Македонија
Ѓорѓиевски : Европските практики забрзано ќе се имплементираат, но блокадите се нерационални

Заедницата на единиците на локалната самоуправа (ЗЕЛС) и Министерството за локална самоуправа денеска се домаќини на 23. состанок на Заедничкиот консултативен комитет меѓу Република Македонија и Комитетот на регионите на Европската Унија (ЗКК). Делегатите во ова тело се од редовите на градоначалници и советници од нашата земја и од земјите на Европската Унија. Состанокот кој се одржува во хотелот „Александар Палас“ во Скопје, го отвори претседателот на ЗЕЛС и градоначалник на Општина Кисела Вода Орце Ѓорѓиевски.
Говорејќи на првата тема, посветена на ,,Развој во процесот на пристапување на Р. Македонија кон ЕУ“, Ѓорѓиевски ја истакна улогата на локалните власти во овој процес, бидејќи 70% од европското законодавство треба да се имплементира на локално ниво, но посочи и на нереалните условувања што Европската Унија ги има кон нас. Зборувајќи за европските средства од Планот за раст, од кои Македонија до крајот на годината треба да ја добие првата транша од 50 милиони евра, од околу 750 милиони евра, Ѓорѓиевски контатираше дека средствата ни се потребни за да ги достигнеме европските стандарди, но никако не треба да пристигнуват како услов и како гест на „добра волја“ од страна на ЕУ.
– Ние сепак веруваме дека ќе изнајдеме соодветни решенија, без вакви сериозни условувања на наша штета, а ја користам и оваа прилика да побарам поддршка од вас на овој наш пат. Она што не радува и ни влева надеж дека локалната власт конечно ќе фати чекор со имплементирање на посакуваните европски стандарди е односот што оваа Влада го има кон општините и кон ЗЕЛС . Уште на самиот старт од нејзиниот мандат, ни подаде рака и обезбеди финансиска поддршка за општините, за проекти за инфраструктура во висина од 100 милиони евра. Следната година, за истата намена се предвидува поддршка со средства во висина од 150 милиони евра. Исто така, во месец август ЗЕЛС потпиша Меморандум за соработка со Владата, а веќе се вложуваат напори и за креирање на сериозни реформи во локалната власт. Многу досегашни барања што низа години наназад ЗЕЛС ги доставуваше до централната власт, веќе сериозно се разгледуваат и се пристапува кон креирање на подобри законски решенија. Од наша страна, како претседател на ЗЕЛС, сакам да истакнам дека веќе имаме доставено Предлог-законско решение за комунална полиција и се надеваме на наша поголема вклученост при изработката на конечниот Предлог -Закон. Исто така, задоволни сме што оваа Влада се посветува на воведување на што поголем број дигитални услуги за граѓаните-потенцираше Ѓорѓиевски.
Зборувајќи на втората тема на денешниот состанок ,,Дигитална транзиција, особено во локалните и регионални јавни услуги”, тој потсети на електронските услуги кои ЗЕЛС им ги дава на општините во интерес на граѓаните.
– Одлична вест е и што Владата го прифати долгогодишното барање на ЗЕЛС за обезбедување на софтвер за електронска наплата на данокот. Штета, што ЗЕЛС не е финансиски моќна институција, бидејќи за реализација на оваа идеја од пред шест години, досега не наиде на поддршка ниту од претходните централни структури, ниту пак од Европската Унија, која впрочем во нашата земја спроведува Проект ,,Е – иновативни решенија на општините “. Сепак, важно е дека добрите идеи да бидат реализирани и јас сум сериозен оптимист дека тие ќе се имплементираат.
Од големо значење е што ќе му се даде приоритет и на прашањето за спроведување на паралелен процес на ажурирање на базите на даноци на имот од страна на општините. Нешто за што досега апелиравме до општините на сите седници на Генерално собрание на ЗЕЛС, највисокото тело на заедницата. Истовремено ЗЕЛС истапуваше и со бројни барања до Агенцијата за катастар на недвижности, да им ги префрли податоците бесплатно, што за жал не се случи-истакна Ѓорѓиевски во своето обраќање.
На 23. состанок на Заедничкиот консултативен комитет меѓу Македонија и Комитетот на регионите на Европската Унија, присуствуваат и свои обраќања имаат и министерот за локална самоуправа, Златко Перински, шефот за соработка на Европската делегација, Стефан Худолин, претседател на Комисијата за државјанство, владеење, институционални и надворешни работи при Европскиот Комитет на региони Патрик Молиноз, заменик министер за дигитална трансформација Радослав Настасијевиќ Варџински, градоначалникот на Град Скопје Данела Арсовска и Јасна Габриќ, член на Собрание на општина Трбовље и член на европскиот Комитет на региони, Раит Пихелгас, известител на КоР за Зајакнување на локалната власт и претставничката демократија преку нови инструменти за дигитална технологија, Јана Белчева Андреевска, НАЛАС офицер за дигитална трансформација и Ивана Велкова, вршител на должност директор на ALDA Балкан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Ѓорче Петров и Чучер Сандево денеска без струја

Регионалниот центар за управување со кризи на Град Скопје, по добиеното известување од ЕВН, информира дека поради планирани зафати во електро дистрибутивната мрежа, денеска без напојување со електрична енергија ќе останат:
· од 09:00 до 13:00 часот, објектите на Полициската Станица и базата на БППЗ во Ѓорче Петров, општина Ѓорче Петров;
· од 09:00 до 15:00 часот, корисниците од дел од нас. Кисела Јабука, општина Ѓорче Петров;
· од 09:00 до 16:00 часот, корисниците од селата: Побожје, Бродец, Танушевци, Брест и Малино, општина Чучер Сандево;
· од 11:00 до 13:00 часот, корисниците од дел од ул. Кадињача, општина Ѓорче Петров.
Македонија
Утрото ведро и посвежо, преку денот сончево со температура до 27 степени

Утрото ќе биде ведро и посвежо, преку денот сончево со мала до умерена локална облачност. Ќе дува слаб до умерен ветер од северен правец. Минималната температура ќе биде во интервал од 0 до 7, а максималната ќе достигне од 19 до 27 степени.
Во Скопје, сончево со слаб до умерен ветер од северен правец. Минималната температура ќе се спушти до 5, а максималната ќе достигне до 27 степени.
Времето во наредниот период
Во четврток попладне и во петок ќе има услови за локален краткотраен дожд и ретки грмежи. Ќе дува умерен северен ветер. Во деновите од викендот ќе биде стабилно, сончево и топло со мала до умерена облачност, а од почетокот на следната седмица се очекуваат повремени врнежи од дожд и појава на грмежи.
Македонија
Партиите од ВЛЕН отсега ќе делуваат како еден политички субјект

Коалицијата ВЛЕН известува дека „денес е направен првиот чекор кон целосно политичко обединување, со заедничка визија и обединета структура, како единствена сила што ја претставува надежта, достоинството и иднината на Албанците во оваа земја“.
„На денешниот состанок беше формирано Заедничкото Претседателство на ВЛЕН, како прв орган што ќе ги координира сите политички и организациски активности на коалициско ниво.
Од денес стапува во сила мораториум на јавните активности на политичките партии учеснички во ВЛЕН, при што сите активности и настапи ќе се реализираат исклучиво под името, логото и единственото претставување на ВЛЕН.
Во наредниот период ќе се формираат и другите заеднички органи, вклучително и Раководството на ВЛЕН и Шефот на Изборниот штаб, кој ќе ја води подготовката за претстојните избори.
Пратеничката група на ВЛЕН ќе продолжи да функционира со актуелните пратеници кои го поддржуваат процесот на обединување и се посветени на јакнење на заедничкиот глас на Албанците“, велат од ВЛЕН.