тоа е ВМОР-ДПМНЕ и неспособната влада“, рече тој.
Јанковиќ вели дека Бојан Стојановски може да докаже на дело дека навистина мисли на работниците и на граѓаните, во македонското Собрание.
„Еве, за почеток нека ги поддржи предлозите на СДСМ за: зголемување на минималната плата на 500 евра, укинување на ДДВ за храната и основните прехранбени производи, континуирано покачување на платите во сите сектори. Понатаму, нека ги повика и неговите колеги од ВМРО-ДПМНЕ да гласаат за овие решенија и да побара од неговата влада да се откаже од луксузирањата со парите на граѓаните за папаја и манго“, рече Јнаковиќ.
Македонија
Родителите од Демир Хисар револтирани: Законот ги принудува учениците на сместување во домови за да добијат превоз

Родители од Демир Хисар изразија незадоволство од измените на законот за средно образование и изразија загриженост за превозот на децата до и од училиште. Тие велат дека со измените, децата мора да аплицираат во училишните домови, а ако бидат одбиени или, пак, не сакаат да престојуваат таму, не им следува превоз.
„После нашето долго талкање по институции кои се засегнати во случајов, мислејќи дека тоа е правиот пат, досега не најдовме решение. Први септември е на прагот и наместо нашите деца да се радуваат што ќе се вратат во школските клупи во средното училиште кое бил нивен избор, тие, а и ние, се соочуваме со банални работи.
Со измените на законот нашите деца принудени се да аплицираат во училишните домови, а ако одбијат не следува превоз, а со тоа се кршат правата на учениците на избор, дали да седат или патуваат, бидејќи средното образование е задолжително. Кога ги запишувавме децата ни беше дадена изјава дека како родители се согласуваме да патуваат, а не да седат во интернат. За преку ноќ сето тоа да се смени и по брза постапка да поднесуваме документи во средношколскиот дом, иако тоа воопшто не го сакаат децата. Ако не се поднесе пријава, не следува превоз, ако се примени, а одбијат да седат, пак не им следува превоз. Едноставно сметаме дека сме уценети, за нешто што сепак е задолжително. Сметаме дека се направени доста неправилности со изборот и критериумите“, се наведува во дописот на родителите.
Велат дека ако едно дете е оддалечено 30 километри од Битола превозот чини 3.500 денари, а домот чини 11.000 денари.
Пример, велат родителите, има ученици, брат и сестра, каде сестрата е примена во домот, а братот не е. Со овие измени, додаваат тие, се прават само дупли трошоци.
Родителите прашуваат зошто воопшто е земена како критериум финансиската состојба на родителите за нешто што треба да го покрие државата.
„За овој проблем се обративме прво кај директорката на домот, со којашто не наидовме на разбирање, и таа не препрати кај градоначалникот на општина Демир Хисар, кој патем воопшто и не е засегнат со превозот на учениците од битолските училишта, но културно не прими и ни вети дека ќе помогне во рамките на можностите. Потоа се обративме и до градоначалникот на општина Битола , кој впрочем и е најзасегнат со превозот на овие ученици, бидејќи средствата за учениците од битолските училишта се праќаат во општина Битола, но таму ни беше кажано дека само ги почитуваат измените на законот. Пуштивме допис и до министерството за образование, до министерката Весна Јаневска, каде што ни беше вратено, навидум со автоматска порака, дека ќе се разгледа и реши проблемот. Министерката во вторникот, 26 август, имала средба со градоначалникот на Битола и кажала нема измени на законот во наша полза. Како родители сметаме дека не се во ред измените на законот, кој патем се направени многу брзо, без претходно истражување и консултација“, велат родителите.
Тие велат дека ниту децата сакаат да седат во домот, ниту пак тие како родители сакааат, бидејќи Демир Хисар не е многу оддалечен од Битола.
„Повеќе не изреволтира фактот што според нашите првични сознанија имаше ученици кои што се со место на живеење во Росоман, Демир Капија, Неготино, изминатите години седеа во домот, и оваа година сакаа, а не беа првично примени во домот, иако се најоддалечени, што всушност би требало да биде прв и најважен критериум. За потоа како откажуваат нашите деца тие по дифолт да ги примаат во домот тие што првично не се примени, а на тие што не сакаат да седат му го укинуваат превозот“, се наведува во дописот.
Родителите наведуваат дека учениците од општина Демир Хисар, кои што се запишани во училиштата во општина Битола, на почетокот на учебната година нема да присуствуваат на наставата во училиштата.
„А во моментов тоа се околу 100 ученици од општина Демир Хисар кои што учат во општина Битола и се соочуваат со тој проблем, а со самото тоа и ние како родители. Во Демир Хисар има само едно средно училиште, и тоа со два смерови општа гимназија и компјутерска автоматика. Со овие измени на учениците му се скратува правото на избор на саканото училиште, пр.други смерови од техничката струка, медицинска или економска струка, кои ги има во Битола. Бидејќи нашите деца не сакаат да седат во домот, дали треба да се отпишат и да се презапишат во Демир Хисар? Немаат право да им ја уништуваат иднината и соништата на децата.
Со овој проблем не се засегнати само учениците што учат во битолските училишта, туку и од цела Македонија.
После нашето долго талкање по институции кои се засегнати во случајов, мислејќи дека тоа е правиот пат, досега не најдовме решение“, пишуваат родителите.
Тие најавија дека ако проблемот не се реши, на 1 септември ќе организираат протест со блокади на патиштата.
Македонија
Алијанса за Албанците: ВМРО-ДПМНЕ се обидува да ја оцрни фигурата на Таравари преку клевети и игри со зборови

Алијансата за Албанците оценува дека ВМРО-ДПМНЕ, заедно со „експериментот ВЛЕН“, се обидува да ја оцрни фигурата на претседателот, д-р Арбен Таравари, преку клевети и игри со зборови, се наведува во реакцијата на Алијанса за Албанците на обвинувањата од ВМРО-ДПМНЕ.
„ВМРО-ДПМНЕ и нивните сателити, доколку имаат некакво сомневање или тврдење, нека го докажат. Во спротивно, тоа останува само ниска пропаганда за одвлекување на вниманието од вистината: д-р Арбен Таравари им ги урна мрачните планови против Албанците. Ова можат многу лесно да го направат, бидејќи сите државни институции ги имаат под контрола и имаат целосен пристап до секој официјален документ. Ги повикуваме да се разбудат – тие не се опозиција, тие се власт и држава. Алијансата за Албанците ги повикува, користејќи ги сите надлежности и институции што ги раководат, да презентираат барем една единствена врска помеѓу инвеститорот од Албанија и д-р Арбен Таравари. Или можеби, за нив секој инвеститор од Република Албанија е сомнителен?“, се наведува во реакцијара.