Македонија
Ѓорѓиевски и Тошковски на увид на локација за нова полициска станица

Градоначaлникот Орце Ѓорѓиевски и Министерот за внатрешни работи Панче Тошковски, заедно со командирите од двете полициски станици на територија на општина Кисела Вода извршија увид во населбата Кисела Вoда. На локација, во близина на кружниот тек помеѓу Кисела Вода и Припор, градоначалникот Ѓорѓиевски на Министерот Тошковски му ја презентираше можноста за изградба на нова полициска станица, која е предвидена со ДУП-от.
-Денес заедно со Министерот за внатрешни работи Панче Тошковски направивме детален разговор околу подигнувањето на безбедноста на нашите граѓани. Во моментов на територија на општина Кисела Вода функционираат две полициски станици, но со оглед на тоа што во општината живеат околу 70 000 жители, и тоа што едната полициска станица ја покрива цела централна Кисела Вода се до Пинтија, додека ПСОН Драчево покрај селото и населбата Драчево ги покрива и Студеничани, Батинци, Зелениково и Морани, несомнено е потребно отворање и на трета полициска станица. Тоа би овозможило поголема присутност на полицајците на терен, но и побрза реакција во случај на одредени ситуации кога е загрозена сигурноста на нашите жители. Од разговорот со почитуваниот министер Тошковски, сакам да истакнам дека заеднички сме подготвени за нови иницијативи и проекти, што ќе ги засилат нашите напори за изградба на посилна заедница во која доследно ќе се спроведуваат законите и ќе се превенира криминалот-изјави градоначалникот Ѓорѓиевски.
Министерот Панче Тошковски се информираше од командирите на полициските станици околу капацитетите кои во моментот се користат и ефективноста во однос на бројот на вработени и искористеноста на просторот. На пример дека полициската станица “Пролет” е сместена на територија на Центар, а ги опслужува граѓаните на општините Кисела Вода и Сопиште. Заклучи дека има простор за одлична реорганизација, дека просторот кој го предлага градоначалникот Ѓорѓиевски е соодветно решение кое ќе донесе бенефит најмногу за граѓаните, но и за полициската станица “Беко” и за “Пролет”, бидејќи освен што е се зголеми ефективноста поради близината, олеснување ќе има и за сообраќајот и за паркинг просторот кој посебно е изразен како проблем во полициските станици “Беко” и “Пролет”.
Инаку предвидениот простор кој се наоѓа во близина на кружниот тек во Кисела Вода е предвидено да има 3700 метри квадратни, објектот би бил околу 400 квадратни метри, а би и имало партерно уредување и голем паркинг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Стабилна е здравствената состојба на осумтемина македонски пациенти“: Сиљановска-Давкова ги посети во Софија

Претседателката Гордана Сиљановска-Давкова објави дека ја посетила болницата „Пирогов“ во Софија каде што се згрижени повредените во трагичниот пожар во Кочани.
„Со чувство на длабока и искрена грижа, најпрво ја посетив болницата „Пирогов“ во Софија каде што се згрижени и се лекуваат македонските граѓани повредени во трагичниот пожар во Кочани.
Во разговорот со министерот за здравство, проф. д-р Силви Кирилов, заменик-директорот на болницата, проф. д-р Николај Габровски и раководителката на Одделот за изгореници и пластична хирургија, доц. д-р Маја Аргирова, бев информирана дека здравствената состојба на осумтемина македонски пациенти е стабилна, се наоѓаат под постојан надзор од страна на врвни, искусни лекари и дека процесот на закрепнување бележи напредок.
Во присуство на лекар Македонец, ми беше овозможен подолг разговор со најблиските роднини на македонските пациенти. Тие најпофално се изразија за болничкиот персонал и манифестираа радост за видно подобрената состојба на нивните најмили“, информира претседателката.
Таа појасни дека се сретнала и со дел од бугарските медицински тимови коишто директно учествуваа во укажувањето на итна медицинска помош и им изразила особена благодарност за нивната пожртвуваност, човечност и професионалност.
„Нивната благородна мисија е вистинско олицетворение на медицинската етика, солидарноста и хуманоста, вредности коишто ќе останат темел на заемна почит и искрено пријателство меѓу двата блиски народа, бугарскиот и македонскиот“, објави Сиљановска-Давкова.
Македонија
Можно зголемување на водостојот на реките во западните делови од земјата, најави ЦУК

Водостоите на реките низ земјава се во опаѓање. Водостојот на река Вардар исто така бележи намалување по целото течение на реката и тоа се очекува да продолжи до крајот на денот, соопшти ЦУК.
„Во доцните вечерни часови и за време на претстојната ноќ се очекуваат нови врнежи од дожд претежно во западните делови на земјата каде се прогнозираат количини на врнежи од 15-20 l/m2. Земјата полека се заситува со влага од претходните врнежи изминативе денови така што можна е реакција на реките во западниот дел на земјата и извесно зголемување на нивниот водостојот. Зголемување на водостојот доцна во ноќта и утре изутрина може да има на река Треска, река Црна, на водотеците од горниот дел од сливот на река Вардар, како и на реките кои доаѓаат од планинскиот масив Солунска Глава“.
Според прогнозите можни се и краткотрајни врнежи со умерен интензитет кои што можат да доведат до брзо зголемување на водостојот на помалите реки и суводолици во западниот дел на земјата, односно на малите реки и суводолиците кои доаѓаат од Шар Планина и од планината Јакупица (масивот Солунска Глава).
Пообилни врнежи можни се и во делови од градските средини како Тетово и западниот дел на Скопје каде што предупредуваме на внимание.
Во источниот дел на земјата во текот на денешниот ден не се очекуваат поголеми зголемувања на водостоите.
ЦУК предупредува на внимателно движење покрај реките и суводолиците во текот на вечерните часови и ноќта.
Македонија
Мицкоски и Филипче ги поделија сферите на интерес и се договорија да ја задушат правдата, велат од Алијанса за Албанците

Премиерот Христијан Мицкоски и лидерот на СДСМ, Венко Филипче во изјавите по денешната скандалозна средба ги потврдија сите наши сомнежи и ги открија своите планови, велат од Алијанса за Албанците.
„Тие се согласија да формираат работни групи во три области кои се поврзани, се вкрстуваат или од интерес за двајцата лидери. Ќе ја подготват реформата во здравството, сфера на интерес на Венко Филипче каде што ќе се заобиколи актуелниот министер Арбен Таравари, во енергетиката, сфера на интерес на Христијан Мицкоски, сопственикот на хидроцентралите и на крајот, „правдата“ каде Филипче и Мицкоски имаат заеднички интерес да се спасат меѓусебно од одговорноста за Кочани, Модуларната Болница во Тетово, Беса Транс и Дурмо Турс и другите трагедии и скандали кои се случија во земјава“, истакнуваат од оваа партија.
Овој договор, како што велат е целосно игнорирачки за Албанците, а воопшто не ги третираат ни нивните албански „партнери“ во Владата.
Овој договор, според Алијанса за Албанците е и против граѓаните, по секоја цена да ја сокријат вистината од нив, да го заробат системот, да инсталираат диктатура како што одамна ја заробија и македонската опозиција и да го уништат секое досегашно достигнување.
По оваа средба, што ќе биде со повторното судење за трагедијата со Модуларната болница во Тетово, кога најодговорниот човек за таа болница ќе го води реформскиот процес во име на „правдата“, прашуваат од оваа партија.