Македонија
Ѓоко Поповски повторно доби 9 години затвор за набавката на полициски возила

Судијката Добрила Кацарска попладнево повторно го осуди на казна затвор од 9 години поранешниот помошник-министер во МВР, Ѓоко Поповски, откако во декември 2018 скопска Апелација ѝ го укина предметот.
Поповски е осуден за злоупотреба на службената положба и овластување и го оштетил буџетот за над 450 илјади евра. Во затворот му се засметува и времето поминато во притвор.
Кацарска во мај 2018 го осуди Поповски на казна затвор од 9 години за набавката на 300 полициски возила. Тој го доделил тендерот на фирми чии понуди не биле економски најповолни.
„Со тоа е нанесена штета на МВР од огромни размери“, рече Кацарска пред Поповски кого го донесоа од затворот да ја чуе пресудата.
„Обвинетиот не можел, а да не знае кои се најповолни понуди, и покрај тоа ги повластил економските оператори“, образложи Кацарска.
Судијката цитираше и извадоци од бомбите, каде што ексминистерката Гордана Јанкулоска кажува дека направиле финта за да бидат сите задоволни.
Поповски има право на жалба до Апелациониот суд. Тој е осуден и за предметот „Тенк“ со набавката на „мерцедесот“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Карпош и Сарај денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 13.00 часот, корисниците од ул. Пелистерска 4-1/8. (општина Карпош)
– во периодот од 09.00 до 14.00 часот, корисниците од улиците бр. 3 и бр. 5 како и околните објекти во нивна близина во Сарај.(општина Сарај)
Македонија
Без вода дел од Центар

Од ЈП Водовод и Канализација известуваат дека денеска поради дефект на улицата Димитрие Чуповски бр.10 без вода ќе останат корисниците од улицата Никола Вапцаров лоцирани на потегот од Министерство за правда до Плоштад Македонија, општина Центар.
Водоснабдувањето ќе биде прекинато во периодот од 08.00 часот па се до отстранување на дефектот.
Македонија
Променливо облачно со повремени локални врнежи од дожд

Времето денеска ќе биде променливо облачно со повремени локални врнежи од дожд. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 5 до 11, а максималната ќе достигне од 9 до 16 степени.
Во Скопје, променливо облачно со повремен локален дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 9, а максималната ќе достигне до 13 степени.
Времето во наредните денови
До среда ќе преовладува променливо облачно време со повремени локални врнежи од дожд. Ќе дува умерен до засилен северен ветер (локално над 60 km/h), а температурата ќе се задржи под просекот за овој период од годината. Од четврток времето ќе биде стабилно и суво со пораст на дневната температура.