Македонија
(Видео) Ѓорчев: Ветувавте план за живот, а не заковавте ни една шајка
Пратеникот од ВМРО-ДПМЕ, Владимир Ѓорчев во Собранието упати обвинувања до власта во делот на капиталните инцестиции, оценувајќи дека нивната реализација е ниска.
„За 2018 година вие зборувате за реализација на 65 проценти, на почетокот кажавте 400 милиони, а потрошивте 197 милиони. Тоа значи дека реализацијата е мизерни 49. Ако го тргнеме ребалансот, тоа се бројките. Од почетокот на годинава, за пет месеци имате реализирано само 13 проценти капитални инвестиции, метеор да паднеше во Македонија немаше да биде толку малку“, рече Ѓорчев.
Тој обвини дека власта не ја говори вистината, но во декември премиерот ќе треба да се соочи со граѓаните и да поднесе оставка.
„Ветувавте план за живот, патишта, фабрики, една шајка не заковавте. Излажавте и немате абер од инвестиции. Македонија стана егзодус за иселување на луѓето, кои најдоа план за живот во Шведска, Канада, Германија“, рече Ѓорчев.
На тоа Заев реплицираше коментирајќи дека во декември земјата ќе ги отвори поглавјата со Европската Унија.
„Ширите националистички политики, собирате поени. Билдате мускули, на овој начин, не карате со комшиите. Завршено е тоа, не ви поминува“, рече Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Оставка на Сабахадин Рустеми од „Комунална хигиена“ за да не влијае на истрагата
В.Д. директорот на ЈП „Комунална хигиена“ – Скопје, Сабахадин Рустеми, поднесе оставка од функцијата поради морални причини, соопшти неговиот адвокат Асмир Алиспахиќ.
Адвокатот изјави дека оставката не е поврзана со признание на вина, туку со желба да не влијае на истрагата.
„Тоа е чин што ќе овозможи непречено водење на постапката. Ќе докажеме дека Рустеми нема никаква поврзаност со делото“, рече адвокатот.
Според него, постојат докази дека Рустеми преземал активности за обезбедување механизација и ресурси, но дека неговите барања не биле одобрени од Управниот одбор на претпријатието.
Рустеми и Аки Саити, управител за отпад во претпријатието, добија мерка притвор од 30 дена поради основано сомнение за сторено кривично дело загрозување на животната средина и природата со отпад, како и опасност од влијание врз сведоци и можност за повторување на делото.
Македонија
Државна лотарија предупредува: нелегални платформи го злоупотребуваат името и логото
Нелегални интернет платформи неовластено го користат името и логото на Државна лотарија
Државна лотарија ги повикува сите играчи на интернет игри на среќа да внимаваат при изборот на интернет платформи и да учествуваат исклучиво преку официјалните канали на Државна лотарија, со цел да се заштитат од можни злоупотреби, односно, да учествуваат во игри на среќа, кои се транспарентни, регулирани и одговорно приредени.
Државна лотарија, како единствено овластено друштво за приредување игри на среќа во Република Северна Македонија, ја информира јавноста дека исклучиво таа има законско право да приредува лотариски, инстант лотариски и интернет игри на среќа на територијата на државата.
Секоја појава на трета страна, како што се додава, која неовластено користи визуелни елементи, лого или други обележја што претставуваат интелектуална сопственост на Државна лотарија, претставува нелегално користење и кршење на законските прописи, со што се доведува во заблуда јавноста и се нарушува довербата во легалниот систем за игри на среќа.
Македонија
Животните заслужуваат правда: здруженијата за заштита на животните со иницијатива за укинување на мерката за евтаназија на кучиња со лајшманиоза
Здруженијата за заштита на животните од целата држава имаат со иницијатива за укинување на мерката за задолжително тестирање и автоматска еутаназија на бездомни кучиња со лајшманиоза.
„Ние, здруженијата за заштита на животните од целата држава, заедно ја поднесовме оваа иницијатива пред повеќе од еден месец, со јасно барање – итно укинување на мерката за задолжително тестирање и автоматска еутаназија на бездомни кучиња со лајшманиоза, пропишана во точката 6.2 од Годишната наредба за здравствена заштита на животните“, појаснуваат во соопштението.
Оваа мерка, додаваат, е морален, научен и институционален пораз.
Таа, како што информираат, дозволува убивање на здрави животни под изговор на „заштита“, без никакво јавно-здравствено оправдување.
„Наместо превенција и контрола на векторите – единствениот вистински начин за справување со болеста, државата со години го избира најлесниот и најсуров пат: уништување на живот.
Од нејзиното воведување, мерката по инерција се повторува секоја година, без никакви резултати, легитимира убивање, служи како параван за трошење јавни средства и претставува смртна пресуда за илјадници здрави, мирни бездомни животни.
Ниту една земја од ЕУ не спроведува ваква пракса, ни оние со висока ендемичност како Грција, Италија или Шпанија. Светската здравствена организација, ECDC и CDC јасно укажуваат дека лајшманиозата не се пренесува од куче на човек, туку преку песочни мушички.
Значи, не убивањето, туку превенцијата е одговорот.
Покрај тоа, мерката е длабоко неправедна и дискриминаторска – се применува исклучиво врз бездомни животни, додека сопственичките остануваат надвор од системот. Тоа е двоен стандард, медицински апсурд и цивилизациски срам“.
Бараат надлежните институции итно да ја укинат оваа мерка и да воведат современ, хуман и европски модел за справување со лајшманиозата – преку превенција, лекување, згрижување и вдомување, а не ликвидација.
Ова прашање, оценуваат здруженијата, одамна го надминува полето на ветеринарната политика.
„Ова е прашање на вредности, морал и наука — затоа што мерка што медицински и научно е нелогична не може да биде оправдана ниту законски, ниту човечки.
Дали сакаме држава што убива, или држава што штити?
Македонија може подобро, а животните заслужуваат правда.

