Македонија
Шокаровски: Смртноста на кардиохирургија се намалува, разрешувањата се незаконски, а 170-те пациенти не се фантоми, туку по грешка не се заведени во „Мој термин“
Смртноста на Клиниката за кардиохирургија не е зголемена, туку има тренд на намалување, нема пациенти фантоми, кои не се заведени никаде, туку има грешка во врската со „Мој термин“. Вчерашните разрешувања што ги направи министерот Илир Демири се незаконски, а сите случувања се оркестриран напад на државната кардиохирургија со цел да се уништи оти тоа некому не му одговара. Вака разрешениот директор на Клиниката за кардиохирургија, Марјан Шокаровски, одговори на обвинувањата и разрешувањата од министерот за здравство.
„Моето разрешување е незаконско бидејќи во мандатот на техничката Влада не може ниту да се именуваат ниту да се разрешуваат раководители. Ги повикувам релевантните институции, кои треба да се грижат за законитоста во оваа држава, да реагираат. Дополнително, министерот за здравство го разреши координаторот за развој на кардиоваскуларната хирургија при Министерството, Александра Ефтимова. Истовремено, му го прекина договорот на координаторот за срцева трансплантација при Министерството, Адријана Георгиев. Оттука се наметнува нашето прашање дали се работи за оркестриран напад против државната кардиохирургија, а со тоа и напад на јавното здравство. Која е потребата на министерот во заминување да направи едно вакво тектонско изместување на една успешна приказна? Кому тоа му одговара?“, праша разрешениот директор Шокаровски.
Според него, министерот во заминување, под изговор дека се грижи за работењето, ја крие намерата да се дискредитира и наруши угледот и на клиниката и на тимот, кој неуморно ги третира најкомплицираните случаи во македонското здравство. Шокаровски вели дека сите бројки за смртноста изнесени во некои медиуми се неточни и шпекулативни, а комисијата што ја формирал министерот Демири била составен од лекари што немаат никаков контакт со кардиоваскуларни пациенти.
„Во јули 2023 објавено е дека се оперирани 12 пациенти. Податокот не е точен, оперирани се 22 пациенти. За август податокот е дека се 11, а оперирани се 14 пациенти. За октомври податокот е дека се оперирани 8, а оперирани се, всушност, 16 пациенти. Вкупната разлика е 21 пациент во презентациите. Очигледно изворот на податоци ги довел во заблуда и дал погрешни бројки, а тие не се потрудиле да ја чујат другата страна, што е основен принцип во објективноста на информирањето. Токму поради ова направивме сопствена статистичка експертиза со помош на експерти во областа. Од анализата дојдовме до објективни заклучоци, кои ги побиваат сите претходно изнесени невистини од страна на министерот во заминување, како и од одредени медиуми. Прво, не е точно дека се зголемила смртноста откако јас сум назначен за раководител на институцијата. Прецизната статистичка анализа покажува дека нема значајно зголемување на смртноста, од една страна, а има значајно зголемување на тежината на комплексноста на пациентите околу 20 %. Второ, постои тренд на намалување на смртноста во текот на месеците. Последните пет месеци покажуваат дека нашата смртност е помала од предвидената, односно пониска, подобри сме од она што се очекува“, рече разрешениот Шокаровски.
Нивната анализа покажала и дека не постојат 170 фантомски пациенти за кои нема ниту оптупсни писма ниту умреници, а за што обвини министерот Демири во понеделникот.
„Најостро ги демантираме овие невистини. Нашата анализа и контактите со ‘Мој термин’ покажуваат дека постои техничка грешка во пренесувањето информации од софтверската платформа, која ние ја користиме за евиденција на пациентите, до платформата ‘Мој термин’. Отпусните писма на некои од пациентите не се пренесени во ‘Мој термин’ поради овој софтверски пропуст. Овие пациенти не се ниту скриени ниту фантомски избришани. Сите тие имаат уредни детаљни отпусни писма, што секако може да се провери. Проблемот не е од денес-вчера, подолго се провлекува, уште пред јас да бидам назначен за директор“, објасни Шокаровски.
За најбезобразна лага тој ги смета шпекулациите дека клиниката не произведувала кадар, туку само професори, за што ги повика надлежните институции и министерствата за здравство и образование да реагираат оти, како што рече, некој се охрабрува да го преиспитува Медицинскиот факултет.
Шокаровски предложи да се направи ревизија на дипломите на сите лекари не само во јавното туку и во приватното здравство за да се стави крај на самопромовирањето во експерти во кардиохирургијата. Предложи ревизијата да почне од Клиниката за кардиохирургија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Без разлика на етничката, верската и политичката припадност, на 2 ноември да се обединиме во Кичево
После вториот круг очекувам 59 градоначалници да има коалицијата предводена од ВМРО-ДПМНЕ, со што ќе ја заокружиме највисоката бројка во историјата на демократската Македонија, по бројот на градоначалници, којашто некогаш се случила. И ако на тоа се додаде и извесната победа на Орце Ѓорѓиевски за град Скопје, којшто води 3:1 после првиот круг во однос на неговиот противкандидат, тогаш заокружуваме бројка од 60 градоначалници коишто ќе дојдат од коалицијата предводена од ВМРО-ДПМНЕ, вклучително и главниот град, рече претседателот на ВМРО-ДПМНЕ, Христијан Мицкоски на вечерашниот мини митинг во Кичево во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември во недела.
Мицкоски се осврна и на победата на коалицијата предводена од ВМРО-ДПМНЕ за листите на советници во 58 општини.
Додаде дека не било лесно, туку дека било тешко, но единството и поддршката на граѓаните покажале дека може да се совлада и помногуброен противник.
„Затоа е многу важно на 2 ноември во недела да се обединиме овде во Кичево, без разлика на нашите различности, без разлика дали тие различности се етнички, верски или политички. Многу е важно да бидеме како едно, да се обединиме околу вредностите коишто ги споделуваме, да се обединиме околу цивилизацијата којашто ја застапуваме. Затоа што јас сум убеден дека против кандидатот на Александар не ги споделува нашите вредности, не ја споделува нашата цивилизација. И секој оној којшто ќе го земе пенкалото во рака и ќе застане позади гласачката кутија, со гласачкиот лист пред него, нека го слуша својот разум и своето срце и нека гледа длабоко во својата душа, од таму ќе извира бројот 9. И нека го заокружи бројот 9, нека заокружи за Александар“, повика Мицкоски.
Секој оној кој ќе биде исправен пред предизвикот дали да го поддржи Александар или неговиот против кандидат, додаде Мицкоски, нека се присети на вредностите кои ги застапува Александар и вредностите кои ги застапува неговиот против кандидат.
„Дали вие сакате да живеете во средина во којашто ќе владеат криминалот, блуд, разврат и уцени? Дали сакате Кичево да биде домаќин на блуд, разврат, криминал и уцени? Заборавете на етничката припадност, сетете се на вашите ќерки, на вашите внуки, дека некоја од нив може да биде жртва на овој човек. Затоа, кога ќе го имате пенкалото во рака, верувајте во вредности, не во басни, не во приказни. Заборавете на нешто што некој ви кажува дека се случило пред 4, 5, 6 децении, верувајте на оние коишто ви кажуваат што ќе се случува за четири, пет децении од денес. Заборавете на оние романтични приказни што некој ви ги кажува за некое измислено минато коешто никогаш не се случило. Верувајте на иднината којашто сите ние заедно Македонци, Албанци, Турци, Роми, Срби, Власи, Бошњаци и останати ќе ја градиме. Тоа е иднината на Македонија“, упати Мицкоски обединувачка порака и повик до сите етнички заедници.
Македонија
Николоски: Скопје од денеска директно се поврзува со шпанската престолнина Мадрид
Скопје од денеска директно се поврзува со шпанската престолнина Мадрид, авиолинија која е една од дваесетте авиолинии што ги воведовме во изминатата година, истакна вицепремиерот и министер за транспорт Александар Николоски, кој заедно со амбасадорот на Шпанија во Македонија, Рафаел Сориано Ортиз и Неџат Курт, генерален директор на ТАВ Македонија, го означија првиот лет Скопје-Мадрид.
Николоски потенцираше дека ова е огромен успех за авиосообраќајот, бидејќи со воведувањето на новите линии се забележува и значителен раст на патници и туристи во Македонија.
„Многу ми е драго што денеска почнува директна линија помеѓу Скопје и Мадрид, ги поврзуваме двата главни града, главниот град на Кралството Шпанија и главниот град на Македонија, нешто што е многу значајно, за развојот на туризмот, за развојот на бизнисот и за размената помеѓу двата народи, размената во културата, нешто што навистина многу значи“.
Од минатата година кога беше избрана оваа Влада до денес, додаде тој, отворена е 21 нова дестинација.
„Од Париз, од “Орли” се лета за Скопје, од Истанбул се лета за Охрид, од Дубаи ќе почне да се лета за Скопје оваа зима, од Барселона, од Лион, од Амстердам и од Љубљана се лета за Скопје, тука се чартерите на “Фрибрд Ерлајнс” кои што секој ден слетуваат на скопскиот аеродром, кои за скоро ќе бидат и по два дневно. До Охрид почна да се лета од Базел, Ларнака, Мадрид, Штутгарт, Бари, Стокхолм на главниот аеродром почнуваат овие денови. Понатаму, ја отвараме Женева, Келн, многу значајно за мене Прага, а веќе од пролет Неапол-Италија, Будимпешта-Унгарија, Катовице и Вроцлав до Охрид, и Милано исто така до Охрид.
Вкупно 21 нова дестинација, 21 нова линија, за зголемување на бројот на туристи и повеќе бизнис во Македонија. Сакам да се заблагодарам на директорот на ТАВ на неговиот тим, за одличната соработка која што ја имаме, да се заблагодарам на амбасадорот на Шпанија и да најавам дека ќе има уште дестинации од Шпанија, Барселона и Мадрид нема да се последни” истакна вицепремиерот Николоски
Македонија
Утре наутро претежно ведро и студено, преку денот сончево
Утре наутро ќе биде претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Во наредните денови следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

